Mark 6 - Maktub Ta Kumkajir

Deg kɨ Najaret't adɨn kamd Jeju al

¹ Jeju ɓai lot'n non, aw Najaret't gog, ɓet'n tɔg tit. Ngéndoog loa ĩn nat sia.

² Lon ndɔ taakò asɨ ye, Jeju mba girr ndoo deg kam kuj kawnat lo Juipg. Deg kɨ ngãin ndɨ oon dɔ ta loa ye, ta yad ad elɨn anan: De'n ɗan ngah nyandoo lon ye kokɨɗa a? Terr'n adɨna ye, i terr kɨ titbãi a? Nyag kɨ yaya'n ndɨ ɗa ye, tee kokɨɗa a?

³ De'n ɗan, i sarpentie ye ale? Ngon Mari, ngonkõ Jak kɨ Jose kɨ Jud kɨ Simõ, ngankõa kɨdẽg tube ndan ɓe nat sej nẽbe ale? Oon Jeju nya ga gigt kɨtad, ndɨ adɨna kamd al.

⁴ Jeju eld an: Ngekelta kɨ ta Luwaht a ngah kɔsɨgon kɨ log tube, na kam ɓe koojat kɨ ku noojagt, kɨ deg kɨ kam kujt loa, a ngah kɔsɨgon tit al.

⁵ Ad Jeju ɗa nyag kɨ yaya kam ɓet kɨ Najaret't al, na ndajɨn dɔ ngérotogt madg la ad yootɨn ye.

⁶ Ta ya Jeju dɔ kam kongkongt lod. Kamla Jeju lago nganɓeg tube'n gugɨn dɔ ɓebo kɨ Najaret wom a ndoo deg.

Jeju la ngombankɨlag lon kɨlah gidaijoo

⁷ Jeju kun ngombankɨlag lon kɨlah gidaijoo lad joo joo, ad'd tɔg dɔ ndilgt kɨyerr.

⁸ Na ndad mber an: Ot kunɨn nya mad jisɨt kɨta ɗob, na gɔl kɨɗabe tã. A unɨn nyasa jisɨt al, ke ɓɔl, ke nar kam nya dɔ ɓosɨt al.

⁹ I lan saag njasɨt, na ot kad i lan kub dɔ nat joo.

¹⁰ Jeju eld tɔ an: Lon i teen ɓebot mad, kuj kɨɗen a andɨnt ye, i ndɨnt ro degt'n hɔsɨn kɨ rodt nõbe mbã kad i ɓain ne lot'n non.

¹¹ Na ĩla lot mad deg mbet hɔsɨn kɨ rodt ho, oon dɔ ta losɨ al ho a ne, i ndɔt'n lot'n non kɔ. Lon i ndɨ i ɓain lot'n non a ne, i ndan bu kɨ da njasɨt kɔ. Kɨgo ɗob 'nten la a ɔjɨnd ne kad ɗan nya kɨ majal ye.

¹² Ngéndoog ɓai awɨn lan mber Hoita kɨmaj, elɨn deg kad kɨ tɔrrɨn ndid.

¹³ Ngéndoog tuɓan ndil kɨyerrg ngãibe, yootɨn ngérotog ngãi ho, wurɨnd kɨ yib.

Koi lo Jã kɨ ngeɗa deg baptem deg

¹⁴ Ngar Herod Antipas oo hoi Jeju kɨta tɔ Jeju ko ngãibe. Deg madg ndɨ elɨn anan: I Jã kɨ ngeɗa deg baptem la ɓai lo koit ye, kɨta 'nten la ndin kɨ tɔg kad ɗan nyag kɨ yaya ye.

¹⁵ Na deg madg elɨn tɔ anan: I Eli, kɨmadg tɔ elɨn anan: I ngekelta kɨ ta Luwaht ke kɨkɨɗa ku ngékelta kɨ ta Luwaht kɨ maɗi.

¹⁶ Lon Herod oo dɔ tag'n non ye, an: I Jã kɨ ngeɗa deg baptem kan m'gang dɔa nõ la ɓai lo koit ye.

¹⁷ Herod Antipas ĩ kɨɓe kɨ dɔn la, la deg ad hɔn Jã, dɔnah, na lana dangait ye. Herod ɗa titbe kɨta taa Herodiad kɨ nẽ ngonkõ Pilip.

¹⁸ Kɨtɔ Jã el Herod kɨ nja natnatbe an: I goɗobat al kad i taa nẽ ngonkõi.

¹⁹ Kɨtɔ nya 'nten Herodiad hɔn Jã kamɨnt, ndig kɨ'n tɔla, na ngah ta ɗob al.

²⁰ Kɨtɔ Herod ɓool ndil Jã, na ger kad Jã i de kɨdenesew ho, i de kɨjaɓat tɔ ho, ad Herod ngom Jã maj kam dangait. Lon Herod a oo dɔ ta lo Jã ye, kama a daa ta paa; be kaa ne, roa nela ngãi kad oo dɔ ta loa.

²¹ Na ndɔ mad Herodiad ngah ta ɗob kad'n tɔl Jã. I ndɔ ɗanah kooj Herod, ad Herod ɗa mburr nam kunɨn kɨbog, kɨ bɨradɔg, kɨ kɨrãɗɔɔg lon, kɨ deg kɨbobog kɨ Galilet.

