Dakɔr deg 31 - Maktub Ta Kumkajir

Takɨgang dɔ Madiãt

¹ Bɨraɓe el Moij an:

² I nda ngɨra lo Israelag dɔ Madiãgt, gog got a oi aw go ngeigt.

³ Moij elta kɨ deg an: Oon go dekɨdɨngãg kusɨt kad ɗɔɔn kɨ Madiã, kɨta nda ngɨra lo Bɨraɓe.

⁴ A i lan deg dub kɨɗa ku girr Israelt kɨɗen kɨta ɗɔɔ.

⁵ Ɔin deg ku kɨdubgt lo Israel asɨn deg dub kɨlah gidaijoo kɨ ɗan rod oi kɨta ɗɔɔ.

⁶ Moij lad lo ɗɔɔt, deg dub kɨɗa kɨgo girrkoojt kɨɗen nat kɨ Pinẽas ngon Eleajar ngejanyamosɨ'n to nyag kɨ kam lot kɨjaɓat kɨ towg kɨkoo ngãi jint.

⁷ Ɗɔɔn kɨ Madiã tit'n Bɨraɓe ndan mbera Moij na tɔlɨn dekɨdɨngãg tube.

⁸ Tɔlɨn ngarg kɨ Madiã nat kɨ deg lod, ad i Ebi, Rekem, Sur, Hur kɨ Reba, ngarg kɨmi kɨ Madiã, tɔlɨn Balam ngon Beor kɨ kiyaɗɔɔ tɔ.

⁹ Israelag hɔn dekɨdẽg lo Madiã ɓert nat kɨ ngandg, hɔn dãg lod kɨ ɓut nyakulg lod kɨ nyamajg lod tube.

¹⁰ Lan horr ɓebog lod ĩn ndɨnt kɨ lo hɔlondɨg lod tube.

¹¹ Ɔin nyag lod tube'n hɔ taɗɔɔt, deg ho dãg ho,

¹² kamla ɗen kɨ ɓerg, kɨ nyamajg kɨ hɔn taɗɔɔt ro Moijt kɨ Eleajar ngejanyamosɨ kɨ ngékawna lo Israel kam londɨt kam dɨlambogt kɨ Moab kad bah Jurdẽt'n sumba Jeriko sew.

¹³ Moij kɨ Eleajar ngejanyamosɨ kɨ kɨbog lo ngékawna teen, aw lan tad gid londɨt.

¹⁴ Na Moij ɓawong kɨ bɨradɔg dɔ ngéɗɔɔt, ad i deg kɨdɔ kɨdubgt kɨ deg kɨdɔ kɨ ɓugt'n telɨn lo ɗɔɔt.

¹⁵ Moij ndɨjed an: I nyan dekɨdẽg tube kumkajir a?

¹⁶ Oon maj, dekɨdẽg'n ɗan la telɨn rod go takɔjt lo Balam, ɔrrɨn Israelag ad ɗan kaya ndoorɨn ne Bɨraɓe kam tat lo Peor, titbe la yokoosɨ soon dɔ ngékawnat lo Bɨraɓe ye.

¹⁷ Tajigla i tɔlɨn ngon kɨdɨngã kɨɗen na i tɔlɨn dekɨdẽ kɨɗen'n ger ɓi kɨ ngaw,

¹⁸ na ngan kɨdẽg tube'n gerɨn ɓi kɨ ngaw al ɓaitɔ, i ngomɨnd kumkajir kɨta rosɨ.

¹⁹ Na i ndɨn tɨga gid londɨt ndɔ tanãimɨta, ĩn tube'n i tɔlɨn de ke ɔdɨn nin. Ĩn tube arɨn rosɨ ndɔt kɨkõmɨta kɨ kɨkõtanãmɨta, ĩn kɨ ɓerg losɨ.

²⁰ A arɨn kubg losɨ tube kɨ nya kɨɗen kɨ ɗa kɨ ndar, kɨ nya kɨɗen kɨ ɗa kɨ bĩ bĩã, kɨ nya kɨɗen kɨ ɗa kɨ kag.

²¹ Eleajar ngejanyamosɨ el ngéɗɔɔ'n awɨn ɗɔɔt an: Oon, 'nten i takɨ gang kɨgo mberkɨnda'n Bɨraɓe nda mbera Moij.

²² Nar ɔr, nar arjã, ningakasɨ, hand, nar etẽ kɨ nar plomb,

²³ nya kɨɗen'n horr a õa al, a adɨna tɔi kam horrt kad tel kɨkar nyang na nya kɨɗen'n horr a õa, a i tugon kɨ man kar ro, a adɨna tɔi kam mant.

²⁴ Ndɔ kɨkõtanãmɨta a i tugon kubg losɨ na a ĩn kɨkar nyang, gog got a i andɨn londɨt.

