Mark 8 - Maktub Ta Kumkajir

Jeju ad nyasa deg dub sɔɔ

¹ Ndɔ mad, koosɨdeg tel kawɨn na kɨ nat tɔ. Na nyasa kad deg'n non san goto. Ye Jeju kun ngéndoog lon eld an:

² Ta õ kamm ngãi kɨta koosɨdeg'n ɗan, kɨta asɨ ndɔ mɨta ɓone la ĩn nat sem, na nya mad kad san goto.

³ Ĩla m'ad'd tel awɨn ɓe kɨ ɓo kamdt a ne, kumd a il dɔ ɗobt ad tɔgd a goto, kɨta kɨmadg ɓain ko kɨ sãi.

⁴ Ngéndoog loa turɨna anan: Ja kɨ ɗa titbãi kad jad nyasa koosɨdeg'n ɗan sa ndenɨn kɨ dɨlalot nẽbe a?

⁵ Jeju ndɨjed an: Ĩn kɨ kuɓɨr bɨna bãi jisɨt nõ. Ngéndoog turɨna anan: J'aw kɨ kuɓɨr kuɓɨr bɨna tanãimɨta.

⁶ Kamla Jeju el koosɨdeg kad ndɨn ber dɔningt. Ɔi bɨnag kɨ lɔi tanãimɨta, na ɗa mersi Luwah kamla hɔ tet ad ngéndoog kad kɨ luɓon koosɨdeg.

⁷ Awɨn kɨ ngan kanj tẽbe. Jeju ɗa mersi Luwah, kamla keg ngéndoog lon kad luɓon.

⁸ Deg san, ndenɨn. Ngéndoog ɔin ndeg bud kuɓɨr bɨna ye, ɗoosɨ keh tanãimɨta.

⁹ Deg tube asɨn dub sɔɔ. Kamla Jeju nyad ad awɨn ɓe.

¹⁰ Tajigt al kam toot sed ngéndoog lon awɨn kam dɔning Dalmanutat.

Parisɨg ndɨjen Jeju kad ɗa nyakɔj mad

¹¹ Parisɨg ɗen ro Jejut, mbã girr majɨn ta kɨ Jeju, yan gum kad Jeju so kamt kɨgo ɗob tag kɨ ndɨje dang dang, elɨna anan i ɗa nyakɔj mad takumjt ne ad j'oo, kad ɔj'jɨn kad i Luwah la lai jeje ye.

¹² Jeju lako pũ kɨ tɔgɨn, kamla el an: Kɨtɔɗi deg kɨ dɔkaglot kɨ ɓone ndɨjen nyakɔj a? Rota la m'ndɨ m'elsɨ ye: deg kɨ kaglot kɨ ɓone a oon nyakɔj mad kɨɗang al.

¹³ Nõbe Jeju tĩnya Parisɨg, na tel al kam toot gog aw gang bah gid ko nu.

Ta lo berrkasɨ kɨ ɔj go nyandoo lo Parisɨg kɨ kɨ lo deg lo Herod

¹⁴ Kam ngéndoog lo Jeju oi dɔ kɔi kuɓɨr bɨna, na ĩn kɨ kuɓɨr bɨna kɨɗabe la kam toot ye.

¹⁵ Jeju ndad mber kɨ tɔgɨn an: Oon go rosɨ maj dɔ berrkasɨt lo Parisɨg kɨ kɨ lo Herod.

¹⁶ Ad ngéndoog loa ɔjɨn na ta kudt elɨn anan: I kɨta nyasa'n goto jijt la elɨn ta 'nten ye.

¹⁷ Jeju oo ta gaad ɓet ad eld an: Kɨtɔɗi i ndɨ ɔjɨn ne ta dɔ bɨna kɨ lɔit kɨ goto jisɨt a? Mbã tajigla goosɨ losɨ goto oo? A i gerɨn girr nyandoo lom ye ale? Ĩn deg kɨ kurdɔsɨ oi mbukɨ.

¹⁸ Awɨn kɨ kum kɨta koo lo, na i oon lo al, awɨn kɨ mbisɨ kɨta koo dɔ ta, na oon dɔ ta al, adɨn kamsɨ gah dɔt al.

¹⁹ Lon m'keg kuɓɨr bɨna kɨmi kɨta deg dub mi ye, ndeg buda kɨ nãi ye, ɗoosɨ keh bãi a? Turɨna anan: Ɗoosɨ keh kɨlah gidaijoo.

