Dakɔr deg 11 - Maktub Ta Kumkajir

Bɨraɓe ad Israelag maan

¹ Deg nyurɨn ta kɨ mbi Bɨraɓet, na lon Bɨraɓe oo dɔ ye, ɓawong sed, na horr lo Bɨraɓe õ kudt ad tuj nusɨ ta lon hɔlondɨnt

² Kamla deg kon kɨdɔ Moijt, na Moij kɔ Bɨraɓe ad horr oi.

³ Ndan tɔ lon non Tabeera kɨta horr lo Bɨraɓe õn kudt.

⁴ Ndɔ madt deg kɨpapag'n dan ngan Israelagt ye, nyur õd kad san dã, ad ngan Israelg kɨ dɔd kaa ne mban girr nõ tɔ, anan: Nõ a adj dã kad kɨ sa a?

⁵ Kamj gah dɔ kanjgt'n kɨ san kam Ejipt't kari kɨnõbe kɨ kosɨ, kɨ wasɨ, kɨ ruwag kɨbo kɨ basal kɨbo kɨ basal kɨdu.

⁶ Tajigla roj lo haw, kumj oo nya mad al, na maan 'nten kɨɗabe koon.

⁷ Maan taana kɨ kum kor na kooa i tit lab kɨ tee kag ɓitat be tit nõkag bdelion be.

⁸ Deg tĩn na awɨn kɨta kɔi maan, usɨna kɨ mbal kusɨ nya ke urɨna kam bĩt, ndirrɨn kam jot na ɗana tit oina. Nel tit kɨ oina kɨ ɗa kɨ yib be.

⁹ Lon tàl hɔ dɔ londɨt kondɔ ye, maan tuso tɔ ho.

Bɨraɓe ad Moij ngeɗasia

¹⁰ Moij oo dɔ nõ lo deg, girrnooj kɨɗen ndɨ nõ kɨ tabit kujkubt lon, na Bɨraɓe ɓa sed wong kɨtɨngabil.

¹¹ Kam Moij tuj ad el Bɨraɓe an: Kɨtɔɗi i ɗa nya kɨngang titbe kɨ ɓer loi a? Kɨtɔɗi m'ngaa maj takumit al, na i nda kɔi dɔmt kad m'ɔrr nõ deg'n tube'n ɗan a?

¹² Mĩ la m'nden deg tube'n ɗan yo? Ke i mĩ tɔ la m'oojd kad i elɨm an: I tod kadit tit'n bɔw ngon a ton ngon kɨ ta mbat mbã kɨ dɔningt'n i un kɔi kɨ ad bɔwdg e?

¹³ Ko ɗah m'a m'ngaa dãt kɨ mad deg'n ɗan tube ɗan ɗan a? Kɨtɔ ndɨ nõn kɨdɔmt anan: Adj dã kad kɨ sa.

¹⁴ Mĩ kɨ kɨɗambe m'asɨ to deg'n ɗan tube al kɨta ɔin ngãi tɔi tɔgɨm.

¹⁵ Lon i ɗa sem titbe ye, i soot kad i tɔlɨm kɔ. Ĩla m'ngaa maj takumit a ne, ot kad m'oo kamkɔl 'nten.

¹⁶ Bɨraɓe el Moij an: I kaw kɨbog lo Israel dɔtanãimɨta kɨnomt ku degt. Deg kɨ i gerd ĩn kɨbog kɨ mbaiɓeg lo deg. I ɗe sed ad ɗan nat sei tabit kujkub ndɔdnat.

¹⁷ Nu la m'a m'ɗisɨt, m'a m'eli ta. M'a m'un Ndil mad i dɔit nõ, na m'a m'kegd dɔdt kɨtakad unɨn kɔi deg nat sei kad i to kɨ kɨɗaibe al.

