Mark 9 - Maktub Ta Kumkajir

¹ Jeju eld tɔ an: Rota m'ndɨ m'elsɨ kɨ tɨga wakɨsɨ, kɨmadg ku ĩgɨtɨn ndɨn la ye, a oin al mbã kad oon kõɓe lo Luwah kamtã, kõɓe lo Luwah'n ndɨ ɗe kɨ tɔg.

Pierr, Jak, kɨ Jã oon Jeju kam kunjt kɨɗangeɗeng

² Go ndɔt kɨbojidet Jeju un Pierr kɨ Jak, kɨ Jã nat sen, aw sed dɔ mbalt kɨ ngal puwuw. Nõbe, i nat kɨ ngéndoog lon koon. Takumdt roa tel kɨɗang.

³ Kubg loa ndulon nyũtnyũt, ndaan ngũng kɨ tɔi takɔl. De kɨ dɔningt kɨ asɨ ɗa kub kad nda titbe goto.

⁴ Ngéndoog lo Jeju kɨ mɨta'n non oon Eli kɨ Moij, teen hɔi ɗa dan ta kɨ Jeju.

⁵ Pierr un tan elɨn Jeju an: Ngej, i nya kɨmaj kad kɨ ndɨ nẽbe. Ad kɨ ɗa kuj mɨta kɨkɨɗa kɨtatɔi, kɨmad kɨta Moij kɨmad tɔ kɨta Eli.

⁶ Kɨtɔ Pierr ger nya'n ndɨ el al, ɓool tɔla sɔkɨr nat kɨ ndeg ngéndoog.

⁷ Kilndii ɗe ut dɔd mbukɨ. Ndi ta mad tee ko kam kilndiit nõ el an: Ĩn ɗan, i ngonɨm kɨ ngetar lom, i nelɨn mbisɨ oon ne dɔ ta loa.

⁸ Na ngéndoog loa nulɨn lo gugɨn dɔd, na oon de mad kɨɗang al na Jeju kɨ kɨɗanbe la i sed ye.

⁹ Na lon ndɨ ɗisɨn dɔ mbalt ye, Jeju ndad mber kɨ tɔgɨn kad elɨn de mad nyan oon kɨ kumd nõ al, mbã kad Ngon de ɓai ku ngékoit tã.

¹⁰ Ngéndoog loa hɔn ta 'nten sem kamdt, na kudt ĩn kɨɓeg ndɨjen na ta anan: Ɓai lo koit ye, kama i ɗi a?

¹¹ Kamla ndɨjen Jeju anan: Kɨtɔɗi ngéndang maktubg elɨn anan kete tã kad Krist ɗe ye, ngekelta kɨ ta Luwaht Eli a ɗe kamtã.

¹² Jeju eld an: Ɗuba, Eli a ɗe kete kad ɗago nyag tube ad asɨna kamtã. Na kɨtɔɗi ndangɨn kam maktubt kɨjaɓat da ne dɔ Ngon de'n ɓet a ngah kõ ngãi, deg a oona nyat mad al tɔ a?

¹³ Na m'ndɨ m'elsɨ; Eli ɗe woi, na deg ɗan sia nya kɨ kamd ndig, tit'n ndangɨn ne kam maktubt kɨjaɓat dan ne dɔa.

Jeju yoot ngon'n ndil kɨyerr i kamat ɔga kelta

¹⁴ Lon tel ɗen ro ngéndoogt'n nyand gog ye, oon bakad koosɨdeg gugɨn dɔd. Na Juipg kɨ ngéndang maktub ɗa majɨn na ta ngãi sed ngéndoog lo Jeju.

¹⁵ Na lon bakad koosɨdeg oon Jeju ye, ta yaad biw. Tajigt deg ãin ngɔd lan taa, ɗana lapia.

¹⁶ Jeju ndɨje ngéndoog lon an. I ɗa i majɨn na ta dɔ ɗit a?

¹⁷ De mad ku koosɨdegt tur an: Ngendooj, m'ɗe kɨ ngonɨm kɨdɨngã, ndil kɨmajal i kamat, dɔɔ ngangãa ɗa, ɔga dɔ kelta.

¹⁸ Lokɨɗen awt a ne, ndil kɨyerr'n non a kɨla laa ɓap; ad taa ɓa hulum njukɨ njukɨ, ngoor ngang'n mormor, roa ngang kongkong. M'ndɨje ngéndoog loi kad ɔrrɨn ndil kɨyerr'n non kamat kɔ, na asɨn kɔr al.

¹⁹ Jeju eld an: Ĩn ngékadkamsɨ Luwah al, kaglo asɨ bãi ɓet m'am ndɨ nat sesɨ a? Kaglo bãi hã m'am ndɨdɔt sesɨ a? I ɗen kɨ ngon'n non so adɨn m'ooa.

²⁰ Ɗen kɨ ngon'n non roat. Lon ndil kɨmajal oo Jeju ye, tur ngon murmur kɨ tɔgɨn, ad so ber ndur gundi gundi, na hulum taa ɓa njukɨ njukɨ.

²¹ Jeju ndɨje bɔw ngon an: Kaglo asɨ bãi hã nya 'nten ɗan nya a? Bɔw ngon tura an: Lon ĩn ngon kɨɗoi ɓaitɔ.

²² Ndil kɨyerr'n non kɨ njanatbe a ɔsɨ laa kam horrt, ke kam mant kad oi kɔ. Ĩla asɨ ɗa nya mad a ne, oo kumtondo loj na i ɗa sej.

²³ Jeju tura an: Kɨtɔɗi i elɨn an: Ĩla asɨ a ne. Nyag tube i root ro det kɨ ngekadkamɨn Luwah.

