Dakɔr deg 25 - Maktub Ta Kumkajir

Israelag ɗan majal Sitim

¹ Israelag ndɨn Sitim na lan girr ɗa kaya kɨ ngan kɨdẽg kɨ Moab.

² Deg'n non kunɨn Israelag kɨ lo kadkarit lod kɨjakɔ'n ndan nõ yogt. San nya na ɔsɨn dɔd ber nõ yogt lod.

³ Titbe Israel nda ron nat kɨ yo Baal Peor, na Bɨraɓe ɓawong kɨ tɨngabil kɨ Israelag.

⁴ Bɨraɓe el Moij an: I kaw mbaiɓeg lo deg kɨnat tube, i gad dõ dɔ kagt dan kàda nõ Bɨraɓet kɨtakad wong lo Bɨraɓe kɨtɔlsɔkɨr goto dɔ Israelt.

⁵ Moij el ngégangtag lo Israel an: Kɨ dekɨɗen tɔl deg lon'n ndan rod nat kɨ yo Baal Peor.

⁶ Taa ne, Israela mad ɔrr dekɨdẽ Madiã mad ɗe sia kɨ ro ngankõngt takum Moijt kɨ ngékawna lo Israel tube lon ndɨ nõn ne tabit kujkub ndɔdnat.

⁷ Lon Pinẽas ngon Eleajar kɨ ngon Aarõ ngejanyamosɨ oo nya 'nten ye, ɓai dan ngékawnat, un ninga jint,

⁸ ndulo go Israela'n non kɨ kam kujkubt loa, na ɔsɨd dɔnat tɔld tujoo, Israela nat kɨ dekɨdẽ kɨ Madiãt'n non. Kamla yokoosɨ nya ta tɔl Israelag.

⁹ Kɔr deg'n yokoosɨ tɔld i 24 000.

¹⁰ Bɨraɓe el Moij an:

¹¹ Pinẽas ngon Eleajar kɨ ngon Aarõ ngejanyamosɨ la ad wong lom tel sɔl dɔ Israelagt kɨta ĩ kɨ kɨɗan kudt la jàng ɗaa tit mĩ be, ad m'tɔl Israelag kɔ kam wongt lom al ye.

¹² Kɨtɔ 'nten a ela kad m'ada kunkɔ kɨ lapia lom.

¹³ Kunkɔ'n non a i kɨtaa, kɨta ngakaa kɨgoat, ad i kunkɔ lo ngejanyamosɨ kɨ tokɨnõ, kɨta jàng ɗaa kɨta Luwah loa na ɗa nya kɨta kutdɔ majal kɨ ɗa lo Israel.

¹⁴ Israela'n tɔlɨna nat kɨ dekɨdẽ Madiã ye, tɔa i Jimri ngon Salu. I bɨrabɔw girrkooj Simeõiag.

¹⁵ Dekɨdẽ Madiã'n tɔlɨn na tɔa i Kosbi ngon Sur'n i bɨrabɔw girrkooj mad ku Madiãgt.

¹⁶ Bɨraɓe el Moij an:

¹⁷ I da kum Madiãg ndo, i tɔld kɔ

¹⁸ kɨta dan kumsɨ ndo ad goolsɨn kɨ ndokum lod kam tat lo Peor kɨ kam tat lo Kosbi ngon mbaiɓe lo Madiãg kɨdẽ, kõnand'n tɔlɨna ndɔ yokoosɨt'n ɗe dɔdt kɨta Peor.

¹⁹ Gog go yokoosɨt.