Dakɔr deg 10 - Maktub Ta Kumkajir

Tow nar arjãg joo

¹ Bɨraɓe el Moij an:

² I ɗa towg joo kɨ nar arjã, a i kɨ ɗa kɨ nar arjã kɨ nda mbujmbuj. A ĩn kɨta kun tow kɨta ngékawna, na kɨta kɔjd kaglo ɓai lo hɔlondɨt.

³ Lon a kunɨn towg'n non a ne, ngékawna tube a kawɨn na kɨ roit tabit kujkub ndɔdnat,

⁴ na lon a kunɨn tow kɨɗabe a ne, mbaiɓeg, bɨradɔ girrkooj Israelag a kawɨn na kɨ roit.

⁵ Lon a i kunɨn tow kɨ tɔg ngãi a ne, deg'n hɔn londɨ ko loɓakàdt a awɨn.

⁶ Lon a i kunɨn kɨkõjoo kɨ tɔg ngãi a ne, deg'n hɔn londɨ ko jikõ a awɨn. A kunɨn tow kɨ tɔg ngãi lon i kɨta kaw.

⁷ Lon a i kawɨn ngékawna kɨnat a ne, a i kunɨn tow ho, na a kunɨn kɨ tɔg ngãi al.

⁸ Ngan Aarõ, ngejanyamosɨ, a kunɨn towg. A i mberkɨnda kɨ tokɨnõ kɨ tɔsɨ kɨ ngakat kɨ ngaka.

⁹ Lon i awɨn ɗɔɔ kɨ madngétasɨ, ngedakumsɨ ndo, kam dɔningt losɨ a ne, a i kunɨn tow kɨ tɔg ngãi na Bɨraɓe Luwah a ga kamɨn dɔsɨt kad ug ɔrrsɨ ji madngétasɨgt.

¹⁰ Kam ndɔ ronelt losɨ kɨ ndɔ nahg losɨ kɨ ndɔ kij nahg losɨ a i kunɨn towg dɔ kadkarigt losɨ kɨlahorrt kɨ kadkarig losɨ kɨ kad kamsɔllom, a i nyagakamdɔt kɨtɔsɨ nõ Luwaht losɨ. Mĩ la mĩ Bɨraɓe Luwah losɨ ye.

Israelag ɓai Sinai

¹¹ Ɓal kɨkõjoo kɨ nah kɨkõjoo kɨ ndɔ kɨdɔjoo lo nah'n non ye, kilndii ɓai dɔ kujkub najkɨmat,

¹² na Israelag ɓain kam dɨlalot kɨ Sinai, ndian kɨgoagoa mbã kilndii duba kam dɨlalot kɨ Parã.

¹³ 'Nten i kaw kɨdasabang'n awɨn kɨgo mberkɨnda lo Bɨraɓe'n ad kɨtakul Moij.

¹⁴ Drapo lo girr Juda ɓai aw dasabang nat kɨ koosɨg loa. Bɨradɔ koosɨ Judag i Nason ngon Aminadab.

¹⁵ Bɨradɔ koosɨ Isakariag i Netanel ngon Suar.

¹⁶ Bɨradɔ koosɨ Jabuloniag i Eliab ngon Helon.

¹⁷ Tɔrrɨn kujkub londɨ ta nat ad Gersoniag kɨ Merariag ton na awɨn ne.

¹⁸ Drapo lo girr Ruben aw nat kɨ koosɨg loa. Bɨradɔ koosɨ Rubeniag i Elisur ngon Sedewur.

¹⁹ Bɨradɔ koosɨ Simeõiag i Selumiel ngon Surisadai.

²⁰ Bɨradɔ koosɨ Gadiag i Eliajap ngon Dewel.

²¹ Kehatiag, ngetonyag kɨ kam lot kɨjaɓat awɨn na deg madg tɨlan kujkub londɨ ta nat gog ngon ne mbã kad teen nu kam londɨt kɨkij.

²² Drapo lo girr Epraim aw nat kɨ koosɨg loa. Bɨradɔ koosɨ Epraimiag i Elisama ngon Amihud.

²³ Bɨradɔ koosɨ Manaseag i Gamaliel ngon Pedasur.

²⁴ Bɨradɔ koosɨ Benjamiag i Abidan ngon Gideoni.

²⁵ Kamla drapo lo girr Dan aw na ĩn ngekutgo koosɨg tube. Awɨn kɨɓutaɓuta, na bɨradɔ koosɨ Daniag i Ahiejer ngon Amisadai.

²⁶ Bɨradɔ koosɨ Aseriag i Pagiel ngon Okran.

²⁷ Bɨradɔ koosɨ Neptaliag i Ahira ngon Enan.

²⁸ 'Nten la i ta kɨdɔ ndia Israelagt kɨgo koosɨgt lod, lon awɨn.

²⁹ Moij elta kɨ sajɨn Hobab, ngon Rewel de kɨ Madiã kɨ mum Moij, an: Kɨ ndɨ kɨ j'aw lot'n Bɨraɓe eltaa an: M'a m'adsɨ dɔning'n non. I ɗe nat sej, na j'a kɨ ɗai maj kɨta Bɨraɓe un kɔn kad kɨ n'ɗa maj kɨ Israelag.

³⁰ Hobab tura an: M'a m'aw al na m'a m'aw dɔningt lom kɨ ɓe koojɨmt.

³¹ Moij ela an: Ot nyàj kɨta i ger tit'n j'a kɨ hɔn londɨ kam dɨlalot. A i tel tit kumj be.

³² Ĩla i aw nat sej a ne, maj'n Bɨraɓe ɗa sej ye, j'a kɨ ɗa sei titbe tɔ ho.

³³ Ɓain kad mbalbot lo Bɨraɓe, ndian ndɔ mɨta, na sund kunkɔ lo Bɨraɓe aw nõdt. Ndian ndɔ mɨta kad sahn lo taakò kɨtɔd.

³⁴ Dan kàda kilndii lo Bɨraɓe i dõ dɔdt lon ɓain ne londɨt.

³⁵ Lon sund kunkɔ ndɨ aw ye, Moij el an: I ɓai dõ Bɨraɓe, ad madngétaig'n kɨ tĩ na kɔ. Ad ngékɔsɨta ãin na kɔ nõit.

³⁶ Lon sund duba ye el an: Bɨraɓe, i tel ɗe ro kɨdubgt nja dub kɨlah lo Israel.