²⁰ Jeju eld tɔ an: Lon m'keg kuɓɨr bɨna tanãimɨta mad deg dub sɔɔ san ye, buda n'nãi ye, ɔin ɗoosɨ keh bãi a?

²¹ Turɨna anan: I keh tanãimɨta. Eld an: I gerɨn girra al ɓaitɔ ɔ?

Jeju yoot mundo kɨ Besaidat

²² Jeju kɨ ngéndoog lon awɨn Besaidat. Deg ɗen kɨ mundo mad roat, ndɨjena kad kɨ ɔda.

²³ Jeju hɔ ji mundo, ɔrra aw sia gid ɓet; kamla tiw hortan kumat, na nda jin dɔat na ndɨjea ta an: Oo nya mad e?

²⁴ Mundo tee kumɨn na el an: M'oo deg, tit kɨ kagg be, na ɗa ndian.

²⁵ Jeju tel nda jin dɔ kum mundot gog ɓaitɔ, mundo oo lo kɨɗingg kɨ nont, yoot, oo nyag tube ar nyang.

²⁶ Jeju ela an: Aw ɓe loi, ot kaw kam ɓet.

Pierr elta dan dɔ Jeju, an i Krist

²⁷ Jeju aw sed ngéndoog lon ngan ɓegt kɨ nderbe kɨ kam dɔningt'n a kunɨna Sejare kɨ Pilipt. Lon ĩn dɔ ɗobt ye, ndɨje ngéndoog lon an: Deg ndɨ elɨn anan: Mĩ nõ a?

²⁸ Ngéndoog loa turɨna anan: Deg madg ndɨ elɨn anan ĩ Jã kɨ ngeɗa deg baptem deg, kɨmadg ndɨ elɨn anan ĩ Eli, kɨmadg tɔ ndɨ elɨn anan: Ĩ kɨkɨɗa ku ngekelta kɨ ta Luwaht.

²⁹ Jeju ndɨjed an: Na ĩn ye; i ndɨ elɨn anan mĩ nõ a? Pierr tura an: Ĩla ĩ Krist ye.

³⁰ Jeju ndad mber kɨ tɔgɨn kad kɨ elɨn ta 'nten de mad al.

Jeju elta dɔ koint kɨ ɓain lo koit

³¹ Kamla Jeju mba girr ndoo ngéndoog lon an: Kari na Ngon de a ngahkõ ngãibe, kɨbog lo Juipg, ngéjanyamosɨkadkari, kɨ ngéndoo deg mberkɨnda a ɔsɨna ta, a tɔlɨna, na go ndɔt kɨmita a ne, a ɓai lo koit.

³² Eld ta 'nten kɨ tɨga wakɨsɨ. Ye Pierr ɔrra kɔt ko kɨɗa, mba girr kɔl sia ela an: Ot kelta titbe.

³³ Na Jeju mbel kumɨn kɨ gog oo ngéndoog lon, na kɔl kɨ Pierr an: Sitan aw sãi. I tel kɔ gidɨmt. Ta gaai i ta lo Luwah al, na i ta gaa lo deg.

³⁴ Kamla Jeju kun koosɨdeg sed ngéndoog lon kɨ ront, na eld an: Ĩla de mad ndig kad'n ndulo gom a ne, maj kad ɔrr ta ron kɔ balang, kɨ un kag dɔsɨ lon, kamla kɨ n'ndulo gom ye.

³⁵ Kɨtɔ de'n ndig kɨ n'aj ron dɔningt la a ne, a la ron kɔ na de'n la ron kɔ kɨtatɔm ho kɨta Hoita kɨmaj a ne, a aj.

³⁶ Ĩla de ngah nyamajg kɨ dɔningt kɨtaagbe, na nal kumkajir kɨ jeje ye, ndaa i ɗi a?

³⁷ Ɗi de a ad kɨ'n gan kot ndɨ kɨ dɔ dõ a?

³⁸ De'n hã roa ndɨ sɔla kɨtatɔm ho, kɨta ta lom ho, ku degt kɨmajal kɨ ɗug gɔligɔli kɨ kaglot'n ɗan a ne, mĩ Ngon de m'a m'la rosɔl dɔat ho, lon m'a m'tel m'ɗen kam kunjt kɨɗangeɗeng lo Bɔwm nat kɨ malaikag kɨjaɓat.