¹⁸ A i el deg an: I Arɨn rosɨ kɨta loti, a i san dã kɨta i nõn kɨ mbi Bɨraɓet anan: Nõ a adj dã kad kɨ san a? Kɨtɔ kɨ ndɨ kɨ maja kam Ejipt't. Bɨraɓe a adsɨ dã kad i san.

¹⁹ A i san ndɔ kɨɗabe al, ke ndɔ joo, ke ndɔ mi, ke ndɔ kɨlah, a ke ndɔ dɔjoo,

²⁰ na a i san asɨ nah kɨɗa kɨtaagbe mbã kad tee konsɨt mbã, ndasɨ ɓɔ kɨta i mbetɨn Bɨraɓe'n ndɨ kusɨt, na i nõn kɨnõat anan: Kɨtɔɗi kɨ teen kam Ejipt't kɨtɨga a?

²¹ Na Moij el an: Deg'n mĩ kudt, ngenda kɨ nja, kɔrd i 600 000 na i el an: M'a m'ad'd dã kad san nah kɨɗa kɨtaagbe.

²² A jan kɔ batg kɨ mangg kad asɨd e? Ĩla kawɨn kanjg kɨ bahbot tube kɨnat kaa ne, a asɨd e?

²³ Bɨraɓe tur Moij an: Ji Bɨraɓe goj a? A i oo tajigla, ta'n m'el nõ, a ɗa nya ke a ɗa nya al a?

²⁴ Moij tee el deg tag lo Bɨraɓe kamla kaw kɨbog lo deg asɨn dɔ tanãimɨta na ndad gug dɔ kujkub.

²⁵ Bɨraɓe ɗisɨ kam kilndiit, elta kɨ Moij, na keg Ndil kɨdɔat ad kɨbog kɨdɔtanãimɨta. Lon Ndil ndɨ dɔdt ye, elɨn ta kɨta Luwaht, na ɗan titbe gog al ta,

²⁶ Deg joo nãin kam londɨt, kɨ tɔa i Eldad kɨmad tɔa i Medad, na Ndil ɗe dɔdt tɔ ho kɨta ĩn ku ĩgɨtɨn kɔtd, na awɨn ta kujkubt al, na elɨn ta kɨ ta Luwah kam londɨt.

²⁷ Basa mad ãi ngɔd el Moij an: Eldad kɨ Medad ndɨ elɨn ta kɨta Luwaht kam londɨt.

²⁸ Kamla Jojue ngon Nun madkɨla lo Moij kɨ Basan nu el an: Ngeem Moij ɔgd dɔ.

²⁹ Na Moij tura an: Jang ɗai kɨtɔm a? M'oo maj tɔi kad deg lo Bɨraɓe tube elɨn ta kɨtaat, kad Bɨraɓe ad'd Ndilɨn,

³⁰ Kamla Moij kɨ kɨbog oo Israelag telɨn kɨgog kɨ londɨt.

Bɨraɓe ad Israelag kereg

³¹ Bɨraɓe ad nél ɓai ko bahbot ɗe kɨ kereg, tɨnda tĩd kam londɨt kɨ asɨ ndia kɔtko kɨɗa ndɔ kɨɗa kɨ asɨ ndia kɔtko mad ndɔ kɨɗa gug dɔ londɨ. Ɗen nderbe kɨ dɔning asɨ ndia kɨ ndɔ kɨɗa,

³² Ndɔt'n non deg tɔlɨnd ndɔ ho kàda ho, kɨ ndɔ kɨkõjoo tɔ. De'n tɔl ngãi al ne ɔi homer mbɔj nya kɨlah. Goot gog najɨn gug dɔ londɨ,

³³ Lon dã nãin kɨ ngangdt ɓaitɔ ye Bɨraɓe ɓawong kɨtɨngabil kɨ deg na nda deg kɨ yokoosɨ kɨbobe.

³⁴ Ndan tɔ lon non Kibrot Hataaba kɨta loat'n non la duwɨn degt'n nyur õd ye.

³⁵ Ko Kibrot Hataaba deg awɨn Haserot na hɔn londɨ Haserot.