Dakɔr deg 8 - Maktub Ta Kumkajir

Bai lambag kɨ kaga

¹ Bɨraɓe elta kɨ Moij an:

² El Aarõ titbe an: Lon i ndah bai lambag dɔ kagat a ne, i ɗa ad horrag kɨtanãimɨta a unjɨn nõat.

³ Aarõ ɗa titbe tɔ, ɗago horr lambag kad unjɨn kɨnõ kagat tit'n Bɨraɓe ndan mbera Moij.

⁴ Ɗan lamba'n non titbe, ɗan kɨ nar ɔr kɨ nda mbujmbuj ko girrat mbã kɨ hutat, i nar ɔr kɨ nda mbujmbuj. Moij ɗa lamba'n non kɨgo nyandajt'n Bɨraɓe ɔja.

Moij nda Lebiag tadang kɨta kɨla lo Bɨraɓe

⁵ Bɨraɓe elta kɨ Moij an:

⁶ Ɔr Lebiag ku Israelagt na i ard.

⁷ A i ɗa sed titbe kad i ard. I tud man nyàgokɔ dɔdt kad i ard, ad ngɨsen bĩ rod tube kɨ yinga, ad tugon kubg lod kad arɨn nyang.

⁸ Goot gog a hɔn bɔw mang kɨɗa nat kɨ kadkari nduj loa kɨtoletlet kɨ lɔi kɨ yib, na i hɔ bɔw mang kɨɗang kadkari kɨtɔ majal kɨ ɗa.

⁹ A i ad Lebiag ɗen nõ kujkub ndɔdnat na i kaw ngékawna lo Israelag kɨtaagbe kɨnat.

¹⁰ Lon i ad Lebiag ndɔt'n kɨnõ Bɨraɓet Israelag a ndan jid do Lebiagt,

¹¹ kamla Aarõ a la Lebiag tit kadkari kɨbii nõ Bɨraɓet, ad i kadkari lo Israelag kad ɗan kɨlaɓer lo Bɨraɓe.

¹² Kamla Lebiag a ndan jid dɔ bɔw manggt na a lan kɨkɨɗa kadkari kɨtɔ majal kɨ ɗa na kɨmad kadkari kɨ lahort kad i nyakutdɔ majal lo Lebiag.

¹³ A i ad Lebiag ɗàn nõ Aarõt kɨ ngana na i lad kadkarit kɨbii nõ Bɨraɓet.

¹⁴ Titbe la a i ɔrrɨn Lebiag ku Israelagt na Lebiag a ĩn lom.

¹⁵ Lebiag a ɗen ɗan kɨlaɓer kam kujkub ndɔdnat got'n hã i ard na i lad kadkarit kɨbii.

¹⁶ Kɨtɔ admɨnd kɨtaagbe ku Israelagt, m'tad kɨlomt gan got nganderg ku ngander Israelagt tube,

¹⁷ kɨta ngonderr kɨɗen ku Israelagt i lom, dɔ det mbã kɨdɔ dãgt, m'ndad kɔtkokɨɗa kɨtatɔm ndɔ'n m'tɔlɨn nganderg dɔning Ejipt't

¹⁸ na m'oi Lebiag m'gan goot ngander Israelag tube.

¹⁹ Mad Lebiag tube Aarõ kɨ ngana kadkarit ku Israelagt, kad ɗan kɨlaɓer lo Israelag kam kujkub ndɔdnat, kɨtakad lan kadkari kudt kɨtɔ majal lo Israelag kad yokoosɨ nuj Israelag al, lon ndɔt'n kɨ lot kɨjaɓat.

²⁰ Moij kɨ Aarõ kɨ ngékawna lo Israel tube ɗan kɨ Lebiag nyag tube'n Bɨraɓe nda mbera Moij kad ɗan kɨ Lebiag na Israelag ɗan sed titbe ho.

²¹ Lebiag arɨn rod, tugon kubg lod na Aarõ lad tit kɨ kadkari kɨbii nõ Bɨraɓet, la kadkari kutdɔmajal lod kad ardɨn.

²² Goot gog Lebiag ɗen, ɗan kɨlaɓer kam kujkub ndɔdnat nõ Aarõt kɨ ngana kɨgo tat'n Bɨraɓe nda mbera Moij ɔjɨn dɔ Lebiag. Ɗan sed titbe tɔ.

²³ Bɨraɓe elta kɨ Moij an:

²⁴ 'Nten la i gaj lo Lebiag ye. Tube'n ɓald i dɔjoo gidaimi ke kɨtɔi 'nten, Lebia kɨɗen a and kam kɨlaɓert kam kujkub ndɔdnat.

²⁵ Na go ɓalt kɨdɔmi a ne, a ɔrrɨn rod kam kɨlaɓert na a tel ɗan gog al ta.

²⁶ A ɗan kɨ ngankõd kam kujkub ndɔdnat koon kad oon go nyag'n lan jidt na a ɗan kɨlaɓer gog al ta. Titbe la i ɗan kɨ Lebiag dɔ kɨlaɓert lod.