Dakɔr deg 3 - Maktub Ta Kumkajir

Dan kɔr ngan Lebig

¹ Tɔ deg 'nten la in ngaka Aarõ kɨ Moij kaglot'n Bɨraɓe elɨn ta kɨ Moij dɔ mbalbo Sinait.

² Ngan Aarõ la tɔd ten: Nadab ngon der, Abihu, Eleajar kɨ Itamar.

³ Tɔ deg 'nten la in tɔ ngan Aarõ, ngéjanyamosɨ ye.

⁴ Nadab kɨ Abihu oin nõ Bɨraɓet lon unɨn horr kɨɗang ɗen ne nõ Bɨraɓet kam dɨlalot kɨ Sinai, na oojɨn ngang al, Na Eleajar kɨ Itamar ɗan kɨla janyamosɨ nõ bɔwd Aarõt lon ndɨn kɨ dɔn dõ ɓaitɔ.

Ta lo girrkooj Lebi

⁵ Bɨraɓe elta kɨ Moij an:

⁶ Ad girr Lebi ndɔt nderbe na i ndaa nõ Aarõt ngejanyamosɨ kɨtakad ɗan kɨlaɓer adɨna.

⁷ A ɗan kɨlaɓer adɨna kɨ kɨlo ngékawna titbe tɔ nõ kujkub ndɔdnat kɨ nyag tube kɨ lan ji Israelagt kɨ oon go. A ɗan kɨlaɓer kam kujkub londɨt.

⁸ A ɗan kɨla koogo nyaɗakɨlag kɨ kujkub ndɔdnat tube kɨ nyag tube kɨ ji Israelagt. A ɗan kɨlaɓer kam kujkub londɨt.

⁹ A ad Lebiag ji Aarõt kɨ nganɨn kɨta ɔrrɨnd ku Israelagt adɨna kɨnõt.

¹⁰ A i nda Aarõ kɨ nganɨn kad oon go kɨla janyamosɨ lod na mbah mad'n a ndɔt kɨ lot'n non a ne, i tɔlɨna kɔ.

¹¹ Bɨraɓe elta kɨ Moij an:

¹² Oo, m'ɔi Lebiag ku Israelagt got ngandergt tube ku Israelagt'n teen kamkõt dasa na Lebiag a in lom

¹³ kɨta nganderg tube in lom. Ndɔ'n m'tɔlɨn nganderg tube kam dɔning Ejipt't, m'ɔrr nganderg tube kam Israelt m'ndad tadang kɨta kɨlaɓer lom, la girra dɔ ngander degt mbã ngander dãg. A ĩn lom, mĩ la mĩ Bɨraɓe ye.

Ngan Lebi kɨ kɨla lod

¹⁴ Bɨraɓe elta kɨ Moij kam dɨlalot kɨ Sinai an:

¹⁵ I tɨda kɔr Lebiag kɨgo girrdt kɨ kɨgo girrkooj lo bɔwdg. A i tɨda kɔr dekɨdɨngãg tube, la girra dɔ ngangt kɨ nah kɨɗa.

¹⁶ Moij tɨda kɔrd kɨgo mberkɨndat lo Bɨraɓe, na ɗa kɨgo tat'n Bɨraɓe ela.

¹⁷ Tɔ ngan Lebi kɨdɨngã laten: Gerson, Kehat kɨ Merari.

¹⁸ Oo, tɔ ngan Gerson kɨgo girrkoojdt laten: Libni kɨ Simei.

¹⁹ Oo, ngan Kehat kɨgo girrkoojdt laten: Amram, Jisar, Hebrõ kɨ Ujiel,

²⁰ na ngan Merari kɨgo girrkoojdt: Makli kɨ Musi. Ĩgɨn non la in ngaka Lebi kɨgo girrkoojdt.

²¹ Ko ro Gersont la girrkooj Libniag kɨ girrkooj Simeiag teent. Ĩgɨn non la in girrkooj Gersoniag ye.

²² Ĩgɨn tɨdand, lan girra dɔ ngangt kɨ nah kɨɗa mbã kɨ dekɨdɨngãg tube, kɔrd i 7 500.

²³ Girrkooj Gersoniag hɔn londɨ gid kujkub londɨt ko lokudkàdt.

²⁴ Bɨrabɔw lo girrkooj Gersoniag i Eliajap ngon Lael.

²⁵ Gersoniag ĩn ngékoogo kujkub londɨ, kujkub, nyakutdɔ kɨ kub kut tabit kujkub ndɔdna.

²⁶ Kub ganglo kɨ natlot kɨ kub kut tabit natlo'n gug dɔ kujkub londɨ kɨ dɨngɨr kɨ kɨlag loa, kɨlaɓer lo nyag'n non tube.

²⁷ Ko ro Kehat't la girrkooj Amramiag, girrkooj Jisariag, girrkooj Hebrõiag kɨ girrkooj Ujielag teent. Ĩgɨn non la in girrkooj Kehatiag ye.

