Dakɔr deg 22 - Maktub Ta Kumkajir

Ta lo Balaam

¹ Israel ɓai, aw hɔlondɨ kam dɨlalot kɨ Moab gid bah Jurdẽt kɨ sumba Jeriko sew.

² Balak ngon Sipor oo nyag tube kɨ Israelag ɗan kɨ Amoraig,

³ na deg kɨ Moab ɓoolɨn ngãibe kɨta deg'n non kɨta in koosɨg, ad kamd gang man kɨta Israelag.

⁴ Moabiag elɨn kɨbog kɨ Madiã anan: Koosɨ deg'n ɗan a san nyag tube kɨ gugɨn dɔjt tit'n mang a sa'n mũ kɨmbool kam ndɔɔt be. Titbe Balak ngon Sipor in i ngar kɨ Moab kaglot'n non

⁵ la ngombangkɨlag ro Balamt ngon Beorbet kɨ Petor ta baht kam dɔningt lo Amabiag kuna ela an: Oo deg teen ko Ejipt't taan dɔning pelpel na hɔn londɨ sumba nom sew.

⁶ Tajigla m'kɔi kad i ɗe ndɔl deg'n ɗan adɨm kɨta ĩn kɨ tɔg tɔimɨn. Ɓoola, m'a m'teetd ɗɔɔ, na m'tuɓad dɔningt, Kɨtɔ m'ger de'n i njang dɔa a ne, i kɨ njangdɔ na de'n i ndɔla a ne, i kɨndɔl ho.

⁷ Kɨbog lo Moabiag kɨ kɨbog lo Madiãg awɨn kɨ nar ndõ te jidt, teen ro Balaamt, elɨna ta lo Balak.

⁸ Balam turd an: I ton la ndɔ la'n ɗan, na m'a m'tursɨ ta'n Bɨraɓe a elɨm. Kɨbog lo Moab ɓin ro Balamt.

⁹ Luwah ɗe ro Balamt ela an: Deg'n ɓin roit nõ ye, ĩn deg kɨtitbãi a?

¹⁰ Balam tur Luwah an: Balak ngon Sipor, ngar kɨ Moabt la lad kɨ romt kad elɨmɨn anan:

¹¹ Oo deg'n ɗan teen ko Ejipt't taan dɔning pelpel. I ɗe ndɔld, maja m'a m'asɨ ɗɔɔd m'tuɓad.

¹² Luwah el Balam an: A aw nat kɨ deg'n ɗan al bat, a i ndɔl deg kɨnu nõ al ho kɨta ĩn kɨnjangdɔ.

¹³ Balam ɓai kɨsĩ el kɨbog lo Balak an: I telɨn kɨdɔningt losɨ gog kɨta Bɨraɓe ndig kad m'aw nat sesɨ al.

¹⁴ Mbaiɓeg lo Moab ɓai telɨn kɨ ro Balakt gog, elɨna anan: Balam mbet ɗe sej.

¹⁵ Balak la mbaiɓe madg gog ɓaitɔ kɨ kɔrd toi ngekɨkete na ĩn deg kɨ deg ɔsɨn gond tɔi ngékɨkete ho.

¹⁶ Teen ro Balamt elɨna anan: Titbe kel Balak ngon Sipor. Ot kad nya mad ɔgi ɗob ɗe romt

¹⁷ kɨta m'a mad i ngah kɔsɨgon ngãibe, na m'a m'ɗa nya kɨɗen'n i elɨm. M'kɔi kɨ i ɗe i ndɔl deg'n ɗan adɨm.

¹⁸ Balam turta ngekɨlag lo Balak an: Ke Balak a adɨm kuj lon kɨ ɗoosɨ kɨ nar arjã kɨ ɔr kaa ne, m'asɨ ɗa nya mad kɨtẽ ke kɨbo m'tɔin dɔ ta lo Bɨraɓe Luwah lom al.

¹⁹ Tajigla m'kɔsɨ kad i ton nẽbe ndɔ la kad m'ger ta'n Bɨraɓe a elɨm ɓaitɔ.

²⁰ Luwah ɗe ro Balamt ndɔ ela an: Ĩla deg'n ndɨn ɗe kunɨn a ne, i ɓai aw nat sed, na nya'n m'a m'eli nõ tã la a i ɗa.

