Dakɔr deg 36 - Maktub Ta Kumkajir

Ta dɔ nyanduba lo dekɨdẽg

¹ Bɨradɔg lo girrnooj Galaad, ngon Makir, ngon Manase, kɨkɨɗa ku ngan Jojept, ndɔt elɨn ta nõ Moijt kɨ mbaiɓe lo girrkoojg lo Israel,

² anan: Bɨraɓe ndamber ngej kɨ ad dɔning Israelag nyakagɓet kɨgo yukt. Titbe tɔ la ngej ta mberkɨnda kokɨro Bɨraɓet kɨ ad nyanduba lo ngonkõj Selopkad ngana kɨdẽ.

³ Ĩla taan ngaw ku girrdegt kɨɗang lo Israel a ne, a ɔrrɨn nyanduba lod kɔ ku nyandubat lo bɔwjg, a lan dɔ nyandubat lo girrdeg'n taand nõ. Titbe la a ɔrrɨn ne gaj lod kɔ nyandubat loj,

⁴ Lon ɓal taanyadõ lo Israelag ɗe a ne, a lan nyanduba lod dɔ nyandubat lo girrdeg'n taad na a ɔrrɨn gaj lod kam nyandubat lo girrdeg lo bɔwjg.

⁵ Moij ndamber Israelag kɨgo tat lo Bɨraɓe an: Deg kɨ girrkooj Jojept elɨn rota.

⁶ 'Nten la i ta'n Bɨraɓe nda mbera dɔ ngan Selopkad kɨdẽgt: A taan ngawɨn kamd ndig, na a taan ngaw kɨ girrkoojt lo bɔwd tã,

⁷ Titbe la nyanduba lo girrkooj Israel kɨɗa a aw girrkoojt lo Israela mad kɨɗang al kɨta Israela kɨɗen a ndɨ kɨ nyanduba lo girrkooj lo bɔwɨn'g.

⁸ Ngon kɨdẽ kɨɗen'n aw kɨ nyanduba ku girr Israelagt a ne, a taa ngaw ku girrkoojt lo bɔwɨn kɨtakad dekɨɗen ku Israelagt ngom nyanduba lo bɔwɨn'g.

⁹ Titbe la nyanduba mad a asɨ kaw girrkoojt mad kɨɗang al, na girrkooj kɨɗen ku Israelagt a ngom nyanduba lon kɨkɔsɨdɔn.

¹⁰ Ngan Selopkad kɨdẽ ɗan go tat'n Bɨraɓe nda mbera Moij.

¹¹ Makla, Tirsa, Hogla, Milka kɨ Noa, ngan Selopkad kɨdẽ taan ngawg kɨ girrkoojt lo bɔwd.

¹² Dekɨdẽg'n non taan ngaw ku girrnoojt lo girrkooj Manase ngon Jojep, na nyanduba lod nãi kam girrkoojt lo bɔwd.

¹³ Ĩgɨn ten la in mberkɨndag kɨ tagkɨgang'n Bɨraɓe nda mbera Israelag kɨta Moij kam dɨlambogt kɨ Moab kad bah Jurdẽt sumba nõ Jeriko.