Dakɔr deg 17 - Maktub Ta Kumkajir

Bɨraɓe tɔl deg kɨ yokoosɨ

¹ Kamla Bɨraɓe el Moij an:

² El Eleajar ngon Aarõ ngejanyamosɨ ad ɔi ngan jog dan horrt, na kɨ ũ horr kɔ sãi kɨta ngan jog'n non ĩn kɨndah kɔtkokɨɗa kɨta Bɨraɓe

³ Ngan jog lo deg'n non ɗan majal kɨ tee koi ye, a ndan mbujmbuj ɗan bewin, ta dɨngɨr kɨta kutɨn taa kɨta ĩn nyag'n lan kɨnõ Bɨraɓet, ĩn kɨnda kɔt kɔkɨɗa, a ten nyagakamdɔt kɨta Israelag.

⁴ Eleajar ngejanyamosɨ ɔi ngan jo ningakasɨg lo deg kɨ horr õd ɗan bewin ta dɨngɨr kɨta kutɨn taa.

⁵ I nyagakamdɔt kɨta Israelag kad de kɨ ngejanyamosɨ al, ke kɨ girrnooj Aarõ al a ndɔt kad lahor nõkag kɨkootmbĩ, nõ Bɨraɓet al, na ɓeta i tit Kore be kɨ ɓut deg loa, tit'n, Bɨraɓe elɨn Eleajar kɨtakul Moij ye be.

⁶ Loti got ngékawna lo Israel tube nyurɨn ta dɔ Moijt kɨ Aarõ anan: I tɔlɨn deg lo Bɨraɓe.

⁷ Lon ngékawna kawɨn na kɨnat ndoorɨn Moij kɨ Aarõ, na unɨn kumd kɨdɔ kujkub ndɔdnat a ne, oon kilndii un dɔa, na kunj Bɨraɓe kɨɗangeɗeng teet.

⁸ Moij kɨ Aarõ aw ɗan ta kujkub ndɔdnat,

⁹ na Bɨraɓe el Moij an:

¹⁰ Ɔrrɨn rosɨ kɔ ku ngékawnat'n ɗan na m'a m'nujd tajigne, na son ber kɨ takumd.

¹¹ Moij el Aarõ an: Un jo ndah horr loi na ɔi horr kɨdɔ dɨngɨrt kamt, ũ nõkag kɨkootmbĩ, tit, aw kanangbe ro ngékawnat utɨn dɔ majal lod kɨta Bɨraɓe ɓawong, na yokoosɨ la girrɨn.

¹² Aarõ un jo tit'n, Moij ela'n, ãin ngɔd kɨ ro ngékawnat na oo, yokoosɨ la girr ɗa kɨla ku degt. Kamla Aarõ la nõkag kɨkootmbĩ kɨta kutɨn dɔ majal lo deg.

¹³ Duba ɗa mbɨna ngékoit kɨ ngékumkajɨr na yokoosɨ nya tan.

¹⁴ Yokoosɨ tɔl deg 14 700 kanj tɨda deg'n oin kɨta Kore.

¹⁵ Aarõ tel kɨ ro Moijt kɨ tabit kujkub ndɔdnat lon yokoosɨ nya tan.

Kagtɔsɨ lo Aarõ ɓa hut

¹⁶ Bɨraɓe el Moij an:

¹⁷ El Israelag na i ta kagtɔsɨ kɨɗa ji girrkoojt kɨɗan, ad i kagtɔsɨ kɨlah gidaijoo lo bɨradɔgt.

¹⁸ A i ndang tɔ dekɨɗen dɔ kagtɔsɨt loa, na a i ndang tɔ Aarõ dɔ kagtɔsɨt lo Lebi. Kagtɔsɨ kɨɗa sumba dɔ bɨradɔ kɨɗen lo girrkoojd.

¹⁹ A ũd kam kujkub ndɔdnat nõ najkɨmat lot'n m'a m'ndɔdɨnat sesɨ.

²⁰ A i titbe, de'n m'a m'kɔta a ne, i ĩ la kagtɔsɨ loa a ɓa hut ye, na m'a mad nyur lo Israelag'n nyurɨn dɔsɨt goto.

²¹ Moij elta kɨ Israelag kɨ bɨradɔg lod tube, dekɨɗen ad kagtɔsɨ lon kɨgo girrkoojdt, ad i kagtɔsɨ kɨlah gidaijoo. Kagtɔsɨ lo Aarõ i dan kɨlodt.

²² Moij ũ kagtɔsɨg'n non nõ Bɨraɓet kam kujkub najkɨmat.

²³ Loti Moij and kam kujkub najkɨmat na oo kagtɔsɨ lo Aarõ kɨ girrkooj Lebi, hut, na and kand kag amand kɨmbuj.

²⁴ Kamla Moij ɔi kagtɔsɨg tube nõ Bɨraɓet teen ad Israelag tube oon na dekɨɗen un kagtɔsɨ lon.

²⁵ Bɨraɓe el Moij an: I tel kɨ kagtɔsɨ lo Aarõ i laa nõ najkɨmat kɨtakad tel nyakɔj kɨta ngétaaɗɔɔ kad nyur lod goto nomt, na ɓeta oin.

²⁶ Moij tel ron go tat ɗa tit'n, Bɨraɓe ndan mbera.

²⁷ Israelag elɨn Moij anan: Oo, tamj ndɨ tĩ, kɨ ndɨ kɨ tuj, kɨ ndɨ kɨ tujɨn tube.

²⁸ Dekɨɗen'n ndɔt nderbe in ndɔt nderbe, kujkub londɨt lo Bɨraɓe a oi. Tamj a tĩ tube ale?