²¹ Loti kɨsĩ Balam ɓai dõ, nda sirg gid korrot lon, na aw nat kɨ mbaiɓeg lo Moab.

²² Wong lo Luwah kɨtɔlsɔkɨr ɓai kɨta kawɨn aw sed, na malaika lo Bɨraɓe ɗa ɗobo kɨta kuta ta ɗob. Balam i dɔ korrot lon, na ngékɨlaɓerg loa joo in nat sia.

²³ Korro oo malaika lo Bɨraɓe'n ɗa dɔ ɗobt, ɔrr kiyaɗɔɔ jint. Korro tɔ, nya ɗob na ud mut. Balam nda korro kɨ n'tel sia kɨ ɗobo.

²⁴ Kamla malaika lo Bɨraɓe duba dɔ ɗobt mbɨna ndɔɔ nduugt, ndogbɔrr ɗa kɔtko joo.

²⁵ Korro oo malaika lo Bɨraɓe, na ire ron kad bɔrrt ad bɔrr ui nja Balam. Balam nda korro ɓaitɔ.

²⁶ Malaika lo Bɨraɓe tɔi kɨkete duba lot mad kɨ mbẽgrẽ be, lo tɔi kokõ ke ko gel goto.

²⁷ Korro oo malaika lo Bɨraɓe, na so kɨber girr Balamt. Wong tɔl Balam sɔkɨr ad nda korro kɨ kagtɔsɨ lon.

²⁸ Kamla Bɨraɓe tee ta korro ad elta Balam an: M'ɗa ɗi sei hã i ndamɨn nja mɨta titbe a?

²⁹ Balam el korro an: Kɨtɔ i ɓood sem. Ni kiya i jimt a ne, m'a m'tɔli tajigla.

³⁰ Korro el Balam an: Mĩ korro loi i ndɨ alɨm kɨ kaglo tube mbã ɓone ale? Kete m'ɗa sei titbe a? Balam tura an: Ã ã.

³¹ Kamla Bɨraɓe tee kum Balam ada oo malaika lo Bɨraɓe'n ɗa dɔ ɗobt, ɔrr kiya ɗɔɔ jint, na Balam la dɔn ber, so kɨta kumɨn.

³² Malaika lo Bɨraɓe ela an: Kɨtɔɗi i ndan korro loi nja mɨta titbe a? Mĩ la m'ɗe kɨta kuti ta ɗob ye, kɨta i un ɗob nujkɔ kɨ to nomt.

³³ Korro oom, na tɔ ud mut nja mɨta nomt. Ni tɔ ɗob nomt al a ne, ni m'am tɔli kɔ, na m'nyaa kumkajir.

³⁴ Balam el malaika lo Bɨraɓe an: M'ɗa majal kɨta m'ger kad i ɗa ɗobo nomt al. Tajigla ĩla m'ɗa nya kɨ neli al a ne, m'a m'tel m'aw ɓe gog.

³⁵ Malaika lo Bɨraɓe el Balam an: Aw kɨ deg'n ɗan na, a elta'n m'a m'eli nõ tã. Balam aw nat kɨ mbaiɓeg lo Balak.

³⁶ Lon Balak oo hɔi Balam kad ɗe oi ye, aw kɨ n'la taa ad aw mbã kɨ ɓebot lo Moab'n i ta bah Arnõt dɔboi ɗobnin dɔningt.

³⁷ Balak el Balam an: M'la ngombangkɨlag roit kad kunɨn ale? Kɨtɔɗi i ɗe romt al a? Oo a an m'asɨ kadi kɔsɨgon al e?

³⁸ Balam el Balak an: Oo, m'ɗe roit; Tajigla'n m'ɗe roit oi ye, m'asɨ keli ta mad kɨɗang al. Na ta'n m'a m'eltaa a i ta'n Luwah nda tamt kad m'eli tã.

³⁹ Balam aw nat kɨ Balak na teen Kirjat Husot.

⁴⁰ Balak la kadkari mangg kɨ batg, na lan kɨ ro Balamt kɨ mbaiɓeg'n ĩn nat sia.

Balam njang dɔ Israel

⁴¹ Loti kɨsĩ Balak un Balam aw sia Bamot Baal, ko nu la Balam oo nusɨ londɨ Israelag.