Dakɔr deg 20 - Maktub Ta Kumkajir

Man tee kam mbalt

¹ Kam naht kɨdasa, ɓut ngékawna lo ngan Israel tube teen dɨlalot kɨ Sin, na deg duban ɓebot kɨ Kades. Lot'n non la Mari oit ad duwɨna ye.

² Na man goto lot'n non kɨta ngékawna, ad deg ɓai ndoorɨn Moij kɨ Aarõ.

³ Deg'n non gakɨn Moij anan: Sumba kad j'oi tit'n ngankõjg oin ne nõ Bɨraɓet.

⁴ Kɨtɔɗi i ɗen ne kɨ ngékawna lo Bɨraɓe kam dɨlalot'n ɗan kɨtakad j'oi, jĩ kɨ nyakulg loj a?

⁵ Kɨtɔɗi i teen ne sej kɔ kam Ejipt't kad i ɗen sej kam lot kɨmajal 'nten a? I lo kɨ de asɨ dub nyat al, ke kag mbaiɓood, ke dĩndu, ke kag grenadie a ke mankãi, kaa gotot.

⁶ Moij kɨ Aarõ teen ro ngékawnat kɨtɨga, awɨn tabit kujkub ndɔdnat, son ber kɨ takumd na kunj Bɨraɓe kɨɗangeɗeng tee kɨ rodt hɔi.

⁷ Bɨraɓe el Moij an:

⁸ Un kagtɔsɨ na ĩ kɨ ngonkõi Aarõ, i kawɨn ngékawna kɨnat, elɨn ta kɨ mbal takumdt na a ad man lon. A adɨn man tee kam mbalt'n ɗan kɨtad kad ngékawna ãin nat kɨ nyakulg lod.

⁹ Moij un kagtɔsɨ kɨ to nõ Bɨraɓe tit'n Bɨraɓet ndaan mber.

¹⁰ Moij kɨ Aarõ kunɨn ngékawna kɨnõ mbalt'n non na Moij eld an: Oon dɔ, ĩn ngétõɗɔɔ. Kokam mbalt'n ɗan la j'a jad man teet adsɨ e?

¹¹ Kamla Moij un jin kɨ dõ kɨ kagtɔsɨ lon, nda'n mbal nja joo. Man teet ngãibe ad ngékawna ãin, nat kɨ nyakulg lod.

¹² Goot gog Bɨraɓe elta Moij kɨ Aarõ an: Tit'n hã i admɨn ne kamsɨ al, i ɔsɨn gonɨm takum Israelagt al ye, a andɨn kɨ ngékawna kam dɔningt'n m'ad'd nõ al.

¹³ 'Nten la i man kɨ Meriba, lot'n Israelag majɨn ta Bɨraɓet, na ad tɔ'n to kɨkunjɗang takumdt.

Edom ɔg Israel tɔi dɔningt lon

¹⁴ Moij ndɨ Kades na la ngombangkɨlag ro ngart kɨ Edom an: Titbe kel ngonkõi Israel. I ger daiyog tube'n teen dɔjt.

¹⁵ Bɔwjg awɨn Ejipt't, kɨ ndɨt nu kaglo ngãibe na Ejiptiag ɗajɨn majal, jĩ kɨ bɔwjg.

¹⁶ Jĩ kɨ ko kɨdɔ Bɨraɓet, na oo dɔ ndije, la malaika mad ad tee sej kɨtɨga Ejipt't. Oo, tajigla jĩ kam ɓebot kɨ tɔa i Kades in i kad ɗobnin dɔningt loi.

¹⁷ I nyàj ad kɨ tɔi dɔning loi kɨ njaj dõ j'a kɨ gang kam ndɔɔt al, ke ndɔɔ nduu, j'a j'ãi man bulo loi al. J'a j'un go ɗob lo ngar koon kanj kad kɨ tɔ kokõ, ke gel mbã kad kɨ ndah dɔning loi kɨ gang.

¹⁸ Na Edom tur an: A i tɔi ɓe lom al bat. Titbe al a ne, m'a m'tee m'ndɔd kɨ nyakat.

¹⁹ Israelag elɨna anan: J'a j'un go ɗob kɨbo koon na ĩla j'ãi man loi a ne, mĩ kɨ ɓut nyakulg lom, m'a m'bai kɨ nar. I nya ɗob adɨm m'tɔit kɨ njam dõ. Nya kɨɗang goto.

²⁰ Edom tur an: A i tɔi al. Edom tee kɨta ndɔda kɨ deg ngãibe kɨ nyakat jidt.

²¹ Titbe la Edom mbet nya ɗob kad Israel tɔi dɔningt lon, na Israel tel un ɗob kɨɗang.

²² Ngékawna lo Israel tube ɓain Kades awɨn dɔ mbalbot kɨ tɔa i Hor.

Koi Aarõ

²³ Bɨraɓe elta Moij kɨ Aarõ dɔ mbalbot kɨ Horr kad ɗobnin dɔning Edomt an:

²⁴ Aarõ a aw ro degt lon, a and kam dɔningt'n mad Israel al kɨta i taan ɗɔɔ ta lom ta mant kɨ Meriba.

²⁵ Un Aarõ kɨ ngona Eleajar ad alɨn dɔ mbalbot kɨ Hor.

²⁶ I tɔrr kub kɨ ro Aarõt i la ro ngona Eleajart. Nu la Aarõ a oit, a aw ro degt lon.

²⁷ Moij ɗa nya'n Bɨraɓe ndaa mbera. Alɨn dɔ mbalbot kɨ Hor takum ngékawnat tube.

²⁸ Moij tɔrr kub lo Aarõ la ro ngona Eleajart. Aarõ oi nu tasom mbalbot kamla Moij kɨ Eleajar ɗisɨn dɔ mbalbot.

²⁹ Lon ngékawna tube oon ad Aarõ oi ye, ngékɨɓe lo Israel tube nõn Aarõ ndɔ dɔmɨta.