Oje 9 - Maktub Ta Kumkajir

Takɨgang dɔ Israelgt kɨtɔ awɨn kɨ ketekete kam yot kɨ ɗa

¹ Israel, ot ɗa ronel kɨ kamnda tit'n hã girrdeg kɨ dang dang ɗan ne. Kɨta i ɗakaya, i nya Luwah loi kɔ, i ndig nyabaji kaya kɨ ɗa dɔ gar ndah nyakogt tube.

² Nyako kɨ ndah dɔ gart kɨ kand nduu kɨ ɓa lobaat a asɨ kuld al, kasɨnduu kɨkij a dud.

³ A ndɨn kam dɔningt lo Bɨraɓe gog al, Epraimag a telɨn kɨ dɔning Ejipt't gog, a san nyasa kɨyerr dɔning Asirit.

⁴ A mbelɨn kadkari kasɨnduu kɨ kũ kɔ kad Bɨraɓe al. Kadkarig lod kɨjakɔ a nelɨna al. A ĩn tit nyasa lo deg kɨ ngéhɔndo be. Deg tube'n a san a telɨn kɨyerr, kɨta nyasa lod a i kɨta tɔl ɓood koon, a andɨn ne kam kujt lo Bɨraɓe al.

⁵ A i ɗan ɗi ndɔ kawnat kɨ ndɔ ɗa nah lo Bɨraɓe a?

⁶ Kɨtɔ oon, deg ndɨ awɨn sãi kɨ dɔning lod kɨnuj. Kawɨnd kɨnat dɔning Ejipt't, a duwɨnd ɓebo Mempis. Hayag a ɓa utɨn londɨd'n nya larjãg lod kɨ gatd i ngãi, ĩn tit, ngarg a ɓan kam kujkubgt lod.

⁷ Ndɔg kɨta gangta ɗen woi, ndɔg kɨta nda ngɨra ɗen tɔ. Israel a ger. I ndɨ elɨn anan: Ngekelta kɨ ta Luwaht, kurdɔa oi. I ngenyahan ndɨ elta papa kɨta ɗagootal losɨ kɨngãi kɨ taɗɔɔ losɨ kɨdum.

⁸ Ngekelta kɨ ta Luwaht i ngéngomlo kɨjeje ku degt lo Luwah ad i Epraim; na yan gum dɔ ɗobgt loa, ĩn deg ndiant mbã kɨ kam kujt lo Luwah loa.

⁹ I son kam majalt kɨ wokɨɓing tit'n i ɗan ne lot kɨ Gibea maɗi. Luwah a ga kamɨn dɔ ɗagootal lod, na a nda ɔjd kɨtɔ majal lod.

¹⁰ M'ngaa Israel tit kand nduu kɨ kam dɨlalot. M'oo bɔwsɨg tit kand mbaiɓood kɨ and dasa ɓal kandat kɨdasa be. Na bɔwsɨg lon ten Baal-Peort, adɨn rod yo Baal, telɨn kɨyerr tit yo Baal'n tarɨna nõ.

¹¹ Tɔko lo Epraim goto, ɓai aw kɔ tit yel be. Koojna goto, dekɨdẽ Kokam goto, ndah kohna goto.

¹² Ke neni ton ngang kaa ne, m'a m'ad'd oin mbã kad de goto. Beto lod, lon m'nyad kɨnõbe.

¹³ Epraim lon m'ooa i tit ɓebo kɨ Tir be. Epraim i kɨ hɔ kam ndɔɔt kɨmaj dum na Epraim aw kɨ ngang kɨ ro ngetɔldt.

¹⁴ Ad'd nya mad Bɨraɓe. Ɗi a i ad'd a? Ad'd nẽdg telɨn kujg kɨ mbaad kɨ ãi al tɔ.

¹⁵ Girr majal lod tube i kam ɓet kɨ Gilgal, nõbe la m'mbagirr kɔsɨd ta tit ye. Kɨtɔ kɨlaɗag kɨmajal, M'a m'tuɓad kam kujt lom kɨtɨga, M'a m'tard gog al. Mbaiɓeg lod tube ĩn ngétaɗɔɔg.

¹⁶ Ndan Epraim ad ngɨraa tut, a tee kɨ kand gog al. Ke oojɨn ngang kaa ne, m'a m'tɔl ngandg kɨ ngétar lod.

¹⁷ Luwah lom a mbetd kɔ kɨta oon dɔ ta loa al, a ĩn ngékaw kɨ njad dõ ku girrdegt kɨ dang dang.