Dakɔr deg 24 - Maktub Ta Kumkajir

¹ Lon Balam oo nel Bɨraɓe kad njang dɔ Israel ye, aw sah nyakɔj lo ngéɗa yog tit kɨ maɗi al, na tel takumɨn sumba dɔ dɨlalo sew.

² Balam un kumɨn kɨ dõ oo Israelag hɔn londɨ kɨgo girrkoojdt, na Ndil Luwah ɗe dɔat,

³ ad el terrta lon an: Ta lo Balam ngon Beor, Ta lo de'n kuma tee,

⁴ Ta lo de'n oo dɔ tag lo Luwah, de'n oo nya lo Ngetɔgtube kam ndilt. De'n ɔsɨ dɔn ber na kuma tee,

⁵ Kujkubg loi in kɨmaj, Israel, londɨ maj ngãi Israel.

⁶ Ton tit hollog kɨ awɨn sãi, tit kɨ ndɔɔg kɨkad baht, tit kɨ kag aloes'n Bɨraɓe hɔa, tit kɨ kag sedɨrg kɨkad mant.

⁷ Man ɗoosɨ jo man lo Israel mbã ũ kɔ. Koh Israel a bɨla ngãibe. A hɔn londɨ kad mangt kɨ dang dang, Ngar loa a i kɨbo tɔi Agag, Kõɓe loa a i kɨtɔi kɨ dõ.

⁸ Luwah tee sia kɔ Ejipt't, Tɔga i tit tɔg gaj dɔg be, Israel a sa girrdeg'n in madngétaa, A teet kɨngad, a urrd kɨ kɨrãg lon.

⁹ Ud gat, to ber tit tubo. Kõ tubo kɨ to ɓi, nõ a tɔsɨ ndoola a? Majkurr kɨ dɔ det'n njang dɔi. Kɨ ndɔl i dɔ det'n ndɔli.

Balak ɓawong kɨ Balam

¹⁰ Balak ɓawong kɨ Balam ad nda jin na el Balam an: M'kuni kad i ndɔl madngétamg, na oo i njang dɔd nja mɨta oi.

¹¹ Ãi tajigla kɨ ɓe loi. Kete m'ɔj kad m'la kɔsɨgon dɔit, na Bɨraɓe ɔgi dɔ ngah kɔsɨgon.

¹² Balam tur Balak an: M'el ngombangkɨlag'n i lad kɨ romt ta kɨ titbe?

¹³ Balak a adɨm kuj lon kɨ ɗoosɨ kɨ nar arjã kɨ ɔr kaa ne, m'a m'asɨ ɗa nya kɨmaj, ke kɨmajal m'tɔin dɔ ta lo Bɨraɓe al. M'a m'el nya'n Bɨraɓe a el.

¹⁴ Tajigla m'a m'tel kɨ ro degt lom. I ɗe na m'a m'eld nya'n ɓet deg'n ɗan a ɗan kɨ deg loi kaglo kɨdɔboit.

¹⁵ Balam el terrta lon an: Ta lo Balam ngon Beor, Ta lo de'n kuma tee.

¹⁶ Ta lo de'n oo dɔ tag lo Luwah, De kɨ ngeger kɔjtaɗag lo Ngetɔitɔi, De'n oo nya lo Ngetɔgtube kam ndilt, De'n ɔsɨ dɔn ber na kuma tee.

¹⁷ Ã m'ooa na i tajigla al, M'nɔla na i nderbe al ɓaitɔ. Kɨmẽ mad tee ko ro Jakobt, kagkõɓe mad ɓai kokɨro Israelt, A dud Moab rumrum. A nuj girrdeg ngetõɗɔɔ'n ɗan.

¹⁸ A taa Edom nyakagɓent, A taa Seir, madngétan, Israel a ɔj tɔgɨn.

¹⁹ De'n tee kokɨro Jakobt la a õɓe, A tuj ndeg deg kɨnãi kam ɓebogt.

²⁰ Balam oo Amalek na el terrta lon an: Amalek i kɨdasa ku girrdegt kɨ dang dang Na ndɔ mad a nujɨna kɔ.

²¹ Balam oo Keniag na el terrta lon an: Londɨ ngàng ngang tit kuj yel kɨdɔ mbalt.

²² A nujɨn Kenia'n non kɔ, Lon Asiri a aw sei ɓert.

²³ Balam el terrta lon an: Hai, nõ a ndɨ kɨ dɔn dõ lon Luwah ɗa titbe a?

²⁴ Toog a ɗen ko Kɨtim, a dan kum Asiri kɨ Heber ndo, gog got a nujɨnd kɔ.

²⁵ Kamla Balam ɓai aw, tel kɨ ɓe lon. Balak tɔ un ɗob lon.