Dakɔr deg 30 - Maktub Ta Kumkajir

Ta dɔ yokɨndat

¹ Moij el ngan Israelg nyag tube'n Bɨraɓe ndaa mbera.

² Moij elta kɨ mbaiɓeg lo girr Israelag an: Oon nya'n Bɨraɓe nda mbera laten:

³ Lon de kɨdɨngã mad un kɔn ad Bɨraɓe ke nda yo kad ɗa'n nya mad a ne, a mbel kɔn al bat na a ɗa kɨgo tat'n tee taat.

⁴ Lon ngon kɨdẽ kɨmand i kam kujt lo bɔwɨn ɓaitɔ, un kɔn ad Bɨraɓe na nda yo dɔnt,

⁵ na bɔwa ger kunkɔ loa kɨ yokɨnda dɔnt na elta mad al a ne, kunkɔg loa kɨ yokɨndag tube a ton lotodt.

⁶ Na ĩla bɔwa ndig sia al, ndɔt'n oon dɔ a ne, kunkɔg kɨ yokɨndag loa'n nda kɨdõt a ton lotodt al.

⁷ Ĩla ngon kɨdẽ taa ngaw got'n un kɔn, ke ta mad tee taat kanj kad ger go,

⁸ na ngawa oo ta loa, elta dɔt al ndɔt'n oon dɔ nõ a ne, kunkɔg loa a ton lotodt, yokɨndag'n nda kɨdɔnt a ton lotodt tɔ.

⁹ Na ĩla ngawa ndig sia al, ndɔt'n oon dɔ nõ a ne, a ad kunkɔ loa kɨ ta kɨ tee taat kanj kad ger go telɨn nya kɨkari na Bɨraɓe a nyàgo kɔ ada.

¹⁰ Kunkɔ kɨ yokɨnda lo ngengawkoi ke lo dekɨdẽ kɨ tuɓa kɔ, yokɨnda kɨɗen kɨ nda kɨdɔnt a to lotont.

¹¹ Lon dekɨdẽ, i kam kujt lo ngawɨn, un kɔn ke nda yo dɔnt

¹² na ngawa oo ta loa, elta dɔt al, na ndig sia a ne, kunkɔg loa a ton lotodt, yokɨndag loa tube kɨ nda kɨdɔnt a ton lotodt tɔ.

¹³ Na ĩla ngawa tuj tag loa ndɔt'n oon dɔ nõ a ne, kunkɔ kɨɗen, kɨ ta kɨ tee taat kɨɗen a to lotont al, kɨta ngawa tujd na Bɨraɓe a nyàgo kɔ ada.

¹⁴ Kunkɔ kɨɗen kɨ yokɨnda kɨɗen'n nda kɨdɔnt, ngawa asɨ nya kad to lotont ke tuj.

¹⁵ Ĩla ngawa elta dɔt ndɔt'n non al a ne, kunkɔg loa kɨ yokɨndag loa'n nda kɨdɔnt tube a ton lotodt. Ngawa ad'd ton lotodt kɨta ela ta dɔt al ndɔt'n oon dɔ.

¹⁶ Ĩla nya ad tag'n non ton lotodt ndɔt'n oon dɔ a ne, ta majal lo nẽa a i dɔat.

¹⁷ Ĩgɨn ten la ĩn mberkɨndag'n Bɨraɓe ad Moij ɔjɨn dɔ dekɨdɨngã kɨ nẽn kɨ bɔw kɨ ngon kɨdẽ, lon i ngon kɨmand kam kujt lo bɔwɨn ɓaitɔ ye.