Dakɔr deg 35 - Maktub Ta Kumkajir

Ɓebog lo Lebiag

¹ Bɨraɓe elta kɨ Moij kam dɨlambogt kɨ Moab kad bah Jurdẽt kɨ nõ Jeriko an:

² I ndamber ngan Israelg kɨ adɨn Lebiag nyanduba kam nyakagɓet lod, ad i ɓebog kad ndɨnt. A adɨn Lebiag lokulnya kɨ gug dɔ ɓebog'n non tɔ.

³ Ɓebog'n non a ĩn lod kad ndɨnt, na lokulnya a i kɨta mangg lod kɨ ɓut nyakulg lod, kɨta dãg lod tube,

⁴ Lokulnya lo ɓebog'n a adɨn Lebiag a mba girrɨn kad ndogbɔrrt aw kɨtɨga asɨ metɨr ɓumi gug dɔ ɓe kɨtaagbe.

⁵ A i mbɔjɨn lo mad kɨɗang ko kam ɓebot asɨ metɨr dub kɨɗa ko lo ɓakàdt, metɨr dub kɨɗa ko ɓodo, metɨr dub kɨɗa ko lokudkàdt metɨr dub kɨɗa ko ɗɔɔ, na ɓebo a i ngawdent. Ĩgɨn ten la a ĩn lokulnyag kɨ gugɨn dɔ ɓebog lod.

⁶ Ku ɓebogt'n a i adɨn Lebiag nõ, ɓebog asɨn kɨbojidet a in longomrog'n adɨn kɨtakad ngetɔl de ãi kɨtit, na a adɨn ɓebog asɨ dɔsɔɔ gidaijoo dɔt ɓaitɔ.

⁷ Ɓebog tube'n a adɨn Lebiag, ɓebog asɨn dɔsɔɔ gidaijijoo kɨ lokulnyag lod.

⁸ Ɓebog'n a adɨn Lebiag a in ko kam nyakagɓet lo Israelag. Girrde'n loa i ngãi, a ne, a i taan ngãi jiat, na girrde'n loa i ngãi al a ne, a i taan jiat ngãi al tɔ ho. Girrkooj kɨɗen kudt a ad Lebiag ɓebog lon kɨgo nyandubat'n ngah.

Ɓebog longomro

⁹ Bɨraɓe el Moij an:

¹⁰ El Israelag an: Lon i gangɨn bah Jurdẽ, i teen dɔning Kanat

¹¹ a i kɔtɨn ɓebo madg kad in longomro kɨtɔsɨ kɨtakad de'n tɔl de kɨ kamndig al, a ãi kɨtit.

¹² Ɓebog'n non a ĩn longomro kɨtɔsɨ kɨta de kɨ ngenda ngɨra dɔ mosɨt kɨtakad ngetɔl de oi al, na kɨ ɗà nõ ngékawnat kad gangɨn ta loa.

¹³ Ɓebog'n a adɨn ye, ɓebog kɨbojidet kudt a ĩn longomro.

¹⁴ A adɨn ɓebog mɨta ko gid bah Jurdẽt kɨ ɓebog mɨta kam dɔning Kanat. A in ɓebog kɨta longomro.

¹⁵ Ɓebog kɨbojidet'n non a ĩn longomro kɨta Israelag, kɨ mbah kɨ ngehɔlondɨ kusɨt, kɨta dekɨɗen'n tɔl de kɨ kamndig al, a ãi kɨtit.

¹⁶ Ĩla de nda madɓen kɨ hand ad oi a ne, de'n non i ngetɔl de, rota a tɔlɨn ngetɔl de'n non.

¹⁷ Ĩla ndaa kɨ mbal kɨ jint kɨ asɨ tɔla ad oi a ne, i ngetɔl de, rota a tɔlɨn ngetɔl de'n non.

¹⁸ Ĩla ndaa kɨ kag kɨ jint kɨ asɨ tɔla ad oi a ne, i ngetɔl de, rota a tɔlɨn ngetɔl de.

¹⁹ Ngenda ngɨra dɔ mosɨt la a tɔl ngetɔlde'n non, lon ndɔda a tɔla,

²⁰ Ĩla de mad ɔsɨ madɓen kɨgo kɔsɨtat, ke laa kɨ nya mad kam majalt ad oi,

²¹ ke ndaa kɨ jin kɨgo lo bãt, na tee koi a ne, de'n ndaa ye, a tɔlɨna ho. I ngetɔl de ad lon ngenda ngɨra dɔ mosɨt ndɔd ngetɔlde'n non a ne, a tɔla.

²² Na ĩla de ɔsɨ madɓen tẽbe na kɨgo bãt al, ke laa kɨ nya mad kɨgo wongt al,

²³ ke ɗa ad mbal mad kɨ asɨ tɔl de so dɔat, ad oi, na ger go al, ɔsa ta kete al, sah ɗa sia majal al ho,

²⁴ kamla ngékawna a gangɨn ta ku det kɨ ngetɔl de kɨ de kɨ ngenda ngɨra dɔ mosɨt kɨgo mberkɨnda 'nten.

²⁵ Ngékawna a ajɨn ngetɔlde'n non ji ngenda ngɨra dɔ mosɨt adɨna tel kɨ kam ɓebot longomrot'n ãi kɨtit kete, na a ndɨ nõ mbã koi bɨra ngejanyamosɨ'n wurɨna kɨ yib kɨjaɓat.

²⁶ Na ĩla ngetɔlde'n non tee ɗobnin ɓebo longomrot'n ãi kɨtit,

²⁷ lon ngenda ngɨra dɔ mosɨt ngaah gid ɗobnin ɓebot longomrot na tɔl ngetɔlde'n non a ne, ta goto dɔ ngenda ngɨra dɔ mosɨt.

²⁸ Kari na ngetɔlde'n non ndɨ kam ɓebot longomro mbã koi bɨra ngejanyamosɨ. Go koi bɨra ngejanyamosɨ a ne, asɨ tel kɨ dɔning nyakagɓet lon.

²⁹ A i ngomɨn go mberkɨnda 'nten kɨta gangɨn ne ta kusɨt ngakat kɨ ngaka kam lot kɨɗen'n a i ndɨnt.

³⁰ Ĩla de mad tɔl de a ne, ngetɔlde'n non ye, a tɔlɨna dɔ tat lo ngémanajg, na ngemanaj kɨɗa asɨ gangta koi dɔ det al.

³¹ A i taan nyabadɔ ngetɔl de kad i nyana ne, kɨ dɔa dɔn al. A tɔlɨn de'n non kɨta asɨ koi.

³² A i taan nyabadɔ de'n ãi kam ɓebot longomront al ĩla ndig tel dɔningt lon gog kete nõ koi bɨra ngejanyamosɨ.

³³ A i yerrɨn kɨ dɔning kɨ i ndɨnt al kɨta mosɨ a tel dɔning kɨyerrt. Nya mad kɨɗang a ut dɔ majal kɨta dɔning'n mosɨ ũ tit goto na mosɨ de kɨ ngekũ mosɨ kɔ tã.

³⁴ A i yerrɨn kɨ dɔning kɨ i ndɨnt, kam lot'n m'ndɨt, kɨta mĩ la mĩ Bɨraɓe, Ngéndɨ ku Israelagt ye.