²⁸ Ĩgɨn tɨdand, lan girra dɔ ngangt kɨ nah kɨɗa mbã kɨ dekɨdɨngãg tube, kɔrd i 8 600. Ĩgɨn non la in ngékoogo nyag kɨ kam lot kɨjaɓat.

²⁹ Girrkooj Kehatiag hɔn londɨ kad kujkub londɨt dɔɔ.

³⁰ Bɨrabɔw lo girrkooj Kehatiag i Elisapan ngon Ujiel.

³¹ I ngekoogo sund, kɨ tabɨl, kɨ lamba, kɨ dɨngɨrg, kɨ nyaɗakɨlag lot kɨjaɓat'n ngéjanyamosɨ ɗan ne kɨla. Titbe tɔ kub ganglo kɨ nyaɗakɨlag tube.

³² Eleajar ngon Aarõ, ngejanyamosɨ i kɨbo dɔ bɨradɔgt lo Lebiag. I ngekoogo ngeɗakɨla kam lot kɨjaɓat.

³³ Ko ro Merarit la girrkooj lo Makli kɨ Musi teent. Ĩgɨn non la in girrkooj lo Merariag ye.

³⁴ Ĩgɨn tɨdand, lan girra dɔ ngangt kɨ nah kɨɗa mbã kɨ dekɨdɨngãg tube, kɔrd i 6 200.

³⁵ Bɨrabɔw lo girrkooj Merariag i Suriel ngon Abihail. Hɔn londɨ kad kujkub londɨt ko dɔɔ.

³⁶ Nyag'n lan ji Merariagt kad ngomɨn na kɨ oon go laten: Barkagg lo kujkub londɨ, kagg kɨ ngal kɨ pilieg loa kɨ nyahɔdg kɨ nyaɗakɨlaag tube.

³⁷ Pilieg tube kɨ gug dɔ natlo kɨ nyahɔdg kɨ kagg kɨ tɔ dɔ kɨla tit kɨ kɨllag lod.

³⁸ Moij kɨ Aarõ kɨ nganɨn hɔn londɨt nõ kujkub londɨ kɔ loɓakàdt nõ kujkub ndɔdnat ko loɓakàd. In ngékoogo kɨla kam lot kɨjaɓat ɓakumta Israelag, na ĩla de mad kɨɗang ndɔt nderbe a ne, a tɔlɨna kɔ.

³⁹ Lebiag tube'n Moij kɨ Aarõ tɨdand kɨgo mberkɨndat lo Bɨraɓe kɨgo girrkoojdt, lan girra dɔ ngangt kɨ nah kɨɗa mbã kɨ dekɨdɨngãg tube, kɔrd i 22 000.

Ɔrrɨn Lebiag adɨn Bɨraɓe

⁴⁰ Bɨraɓe el Moij an: I tɨda kɔr nganderg kɨdɨngã ku Israelagt tube i la girra dɔ ngangt kɨ nah kɨɗa mbã dekɨdɨngãg tube na i tɨdad kɨ tɔd.

⁴¹ Ɔrr Lebiag kɨtɔm, mĩ Bɨraɓe, gan goot nganderg lo Israelag tube, na nyakulg lo Lebiag gan goot ngander nyakulg lo Israelag ho.

⁴² Moij tɨda kɔr nganderg tube ku Israelagt tit'n Bɨraɓe ndan mbera,

⁴³ Nganderg kɨdɨngã'n tɨdad tube kɨ tɔd, la girra dɔ ngangt kɨ nah kɨɗa mbã dekɨdɨngãg tube, kɔrd i 22 273.

⁴⁴ Bɨraɓe elta kɨ Moij an:

⁴⁵ Ɔrr Lebiag tadang gan goot nganderg lo Israelag, kɨ nyakulg lo Lebiag gan goot nyakulg lod, na Lebiag a ĩn lom, mĩ Bɨraɓe,

⁴⁶ kɨta ban dɔ ngander Israelag'n kɔrd i 273 tɔi Lebiag.

⁴⁷ A ɔi nar mi sumba dɔ dekɨɗen, A ɔi kɨgo nart kɨ kam lot kɨjaɓat, nar kɨɗa asɨ gera dɔjoo.

⁴⁸ A ad nar'n non Aarõ kɨ nganag, nar badɔ kɨta ĩgɨn kɔrd tɔi kɔr Lebiag.

⁴⁹ Titbe Moij ta nar hɔdɔ kɨta deg 273, nganderg kɨdɨngã lo Israelag'n kɔrd tɔi Lebiag,

⁵⁰ Moij ta nar lo nganderg lo Israelag nar 1 365 kɨgo nart kɨ kam lot kɨjaɓat,

⁵¹ kamla Moij ad nar badɔn non Aarõ kɨ ngana kɨgo mberkɨndat lo Bɨraɓe tit'n Bɨraɓe ndan mbera Moij ye.