²⁴ Na, bɔw ngon kɔ kɨ nõ kumɨnt an: M'adkam Bɨraɓe, i ɗa sem, na kɨta kadkam lom la i tẽbe ye.

²⁵ Na lon Jeju oo bakad koosɨdeg ndɨ ɗen kɨ dɔat kɨ ngɔd ye, ndáng ndil kɨmajal kɨ tɔgɨn, ela an: ĩ ndil kɨ ngekɔg de kelta ho, i ngekɔg koo dɔ ta tɔ ho ye, m'eli kad i tee kam ngont kɔ. Ot kand kamat gog.

²⁶ Ndilɨn non ɓa ko bang, tur ngon murmur kɨ tɔgɨn, kamla nda lo tee kamat. Ngon to tit oi be, ad koosɨdeg elɨn anan: Oi.

²⁷ Na Jeju hɔ ji ngon, unan kɨ dõ, ad ngon ɓai ɗa dõ.

²⁸ Lon Jeju tel and kuju ye, i sed ngéndoog lon koon, ngéndoog loa ndɨjena anan: Kɨtɔɗi jĩ j'asɨ tuɓa ndil kɨmajal'n non al a?

²⁹ Jeju turd an: Ndil kɨ tit'n non a asɨ tee kam det kɨtakul kelta kɨ Luwah tã.

Jeju elta dɔ koint kɨ ɓain lo koit gog tɔ

³⁰ Ɓain lot'n non, awɨn ndan dɔning Galile gangɨn. Na Jeju ndig kad de mad ger al.

³¹ El ngéndoog lon an: A lan Ngon de ji madngétaagt, a tɔlɨna, go ndɔgt kɨmita a ɓai lo koit.

³² Na ngéndoog loa gerɨn girr ta'n non al ad ɓoolɨn kad'n ndɨjena ta dɔt.

Nõ i kɨbo tɔi a?

³³ Ɗe teen Kapernawmt. Lon ndɨn kam kujt ye, Jeju ndɨje ngéndoog lon an: Lon ĩn dɔ ɗobt ye, ɗi a i majɨn na ta dɔt a?

³⁴ Na ngéndoog loa, ndin tad mbo kɨta majɨn na ta kudt kɨ n'oon ke nõ i kɨbo tɔi a?

³⁵ Kamla Jeju ndɨ ber, kun ngombangkɨlag lon kɨkɨlah gidaijoo eld an: Ĩla de mad ndig kad nĩ kɨbo tɔi a ne, maj kad i ngekut go deg ho, ngeɗakɨla kad deg tube ho.

³⁶ Taa ne, un ngon kɨdu ndaa dandt, hɔa kɨ ront, na eld an:

³⁷ De'n ndɨ hɔ ngon kɨdu kɨɗen kɨ ront kɨtakul tarɨn tarɨm a ne, i mĩ kɨɓe la ndɨ hɔm kɨ ront ye, na de'n ndɨ hɔm kɨ ront a ne, i mĩ hã ndɨ hɔm kɨ ront al, na ndɨ hɔ ĩn hã lam.

De'n ndoorj al ye, i nat sej

³⁸ Jã el Jeju an: Ngendooj. J'oo de mad ɗa tuɓa ndilg kɨmajal kam tɔit. Kɨ ndig kad j'ɔga dɔ kɨta i nat sej al.

³⁹ Jeju ela an: Ot kɔgɨna dɔ kɨta de'n ndɨ ɗa kɨlag kɨ yaya kam tɔmt ye, asɨ kelta kɨmajal dɔmt kanangbe al.

⁴⁰ Na de'n ndoorj al a ne, dea nõ i sej.

⁴¹ Rota m'ndɨ m'elsɨ kɨ tɨga wakɨsɨ: Ĩla de mad adsɨ mankãi kɨlat kam tɔmt kɨta ĩn kɨ lo Krist a ne, dea nõ a nal nyabaji al bat.

Oon go rosɨ maj. Ot ɗan majal

⁴² Na dekɨɗen ndɨ ga ngan kɨ dug, ngékadɨm kamd'n ɗan gigt, ad soon kam majalt a ne, i soot kad lan mbal kusɨ nya kɨbobe kɔat lana ne kam bahbokat't.

⁴³ Ĩla jii ko kõi ɔsɨ kad i ɗa majal a ne, i ganga kɔ; i soot kad and kam kumkajirt kɨ jeje kɨ jii kɨ gind, tɔi kad kɨ jii joo aw kam jahanamat ad i horr kɨ dum tɔl.

⁴⁴ I lon kɨdeg a oint al bat, horra i kɨ dum tɔl.

⁴⁵ Ĩla njai tel nyagai gigt kad i so kam majalt a ne, i ganga i la kɔ; i soot kad and kam kumkajirt moot, tɔi kad lain kɨ njai kɨjoo kam jahanamat.

⁴⁶ Lot'n kɨdeg a oin tit al bat, na horra i kɨ dum tɔl tɔ.

⁴⁷ Ĩla kumi tel nya gai gigt tɔ a ne, i ɔrra i la kɔ sãi; i soot kad i and kam kõɓet lo Luwah kɨ kumi kɨɗa tɔi kad lain kɨ kumi kɨjoo kam horr jahanamat.

⁴⁸ Kɨtɔ i lo kɨ kɨdeg a oin tit al bat, horra i kɨ dum tɔl.

⁴⁹ Kɨtɔ dekɨɗen a telɨna kɨjaɓat't kɨ horr, tit'n a gan ne kat dɔ nyajamosɨkadkarit nõ be.

⁵⁰ Kat i nya kɨmaj, na ĩla mɨrã kat goto a ne, ndaa i ɗi a? Kɨ i ndɨn kɨ kat kam rosɨt, i ndɨn kɨ kam kɨsokɨber dɔ nat.