Dakɔr deg 32 - Maktub Ta Kumkajir

Rubeniag kɨ Gadiag kɔtɨn dɔning Galaad kad ndɨnt

¹ Rubeniag kɨ Gadiag awɨn kɨ ɓut nyakulg ngãibe na oon ad dɔning Jaejer kɨ dɔning Galaad i lo kɨmaj kɨta nyakulg.

² Kamla Gadiag kɨ Rubeniag awɨn ro Moijt kɨ Eleajar ngejanyamosɨ kɨ kɨbog lo ngékawna, elɨnd anan:

³ Atarot, Dibon, Jaejer, Nimra, Hesbon, Eleale, Seban, Nebo kɨ Beon

⁴ ĩn dɔningg'n Bɨraɓe tetd ɗɔɔ nõ ngékawnat lo Israel, i lo kɨmaj kɨta nyakulg, na ɓerg loi ĩn ngékulnyag.

⁵ Elɨn anan: Ĩla kɨ ngah maj takumit a ne, ad dɔning'n ɗan ɓerg loi nyakagɓet, na ot gang sej bah Jurdẽ.

⁶ Moij tur Gadiag kɨ Rubeniag an: Ngankõsɨg a awɨn ɗɔɔt na i ndigɨn kad i ndɨn ne be e?

⁷ Kɨtɔɗi i ndigɨn kad ro Israelag oi siw dɔ kaw kam dɔningt'n Bɨraɓe ad'd a?

⁸ Bɔwsɨg ɗan titbe lon m'lad Kades Barnea kad oon dɔning.

⁹ Awɨn mbã hollot kɨ Eskol, na lon oon lo oi ye, ɗan ad ro Israelag oi siw dɔ kand kam dɔningt'n Bɨraɓe ad'd.

¹⁰ Bɨraɓe ɓawong kɨtɔlsɔkɨr ndɔt'n non ad nda yo an:

¹¹ deg'n ɓain Ejipt't ɓald asɨ dɔjoo ke tɔi a oon dɔning'n m'ndan yo kɨ mad Abraham kɨ Isaak kɨ Jakob al, kɨta ndulon gom kɨ kam kɨro al.

¹² Kaleb ngon Jepune, de kɨ girr Keniat, kɨ Jojue ngon Nun, ĩgɨn non koon la ndulon go Bɨraɓe kɨ kam kɨro ye.

¹³ Na Bɨraɓe ɓawong kɨ tɨngabil dɔ Israelagt ad ndomɨn kam dɨlalot ɓal dɔsɔɔ mbã deg kɨ ngéɗamajalg'n non nujɨn takum Bɨraɓet tube.

¹⁴ Na oon i ɓai ɔrrɨn got bɔwsɨg'n ĩn ɓut deg kɨ ngéɗamajal, kad i tɔsɨn ne wong lo Bɨraɓe i ndun kɨdɔ Israelt ɓaitɔ.

¹⁵ Kɨtɔ ĩla i tɔn goat a ne, a nyasɨ kam dɨlalot na a i nujɨn deg'n ɗan tube.

¹⁶ Ndɔt'n nderbe kɨ ro Moijt anan: J'a kɨ nda kɨngag nẽbe kɨta ɓut nyakulg loj, kɨ ɗa ɓebog kɨta nganjg,

¹⁷ kamla jĩ, j'a kɨ ɗa roj kɨ nyaɗɔɔg, kad j'ɔrr Israelag ta ɗob mbã kɨ tee sed dɔningt lod, na nganjg a ndɨn ɓebogt kɨngang kɨta ngéndɨ dɔningt nõ.

¹⁸ J'a kɨ tel kɨ kujgt loj gog al mbã kad dekɨɗen ku Israelagt ngah nyanduba lon,

¹⁹ kɨta jĩ, j'a kɨ ngah nyanduba nat sed gid bah Jurdẽt nu al, ke kɨnõt, kɨta jin kɨ ngah nyanduba loj gid bah Jurdẽ ko kɨloɓakàdt.

