Dakɔr deg 19 - Maktub Ta Kumkajir

Ta dɔ tugo nyagt kɨyerr

¹ Bɨraɓe elta kɨ Moij kɨ Aarõ an:

² 'Nten la i ta lo mberkɨnda'n Bɨraɓe nda mbera an: Elta kɨ Israelag kad ɗen kɨ mand mang kɨkɨre kɨkanj dɔ, kɨ nya mad ɗaa al ĩn un jug al ɓaitɔ.

³ A adɨn Eleajar ngejanyamosɨ, kad ɔrra tee sia tɨga gid londɨt ad deg tɔlɨna nõat.

⁴ Eleajar ngejanyamosɨ a ɔd mosɨ mang kɨ ngon jin, tud nja tanãimɨta nõ kujkub ndɔdnat.

⁵ De mad a lahor dã mang takumat na a lan horr ndara kɨ dãã kɨ mosa nat kɨ kiã.

⁶ Ngejanyamosɨ a un kag sedɨr kɨ dɔj kag hisop, kɨ kɨla kɨre ũd kam horrt'n ndɨ õ dã mang.

⁷ Kamla ngejanyamosɨ a tugo kub lon, a ndog man, got gog a tel and kam londɨt gog na a i kɨyerr mbã lokɨsɔle.

⁸ De kɨ ngelahorr dã mang'n non a tugo kub lon, a ndog man na a i kɨyerr mbã lokɨsɔle.

⁹ De kɨkar mad a ɔi buhoor mang, a ũ kɔ gid londɨt kam lot mad kɨkar nyang tɔ. A ngomɨn buhoor kɨta ngékawna lo Israel kɨta man kar ro dɔ majalt. I kɨta kar ro dɔ majalt.

¹⁰ De kɨ ngekɔi buhoor mang'n non a tugo kub lon, a i kɨyerr mbã lokɨsɔle. 'Nten i mberkɨnda kɨ tokɨnõ kɨta Israelag kɨ kɨta mbah'n hɔlondɨt kudt.

¹¹ De'n ɔd nin de mad a ne, a i kɨyerr ndɔ tanãimɨta.

¹² A ar ron kɨ man'n non kam ndɔt kɨkõmɨta kɨ kɨkõtanãimɨta, na a i kɨkar, na ĩla ar ron ndɔt kɨkõmɨta kɨ kɨkõtanãimɨta al a ne, a i kɨ kar al.

¹³ De'n ɔd nin mad, ad i dãro de kɨkoi, na ar ron al a ne, yerr kɨ kujkub londɨ lo Bɨraɓe. De'n non a ɔrrɨna kɔ ku Israelagt kɨta tudɨn man kar ro dɔ majalt dɔat al. I kɨyerr, yerr loa i dɔat ɓaitɔ.

¹⁴ Mberkɨnda mad laten: Lon de mad oi kam kujkubt, de'n a and kam kujkubt nõ, kɨ de'n i kamt, a i kɨyerr ndɔ tanãimɨta.

¹⁵ Jo kɨɗen'n nya kut taa i kɨ dɔɔ al a ne, a i kɨyerr.

¹⁶ Dekɨɗen'n ɔd nin de'n tɔlɨna kɨ nyakat kam mut, ke ɔd nin de, ke ɔd kɨnga de, ke dɔɓada a ne, a i kɨyerr ndɔ tanãimɨta.

¹⁷ Kɨtɔ kar de kɨyerr ye, a ɔdɨn buhoor dã kadkari kɨtɔ majal kɨɗa, ũn kam jot, ɔdɨn man kɨnu, mbelɨn dɔt.

¹⁸ De mad kɨkar a un mbi kag hisop, la kam mant, na a tud dɔ kujkubt kɨ nyag kɨ kamt tube. A tud dɔ degt kɨ ndɨn loat'n non, kɨ dɔ det'n ɔd kɨnga, ke ɔd de'n tɔlɨna, ke nin, ke dɔɓad.

¹⁹ De kɨkar a tud man'n non dɔ det kɨ ar al kam ndɔt kɨkõmɨta kɨ kɨkõtanãimɨta, na titbe ndɔ kɨkõtanãimɨta a tela kɨkar. A tugo kub lon, a ndog man na lokɨsɔle a i kɨkar nyang.

²⁰ De'n i kɨ kar al, na ar ron al tɔ a ne, a ɔrrɨna kɔ ku ngékawnat na ɓeta yerr kɨ lo kɨjaɓat lo Bɨraɓe. Man kar ro dɔ majalt i kɨtud dɔat al, i kɨyerr.

²¹ 'Nten a i mberkɨnda kɨ tokɨnõ kɨtad. De kɨ ngetud man kar ro dɔ majalt'n non a tugo kub lon na de'n a ɔd man kar ro dɔ majalt'n non a ne, a i kɨyerr mbã lokɨsɔle.

²² Nya kɨɗen'n de kɨ kar al'n non ɔd a ne, a i kɨyerr ho, na de'n ɔd nya nõ a i kɨyerr mbã lokɨsɔle.