Dakɔr deg 23 - Maktub Ta Kumkajir

¹ Balam el Balak an: I ɗa dɨngɨr tanãimɨta nẽbe adɨm, i ɗago bɔw mangg tanãimɨta kɨ bal batg tanãimɨta adɨm ho.

² Balak ɗa nya'n Balam el Balak kɨ Balam lan kadkari bɔw mang kɨɗa kɨ bal bat kɨɗa dɔ dɨngɨrt kɨɗen.

³ Balam el Balak an: I ɗa ta kadkarit loi kɨlahorrt, na mĩ m'a m'aw kete maja Bɨraɓe a ɗe ndɔdɨm, na m'a m'eli nya'n ɓet a tee dɔ adɨm. Aw dɔ door lot mad kɨ dɔa todɨla.

⁴ Luwah ndɔd Balam na Balam ela an: M'ɗa dɨngɨr tanãimɨta na m'la kadkari bɔw mang kɨɗa kɨ bal bat kɨɗa dɔ dɨngɨrt kɨɗen.

⁵ Bɨraɓe nda ta ta Balamt el an: I tel kɨ ro Balakt, a el titbe.

⁶ Balam tel kɨ ro Balakt na oo Balak ɗa ta kadkarit lon kɨlahorrt, ĩ kɨ mbaiɓeg lo Moab tube,

⁷ Kamla Balam elta lon kɨ terrta an: Balak ɗe sem ko dɔning Aramt, Ngar kɨ Moab ɗe sem ko dɔ mbalbogt kɨ loɓakàdt. Elɨm an: I ɗe i ndɔl Jakob, I ɗe i la ta dɔ Israelt.

⁸ Titbãi hã m'a m'ndɔl de'n Luwah ndɔla al a? Titbãi m'a m'la ta dɔ det'n Bɨraɓe la ta dɔat al a?

⁹ Ã, ko tasom mbalbot m'ooa, Ko dɔ door lot tɔ m'nɔla, Ĩn deg kɨ londɨd i tadang, A tɨdand ku ndeg girrdegt al.

¹⁰ Nõ asɨ tɨda buning lo Jakob a? Nõ asɨ da kɔr gaj Israel kɨɗa ku kɨsɔɔt a? Kɨ m'oi koi de kɨdenesew, Kɨ dɔboim tit na kɨ dɔboia.

¹¹ Balak el Balam an: I ɗa sem ɗi a? M'kuni kad i ndɔl madngétamg na oo, i ɗa i njang dɔd.

¹² Balam tura an: Sumba kad m'oo go ta'n Bɨraɓe nda tamt kɨ m'el ale?

Balam njang dɔ Israel ɓaitɔ

¹³ Balak ela an: I ɗe nat sem kam lot mad'n i asɨ kood tit. A oo nusɨd na i asɨ kood tube al. Lot'n non la a i ndɔldt adɨm ye.

¹⁴ Ɔrr Balam aw sia kam ndɔɔt lo Sopim tasom mbalbo Pisga, ɗa dɨngɨr tanãimɨta, na la kadkari bɔw mang kɨɗa kɨ bal bat kɨɗa dɔ dɨngɨrt kɨɗen.

¹⁵ Balam el Balak an: I ɗa ta kadkarit loi kɨlahorrt ne na m'a m'aw kete m'ndɔd Bɨraɓe.

¹⁶ Bɨraɓe ɗe ndɔd Balam nda ta taat el an: I tel kɨ ro Balakt, a el titbe.

¹⁷ Balam tel kɨ ro Balakt na oo Balak ɗa kad kadkarit lon kɨlahorrt nat kɨ mbaiɓeg lo Moab. Balak ndɨjea an: Ta ɗi Bɨraɓe el a?

¹⁸ Balam elta lon kɨ terrta an: Balak, i ɓai dõ oo dɔ. Ngon Sipor, i nel mbii kɨ romt.

¹⁹ Luwah i de hã a el takɨbal al. I ngon de hã a mbel kɔn al tɔ. Nya'n eltaa, a ɗa ale? Nya'n la mbera a tɔl kõna ale?

²⁰ Oo, Luwah ndam mber kad m'njang dɔ, Lon njang dɔ de a ne, m'asɨ kɔrr kɔ al bat.

²¹ M'oo majal'n a ɗa Jakob al, m'oo darondo mad kam Israelt al. Bɨraɓe Luwah loa i nat sia, yel tetɗɔɔ lo ngar i kudt.

²² Luwah tee sed kɔ Ejipt't, tɔgd i tit tɔg gaj dɔg be,

²³ yo mad kɨ asɨ ndoor Jakob goto Ndõ te mad kɨ asɨ ndoor Israel goto tɔ ho. Lon kaglo asɨ a ne, a el Jakob kɨ Israel an: I nya'n Luwah ɗa.

²⁴ Oo, Israel ɓai tit kõ tubo, Ndaj ron kɨ dõ tit bɔw tubo. A to ber al mbã kad sanyahɔ Na ãi mosɨ nya'n tɔla.

²⁵ Balak el Balam an: Ĩla i ndɔld, al a ne, i njang dɔd al bat tɔ ho.

²⁶ Balam tur Balak an: M'eli ale? M'a m'ɗa nya kɨɗen'n Bɨraɓe a el.

Balam njang dɔ Israel kɨkõmɨta

²⁷ Balak el Balam an: I ɗe tajigla, m'a m'ɔri m'aw sei lot mad kɨɗang, maj a ne, Luwah ad i ndɔld nu adɨm.

²⁸ Balak ɔrr Balam aw sia tasom mbal Peort'n sumba nõ dɨlalo.

²⁹ Balam el Balak an: I ɗa dɨngɨr tanãimɨta nẽbe adɨm, na i ɗago bɔw mangg tanãimɨta kɨ bal batg tanãimɨta adɨm ho.

³⁰ Balak ɗa nya'n Balam el na la kadkari bɔw mang kɨɗa kɨ bal bat kɨɗa dɔ dɨngɨrt kɨɗen.