Dakɔr deg 5 - Maktub Ta Kumkajir

Ta kɨ dɔ nyaɗa kɨgoot al

¹ Bɨraɓe elta kɨ Moij an:

² I ndamber Israelag kad tuɓan ngébanjg tube kam londɨt kɨ dekɨɗen aw kɨ dó in ɓa ɓi, kɨ dekɨɗen'n tel kɨyerr kɨta nin

³ Dekɨdɨngã ke dekɨdẽ, a i teen sia, i teen sia kɨtɨga gid lot kɨtakad yerrɨn kɨ londɨm al.

⁴ Israelag ɗan titbe, ɔrrɨnd kɔ gid londɨt tit'n Bɨraɓe ndan mbera Moij, Israelag ɗan titbe.

Mberkɨnda kɨta sah go nyàgo kɔ dɔ ɗa majalt

⁵ Bɨraɓe elta kɨ Moij an:

⁶ El Israelag an: Lon dekɨdɨngã ke dekɨdẽ ɗa kɨkɨɗa ku majalgt'n deg a ɗan ndoorɨn ne Bɨraɓe a ne, na ta hɔa,

⁷ a tɔɔn tad dɔ majalt lod'n ɗan, na de'n ɗa majal kɨ de mad a ba nya'n non kɨtaagbe kɨ gaj kɨɗa ku kɨmit ad de'n ɗa sia majal.

⁸ Ĩla ngekõnduba goto kad ta nyaba majal'n non a ne, a adɨn nyaba majal Bɨraɓe kad i lo ngejanyamosɨ nat kɨ bal bat kutdɔ majal'n a utɨn ne dɔ majal lo de'n non.

⁹ Kadkari kɨɗen kam nyagt tube'n Israelag ndan kɔtkokɨɗa a i kɨta ngejanyamosɨ'n a ɗen ne roat,

¹⁰ Nyag kɨndah kɔtkokɨɗa a ĩn loa na nya'n dekɨɗen ad a i loa tɔ.

Mberkɨnda dɔ niit kɨɗa

¹¹ Bɨraɓe elta kɨ Moij an:

¹² El Israelag an: Ĩla dekɨdẽ mad to ɗob lon, na ɗa majal ndoorɨn ngawɨn.

¹³ Ĩla de mad to sia gid tilt kanj kad ngawa ger, na tel kɨyerr loyarot ad ngemanaj dɔt goto kɨta hɔa dɔ ɗat al,

¹⁴ ĩla ndil ɗa jang ɗe dɔ ngawat ad ɗa jàng kɨ nẽ in yerr kɨ ron, ke ndil ɗa jàng ɗa de na ɗa jàng kɨ nẽn kɨ yerr kɨ ron al,

¹⁵ de'n non a ɗe kɨ nẽn ro ngejanya mosɨt, na a ɗe kɨ kadkari kɨtaa, ad i epa nduj nyako ɔrj gaj kɨɗa ku kɨ kɨlaht, a ũ yib kɨ nõkag kɨkootmbĩ dɔt al kɨta i kadkari ɗa jàng, kadkari nduj ga kamdɔt kad gan dɔ ɗagootalt.

¹⁶ Ngejanyamosɨ a ad dekɨdẽ ndɔt nderbe kad ɗa dõ nõ Bɨraɓet.

¹⁷ Ngejanyamosɨ a un man kɨjaɓat kam joningt, a ɔi buning kɨ kam kujkub londɨt ũ kam mant.

¹⁸ Ngejanyamosɨ a ad dekɨdẽ ɗa dõ nõ Bɨraɓet, a tut bisɨdɔ dekɨdẽ kamla la kadkari nduj ga kamdɔt jiat, ad i kadkari nduj kɨta ɗa jàng, ngejanyamosɨ a hɔ man kɨkatbang kɨ ngeɗe kɨ ndɔl jint,

¹⁹ Kamla ngejanyamosɨ a ad dekɨdẽ nda yo na a ela an: Ĩla dekɨdɨngã mad tɔ sei al lon i girr tɔgt lo ngawi ɓaitɔ ad i yerr kɨ roi al a ne, man kɨkatbang 'nten a ɗe kɨ ndɔl dɔit al.

²⁰ Na ĩla i tɔ ɗob loi lon i girr tɔgt lo ngawi ɓaitɔ ad i yerr kɨ roi na dekɨdɨngã mad kɨ i ngawi al tɔ sei a ne,

²¹ ngejanyamosɨ a ad dekɨdẽ nda yo kɨ ndɔl, na a el dekɨdẽ an: Bɨraɓe a teli nya kɨndɔlt kɨ yokɨnda ku degt loi lon Bɨraɓe ad bingi oi njururu na kami sir.

²² Ad man ngeɗe kɨ ndɔl and kam tĩit kad kami sir na bingi oi njururu. Na dekɨdẽ a tur an: Ã i titbe.

²³ Ngejanyamosɨ a ndang ta ndɔlɨn teen maktubt mad kamla a tugo kɨ man kɨkatbang nõ,

²⁴ a ad dekɨdẽ ãi man kɨkatbang'n a ɗe kɨ ndɔl, na man'n non kɨ ngeɗe kɨ ndɔl a and kam dekɨdẽt ad roa ata kãrɨr.

²⁵ Ngejanyamosɨ a taa kadkari nduj kɨta ɗa jang ji dekɨdẽt? A bii kadkari ndujɨn non kɨnõ Bɨraɓet, na ndah kadkari'n non dɔ dɨngɨrt.

²⁶ Ngejanyamosɨ a ɔd kadkari nduj ɗoosɨ jin kad i gaj nyagakamdɔt, na a ũ horro dɔ dɨngɨrt. Goot'n hã ɗa titbe a ad dekɨdẽ ãin, man'n non.

²⁷ Lon ada man ãi oi ye, ĩla rota yerr kɨ ron na ɗa majal ndoorɨn ngawɨn a ne, man kɨ ngeɗe kɨ ndɔl a and kamat ad roa ata kãrɨr, kama a sir, bɨnga a oi njururu, na dekɨdẽ'n non a i nya kɨndɔl ku degt lon.

²⁸ Na ĩla dekɨdẽ i kɨyerr al, na i kɨnjanjoi a ne, a ɔrrɨn ta dɔat, na a ooj ngang.

²⁹ 'Nten la i mberkɨnda dɔ ɗa jàngt lon dekɨdẽ mad in ndɨ girr tɔgt lo ngawɨn tɔ ɗob lon na yerr kɨ ron,

³⁰ ĩla ndil ɗa jang ɗe dɔ dekɨdɨngãt ad ɗa jang kɨ nẽn. A ad nẽn ɗa dõ nõ Bɨraɓet na ngejanyamosɨ a ɗa sia kɨgo mberkɨnda'n non kɨtaagbe.

³¹ Ta a goto dɔ ngawat kɨtɔ majal na dekɨdẽ a to ɗagootal lon dɔnt.