Dakɔr deg 21 - Maktub Ta Kumkajir

Israel tetɗɔɔ Arad

¹ Ngar Arad de kɨ Kanat oo hoi Israelg ndɨ ɗen kɨ ɗob kɨ Atarim, lad ɗɔɔ, na hɔ kɨmadg kudt dangai.

² Kamla Israel un kɔn ad Bɨraɓe kɨ yokɨnda an: Ĩla i la deg'n ɗan jimt a ne, m'a m'nuj ɓebog lod kɔ.

³ Bɨraɓe oo dɔ ndɨ Israel ad la Kananiag jiat. Tujɨnd kɔ kɨ ɓebog lod be na kunɨn tɔ lon non Horma.

Moij ɗa li kɨ ningakasɨ

⁴ Ɓain mbalbot kɨ Hor kɨ ɗob kɨ bahbot kɨkɨre kad ngongɨn dɔning Edom. Ro deg oi yelel dɔ ɗobt

⁵ ad deg elɨn ta ndoorɨn ne Luwah kɨ Moij anan: Kɨtɔɗi i teen ne sej kɔ kam Ejipt't kad j'oi kam dɨlalot 'nten a? Lon nyasa gotot, man kãi gotot na nyasa kɨmajal 'nten tã.

⁶ Kamla Bɨraɓe la lig kɨ wongd i ngãi dandt, ad dõn deg, ad koosɨdeg ku Israelagt oin.

⁷ Deg awɨn ro Moijt anan: Jĩ kɨ ɗa majal kɨta j'elta kɨ ndoorɨn Bɨraɓe kɨ ĩ. I kɔ Bɨraɓe ad ɔrr lig kɔ rojt, na Moij kɔ kɨta deg.

⁸ Bɨraɓe el Moij an: I ɗa li kɨ ndulo ngẽingẽi, i la dõ dɔ sorkagt, na de'n li dõa, na un kumɨn kɨ dõ ooan a ne, a aj.

⁹ Moij ɗa li ningakasɨ, la dõ dɔ sorkagt, na dekɨɗen'n li dõa, na un kumɨn kɨ dõ oon li ningakasɨ aj a ne oi al.

¹⁰ Israelag ɓain, aw hɔn londɨ Obot.

¹¹ Ɓain Obot, aw hɔn londɨ Iye-Abarim kam dɨlalot kɨ sumba lo kɨ Moab sew ko loɓakàd.

¹² Ɓain lot'n non aw hɔn londɨ kam hollot kɨ Yered.

¹³ Ɓain ko nu aw hɔn londɨ gid bah Arnõt, dɔningt lo Amoriag. Bah'n nũ kɨ kam dɨlalot kɨta bah Arnõ i ɗob nin dɔning Moab kɨ Amoriag.

¹⁴ Kɨtɔ 'nten la elɨn kam Maktub ɗɔɔgt lo Bɨraɓe anan: Ɓebo Baheb kam dɔning Supat. Kɨ hollog lo bah Arnõ,

¹⁵ Ɗob nũ mang kɨkad mbalbogt Awɨn mbã ɓebo Ar Mbã ɔd ɗobnin dɔning Moab.

¹⁶ Ɓain nõbe awɨn ta bulomant. Ta bulomant'n non Bɨraɓe elta kɨ Moij an: I kaw deg kɨnat, na m'a m'ad'd man.

¹⁷ Kamla Israel ɔsɨ pa 'nten anan: Buloman, i ɓa man. Ɔsɨn pa kɨdɔat.

¹⁸ Buloman kɨ mbaiɓeg urɨn, kɨbog lo deg urɨn kɨ kagkõɓe kɨ gɔlkɔpg lod. Ɓain kam dɨlalot awɨn Matana,

¹⁹ ɓain Matana awɨn Nahaliel, ɓain Nahaliel awɨn Bamot

²⁰ ɓain Bamot awɨn hollot kɨ kam dɔning Moabt kɨ tasom mbalbo Pisga kɨ sumba dɔ kor.

Israel tetɗɔɔ Sihõ

²¹ Kamla Israel la ngombangkɨlag ro Sihõ ngar lo Amoriag ela an:

²² I nyam adɨm m'tɔi dɔning loi kɨ njam dõ, j'a j'and kam ndɔɔt al, ke ndɔɔ nduut, j'a j'ãi man bulo loi al, j'a j'un go ɗob lo ngar koon mbã kad kɨ ndah dɔning loi kɨ gang.

²³ Na Sihõ nya ad Israel ndah dɔning loa gang al. Sihõ kaw deg lon tube kɨnat, tee aw kɨ n'ndɔd Israel kam dɨlalot, ɗe mbã Jahas na ɗɔɔ kɨ Israel.

²⁴ Na Israel tɔla kɨ nyakat, taa dɔning loa ko bah Arnõ mbã bah Jabok, mbã dɔning lo Amoniag kɨta ɗobnin lo Amoniag ndahn ndogbɔrr kɨngang ngãi gugɨn ne dɔ.

²⁵ Israel taa ɓebog 'nten tube na ndɨ kam ɓebogt lo Amoriag tube kɨ ɓebo Hesbon kɨ ngan ɓeg loa tube.

²⁶ Kɨtɔ Hesbon i ɓebo lo Sihõ ngar lo Amoriag'n ɗɔɔ kɨ ngar kɨ Moabt kɨkete na ta dɔning loa mbã bah Arnõ.

²⁷ Kɨtɔ 'nten la ngéndang pag ndangɨn ne anan: Awɨn Hesbon. Ad ɗan ɓebo lo Sibon gog kad ngang.

²⁸ Kɨtɔ horr tee ko Hesbon, ndõ horr tee ko kam ɓebot lo Sihõ, Oon ɓebo Ar kam dɔning Moab, Mbaiɓeg'n ndɨn logt kɨ dõ lo bah Arnõ.

²⁹ Beto loi, Moab, ĩn deg kɨ Kemos ĩ kɨ koi, i nujɨn kɔ. Ɗà ad nganɨn kɨdɨngã ãin na, Nganɨn kɨdẽ ɗan ɓer lo Sihõ ngar lo Amoriag.

³⁰ J'urd kɨ kɨrãg loj Kɨ nujd kɔ tube kɔ Hesbon mbã Dibon, Kɨ tujd kɔ, na horr õ mbã Medeba.

Israel tetɗɔɔ Og

³¹ Israelag hɔn londɨ kam dɔningt lo Amoriag.

³² Moij la ngendalog kad oon Jaejer. Tan ngan ɓeg loa, na tuɓan Amoriag ngendɨt.

³³ Kamla tel unɨn ɗob kaw Basan. Og, ngar kɨ Basan tee kɨta ndɔd'd nat kɨ deg lon tube kɨta ɗɔɔ sed Edrei.

³⁴ Bɨraɓe el Moij an: Ot ɓoola kɨta m'laa jiit nat kɨ deg loa tube kɨ dɔning loa. A i ɗa sia tit'n i ɗan kɨ Sihõ ngar lo Amoriag'n ndɨ Hesbon.

³⁵ Tɔlɨna kɨ ngana kɨ deg loa tube kanj nya de mad kɨ dɔ dõ na taan dɔning loa.