²⁰ Moij eld an: Ĩla i ɗan nya 'nten, ĩla i ɗan rosɨ kɨ nyakatg kɨta ɗɔɔ nõ Bɨraɓet,

²¹ ĩla deg tube kɨ dãsɨt'n ɔin nyakatg gangɨn bah Jurdẽ nõ Bɨraɓet mbã kad tuɓan madngétaa kɔ nõat,

²² na ĩla dɔning i girr tɔgt lo Bɨraɓe kete, gog got i telɨn, kamla a ĩn kɨkanj ta nõ Bɨraɓet kɨ nõ Israelt, na dɔning'n ɗan a i nyakagɓe losɨ kɨnõ Bɨraɓet.

²³ Na ĩla i ɗan titbe al a ne, i ɗan majal i ndoorɨn ne Bɨraɓe. Rota a i gerɨn maj, majal losɨ a so dɔsɨt.

²⁴ I ɗan ɓebog kɨta ngansɨg, i ndan kɨngag kɨta nyakulg losɨ na i ɗan nya'n unɨn ne kɔsɨ.

²⁵ Gadiag kɨ Rubeniag turɨn Moij anan: Ɓerg loi a ɗan nya'n ngej nda mbera.

²⁶ Nganjg kɨ nẽjg kɨ ɓut nyakulg loj kɨbog kɨ kɨdug tube a nãin kam ɓebogt kɨ Galaad,

²⁷ na ɓerg loi tube a ɔin nyakatg, a awɨn ɗɔɔ nõ Bɨraɓet tit'n ngej ndan mbera.

²⁸ Titbe Moij ndamber Eleajar ngejanyamosɨ kɨ Jojue ngon Nun kɨ bɨrabɔwg kɨdɔ girrkoojt lo Israel dan dɔ Gadiag kɨ Rubeniag,

²⁹ na Moij eld an: Ĩla Gadiag kɨ Rubeniag gangɨn bah Jurdẽ nat sesɨ, dekɨɗen ɗa ron kɨ nyaɗɔɔg kad ɗɔɔn nõ Bɨraɓet, lon dɔning i girr tɔgsɨt a ne, a adɨnd dɔning Galaad nyakagɓet.

³⁰ Na ĩla gangɨn bah kɨ nyakatg nat sesɨ al a ne, a ngahn nyakagɓe kusɨt kam dɔning Kanat koon.

³¹ Gadiag kɨ Rubeniag turɨn anan: J'a kɨ ɗa nya'n Bɨraɓe el ɓerg loi.

³² J'a kɨ gang bah kɨ nyakatg nõ Bɨraɓet kɨ dɔning Kanat, na j'a kɨ ngah nyanduba loj gid bah Jurdẽt ko kɨne.

³³ Moij ad Gadiag kɨ Rubeniag kɨ nusɨ girr Manase ngon Jojep kõɓe lo Sihõ ngar lo Amoriag, kɨ kõɓe lo Og ngar kɨ Basan, ad'd dɔning nat kɨ ɓebog loa kɨ dɔningg lod, ad i ɓebog tube kɨ dɔningt.

³⁴ Gadiag ɗan ɓebo Dibon, Atarot, Aroer,

³⁵ Abrot, Sopan, Jaejer, Jogbeha,

³⁶ Bet Nimra kɨ Bet Harã, ɓebog kɨngang, na ndan kɨngag kɨta ɓut nyakulg.

³⁷ Rubeniag ɗan ɓebo Hesbon, Eleale, Kirjataim,

³⁸ Nebo kɨ Baal Meon (mbelɨn tɔd) kɨ Sibma na ndan tɔ ɓebog'n ɗan.

³⁹ Girrnooj Makir ngon Manase aw ɗɔɔ dɔ Galaadt, taan dɔning'n non na tuɓan Amoriag ngendɨt kete.

⁴⁰ Moij ad Galaad Makir ngon Manase kad ndɨt.

⁴¹ Jair ngon Manase aw ɗɔɔ kɨ ngan ɓeg lod, taad na ndah tɔd ngan ɓeg lo Jair.

⁴² Nobak aw ta Kenat nat kɨ ngan ɓeg kɨ gugɨn dɔ na ndah tɔa Nobak kɨgo tɔnt.