Ta dɔ keg nyamajg kɨ hɔ taɗɔɔt

²⁵ Bɨraɓe el Moij an:

²⁶ Ĩ kɨ Eleajar ngejanyamosɨ kɨ bɨrabɔwg lo ngékawna, i tɨdan nyatetɗɔɔ, nyag'n ɔin, deg kɨ dãg.

²⁷ A i keg nyatetɗɔɔ gaj joo, kɨɗa kɨta ngéɗɔɔ'n awɨn ɗɔɔ, na kɨmad kɨta ngékawna kɨtaagbe.

²⁸ A i ta gaj nya lo ngéɗɔɔ'n awɨn ɗɔɔ kɨta Bɨraɓe, a i gaj kɨɗa ku kɨ ɓumit, la girra dɔ degt kɨ mangg kɨ korrog kɨ nyakulg.

²⁹ A i taa kam nyat'n non i lo Bɨraɓe ad Eleajar ngejanyamosɨ.

³⁰ Na kam nyat lo Israelag a i taa gaj kɨɗa ku kɨdɔmit, la girra dɔ degt kɨ mangg kɨ korrog kɨ nyakulg kɨ dã kɨɗen ad Lebiag, ngéngom kujkub londɨ lo Bɨraɓe.

³¹ Moij kɨ Eleajar ngejanyamosɨ ɗan nya'n Bɨraɓe nda mbera Moij.

³² Ndeg nyamajg'n hɔn taɗɔɔt kɨnãi kam nyagt tube'n ngéɗɔɔ ɔin laten: Batg asɨn 675 000,

³³ mangg asɨn 72 000,

³⁴ korrog asɨn 61 000,

³⁵ ngan kɨdẽg'n gerɨn ɓi kɨ ngaw al asɨn 32 000.

³⁶ Nya'n i gaj lo ngékaw ɗɔɔ laten: Batg asɨn 337 500,

³⁷ na batg'n adɨn Bɨraɓe asɨn 675,

³⁸ mangg asɨn 36 000 na adɨn Bɨraɓe kamt asɨ 72.

³⁹ Korrog asɨn 30 500 na adɨn Bɨraɓe kamt asɨ 61.

⁴⁰ Ngan kɨdẽg asɨn 16 000 na adɨn Bɨraɓe kamt asɨ 32.

⁴¹ Moij ad Eleajar ngejanyamosɨ dɔ nyag tube'n tirɨn adɨn Bɨraɓe tit'n Bɨraɓe ndan mbera Moij.

⁴² Nya'n i gaj lo Israelag in Moij ɔrr kam nyagt lo ngékawɗɔɔ ndaa kɔtkokɨɗa

⁴³ kad i gaj lo ngékawna laten: Batg asɨn 337 500,

⁴⁴ mangg asɨn 36 000,

⁴⁵ korrog asɨn 30 500,

⁴⁶ ngan kɨdẽg asɨn 16 000.

⁴⁷ Kokam nyat lo Israelag Moij un gaj kɨɗa ku kɨdɔmit lo deg kɨ dãg ad Lebiag'n ngomɨn kujkub londɨ lo Bɨraɓe tit'n Bɨraɓe ndan mbera.

⁴⁸ Bɨradɔg'n ĩn dɔ kɨdubgt, deg kɨdɔ kɨdubt kɨ deg kɨdɔ kɨɓugt, ndɔt'n kɨ ro Moijt elɨna anan:

⁴⁹ Ɓerg loi tɨdan deg ngéɗɔɔg'n ĩn jidt, na kɨkɨɗa kɨnãi kɔ goto.

⁵⁰ Jĩ kɨ ɗe kɨ kadkari jad Bɨraɓe, nyag'n dekɨɗen kuujt ngah, nyag kɨ ɗan kɨ nar ɔr, ninga kɨ njat kɨ jit kɨ ngan ninga kɨ ji kɨ ningambi kɨ kɨla kɨ la kɔt, kad i nya kutdɔ majal loj nõ Bɨraɓet.

⁵¹ Moij kɨ Eleajar ngejanyamosɨ taan nyag tube'n ɗan kɨ nar ɔr jidt.

⁵² Nar ɔr tube'n bɨradɔg kɨdɔ kɨdubgt kɨ bɨradɔg kɨdɔ kɨɓugt adɨn Bɨraɓe kadkari kɨla kɨ dõ, kɔia asɨ kɨlo 170.

⁵³ Ngéɗɔɔg tube oin nyatetɗɔɔ, dekɨɗen kudt ho kɨta ron.

⁵⁴ Moij kɨ Eleajar ngejanyamosɨ taan nar ɔr lo bɨradɔg kɨdɔ kɨdubgt kɨ bɨradɔg kɨdɔ kɨɓugt, awɨn ne kam kujkub ndɔdnat kad i nyagakamdɔt lo Israelagt kɨnõ Bɨraɓet.