Dakɔr deg 27 - Maktub Ta Kumkajir

Ta lo ngan Selopkad kɨdẽ

¹ Kamla ngan Selopkad kɨdẽ ngon Heper, ngon Galaad, ngon Makir, ngon Manase kɨ girrkooj Manase ngon Jojep, in tɔd i Makla, Noa, Hogla, Milka kɨ Tirsa,

² aw duban nõ Moijt kɨ Eleajar ngejanyamosɨ kɨ kɨbog lo ngékawna tube kɨ tabit kujkub ndɔdnat. Elɨn anan:

³ Bɔwj oi kam dɨlalot na i ku koosɨ degt'n ndan rod nat taan ɗɔɔ Bɨraɓe nat kɨ ɓut lo Kore al, oi kɨtɔ majal loa kɨ kɔsɨdɔa, na ooj ngon kɨdɨngã al.

⁴ Kɨtɔɗi a tɔlɨn ne tɔ bɔwj kɔ ku noojagt kɨta ooj ngon kɨdɨngã al a? Adj nyakagɓe ku ngankõ bɔwjt ho.

⁵ Moij aw kɨ ta lod nõ Bɨraɓet

⁶ na Bɨraɓe el Moij an:

⁷ Ngan Selopkad kɨdẽ elɨn ta kɨrota. A ad'd nyanduba lod nyakagɓet ku ngankõ bɔwdt na i la nyanduba lo bɔwd jidt.

⁸ A elta kɨ Israelag titbe an: Lon de mad oi, na ngona kɨdɨngã goto a ne, a adɨn nyanduba loa ngona kɨdẽ.

⁹ Ĩla ngona kɨdẽ goto a ne, a adɨn nyanduba loa ngankõa kɨdɨngã.

¹⁰ Ĩla ngonkõa goto a ne, a adɨn nyanduba loa ngankõ bɔwa.

¹¹ Ĩla ngankõ bɔwa goton a ne, a adɨn nyanduba loa nooja kɨ jeje ku noojagt, de'n non la a taa nyakagɓet ye. 'Nten la i mberkɨnda kɨ takɨgang kɨta Israelag tit'n Bɨraɓe nda'n mbera Moij.

Moij la kɨla ji Jojuet

¹² Bɨraɓe el Moij an: Al dɔ mbalbot kɨ Abarim'n ɗan na oo dɔning'n mad Israelag.

¹³ Lon oo oi ye, ĩ tɔ, a awɨn sei ro degt loi tit'n awɨn ne kɨ ngonkõi Aarõ ye be,

¹⁴ kɨta i taan ɗɔɔ ta lom kam dɨlalot kɨ Sin kaglot'n ngékawna ɓain kɨ gakɨ na ɔsɨn gonɨm takumdt ta mant'n non al, ad i man kɨ Meriba kam Kadest kam dɨlalot kɨ Sin.

¹⁵ Moij el Bɨraɓe an:

¹⁶ Kɨ Bɨraɓe, Luwah kɨ Ngekad koo kumkajir dekɨɗen, ndah de mad dɔ ngékawnat,

¹⁷ de'n a tee ho, and ho nõdt kad tee sed ho tel and sed ho kɨtakad ngékawna lo Bɨraɓe ĩn tit batg kɨ ngengomd goto al.

¹⁸ Bɨraɓe el Moij an: Un Jojue ngon Nun, de'n Ndil i kamat, i nda jii dɔat.

¹⁹ A i ndaa nõ Eleajart ngejanyamosɨ kɨ ngékawna tube na i la kɨlaɓer jiat takumdt.

²⁰ I nya gaj tɔg loi dɔat kɨtakad ngékawna lo Israel tube telɨn rod go tat loa.

²¹ Jojue a ɗà nõ Eleajart ngejanyamosɨ kad Eleajar ndɨje ta kɨtakul Urɨn nõ Bɨraɓet. Dɔ tat loa a teen ne ho, dɔ tat loa a andɨn ne ho, Jojue kɨ Israelag tube nat sia, kɨ ngékawna kɨtaagbe.

²² Moij ɗa tit'n Bɨraɓe ndaan mber. Un Jojue ndaa nõ Eleajart ngejanyamosɨ kɨ ngékawna tube.

²³ Nda jin dɔat na nya kɨla jiat tit'n Bɨraɓe ela'n kɨtakul Moij.