Dakɔr deg 12 - Maktub Ta Kumkajir

Aarõ kɨ Maɗi ndoorɨn Moij

¹ Lon Mari kɨ Aarõ elɨn ta ndoorɨn ne Moij kɨta ta lo dekɨdẽ kɨ Nubiat, kɨta taa dekɨdẽ, kɨ Nubiat nẽnt. Elɨn anan:

² Moij kɨ kɨɗabe la Bɨraɓe a elta kɨtakula a? A elta kɨ takulj tɔ ho ale? Na Bɨraɓe oo dɔ.

³ Taa ne, Moij i de kɨsayelel tɔi ndeg deg tube kɨ dɔningt.

⁴ Tentenbe Bɨraɓe el Moij kɨ Aarõ kɨ Mari an: Ĩn tumɨta awɨn ta kujkub ndɔdnat na ĩn tumɨta awɨn.

⁵ Bɨraɓe ɗisɨ kam pilie kilndiit duba ta kujkub ndɔdnat, kun Aarõ kɨ Mari, tujoo ndɔt'n nderbe,

⁶ Bɨraɓe el an: Oon dɔ tag lom maj. Ĩla ngekelta kɨ tamt i kusɨt a ne, m'tee dɔ m'ada gerɨm mĩ Bɨraɓe kɨtakul nyakookamndilt na m'ela to kam niit.

⁷ I titbe hã m'ɗan kɨ ɓer lom Moij al, I ngeɗa nyakɨro ku ngékɨɓet lom tube.

⁸ M'ela ta kum kɨ kum tɨga wang kanj ya dɔ na oo ɓakumta Bɨraɓe, Kɨtɔɗi i ɓoolɨn al na elɨn ta kɨmajal dɔ ɓert lom Moij a?

⁹ Bɨraɓe ɓa sed wong kɨtɨngabil, nyad na aw.

¹⁰ Kilndii ɓai kɔ dɔ kujkubt na oo banj tee ro Marit ad roa ndà ngũng tit bul be, Aarõ mbel kɨ ro Marit na banj ta roa pelpel.

¹¹ Kamla Aarõ el Moij an: A ngeem, m'kɔi, ot nya majal'n kɨ ɗa kɨlo ɓoodt kɨdɔjt kɨta jin, kɨ ɗa majal.

¹² A, ot kad Mari i tit ngon kɨkɔr in nusɨ dãroa oi njɔrr lon teen kamkõnt.

¹³ Moij ko kɨdɔ Bɨraɓet an: A Luwah, m'kɔi kad i yoota.

¹⁴ Bɨraɓe el Moij an: Ĩla bɔwa tiw horr takumat a ne, a i kɨ rosɔl ndɔ tanãimɨta ale? Ad utɨna gid londɨt asɨ ndɔ tanãimɨta gog got a telɨn sia kɨ rodt.

¹⁵ Titbe utɨn Mari gid londɨt ndɔ tanãimɨta, na deg awɨn kete al mbã telɨn kɨ Mari kɨ kam londɨt gog,

¹⁶ kamla deg ɓai Haserot awɨn, hɔn londɨ kam dɨlalot kɨ Parã.