²² Ngon Herodiad kɨdẽ and kam kujt, tee ndom ad ro Herod nela ngãi nat kɨ deg'n ndɨ san nya nat sia, ad ngar el ngon kɨdẽ'n non, an: I ndɨjem nya kɨ kami ndig, na mĩ m'a m'adi.

²³ Ngar un kɔn ada kɨ yokɨnda an: Nya ɗi i ndɨjem kaa ne, m'a m'adi, ke neni i ndɨjem gaj kõɓe lom kaa ne m'a m'adi.

²⁴ Ngon kɨdẽ tee aw ngah kon ndɨjea an: Ka m'kɔ ɗi a? Kõa tura an: I ndɨje dɔ Jã kɨ ngeɗa deg baptem.

²⁵ Ngon kɨdẽ kɨ mand aw kanangbe kɨ ngɔdg ro ngart ela an: M'ndig kad adɨm tajigt ne dɔ Jã kɨ ngeɗa deg baptem kam bugurt.

²⁶ Kam ngar il ngãi, na kɨta yon nda nõ degt ta nyasat ye, asɨ kad mbet nya'n ngon kɨdẽ ndɨjea nõ al.

²⁷ Tajigt, Ngar la asɨgar mad, ndaa mber an: Aw, i gang dɔ Jã kɨ ngeɗa deg baptem i ɗen adɨm.

²⁸ Asɨgar aw gang dɔ Jã kam kuj dangait, ɗe kɨ dɔa kam bugurt ad ngon kɨdẽ'n non, ĩ tɔ taa telɨn ad kon.

²⁹ Lon ngéndoog lo Jã oon hoia ye, ɗe unɨn ruma aw duwɨn ɓenint.

Jeju ad nyasa deg dub mi.

³⁰ Ngombangkɨlag tel kawɨn na kɨ ro Jejut ɔrrɨna hoi kɨlag tube'n ɗan nõ, kɨ nyag'n ndoon deg nõ.

³¹ Jeju eld an: I ɗen gomt so kad jĩ kɨɓe kɨ ndɨ sãi takum degt, lot kɨ de gotot kad i taankò ngonsĩ. Kɨtɔ koosɨdeg ngãibe ndɨ ɗen ho, ndɨ telɨn ho, ad Jeju kɨ ngéndoog lon ngahn kaglo sanya al.

³² Kɨtɔ 'nten awɨn kam toot kad'n ndɨn lot mad kɨ de gotot.

³³ Na deg ngãibe oon god, ndɨ awɨn, ad teen kɨ nganɓeg, ãin ngɔd aw teen kete nõ Jejut kɨ ngéndoog lon.

³⁴ Lon Jeju ndɨ ɗisɨ kam toot kɨ ber ye, oo koosɨdeg, tit ɓut batg'n ngekuld goto, ad ta õ kama kɨtad. Mba girr ndood nyag ngãibe.

³⁵ Na lon kàd ndɨ aw kɨ n'ud ye ngéndoog lo Jeju ndɔt'n kɨ roat, na elɨna anan: Kàd ndɨ ud na lo 'nten, i dɨlalo kɨ de gotot.

³⁶ Ad koosɨdeg awɨn kɨ kam ndɔɔg kɨ nganɓeg'n gugɨn dɔ lo 'nten, nõbe a asɨn kad ndugon nyasad tit.

³⁷ Na Jeju tur ngéndoog lon an: Ĩn kɨɓe kɨ dɔsɨ adɨnd nyasa. Na elɨna anan: I ndig kad j'aw kɨ ndugo kuɓɨr bɨna kɨ asɨ nar ɓujoo la kad kɨ jad'd san yo?

³⁸ Jeju eld an: Bɨna nduj kɨ lɔi i ɓai jisɨt a? Aw i nulɨn oon. Na lon nɔl oon ye, turɨna anan: J'aw kɨ kuɓɨr bɨna mi kɨkanj joo.

³⁹ Kamla, Jeju el ngéndoog lon an: Elɨn deg tube ad'd ndɨn ber kɨ ɓutɓut dɔ mut kɨ mbool.

⁴⁰ Deg ndɨn ber kɨ ɓutaɓuta, kɨmadg ɓu ɓu, na kɨmadg dɔmi dɔmi,

⁴¹ Jeju ɔi kuɓɨr bɨna kɨmi kɨkanj joo. Un kumɨn kɨ dõ dɔrãt, kamla ɗa mersi Luwah, hɔ kuɓɨr bɨna tet ad ngéndoog lon kad luɓon deg, na keg kanj kɨjoo ad deg tube tɔ.

⁴² Deg tube san nya ndenɨn.

⁴³ Ɔin bud kuɓɨr bɨna kɨ bud kanj kɨ nãi, ɗoosɨ keh kɨlah gidaijoo.

⁴⁴ Deg tube'n san kuɓɨr bɨna ye, ĩn dub mi.

Jeju ndia dɔ mant

⁴⁵ Tentenbe Jeju ɔsɨ ngéndoog lon tõtõ, ad alɨn kam toot, ndig kad awɨn kete nont gid baht ko nu, ko kɨ ɓebo Besaidat. Kaglot'n non el koosɨdeg kad tel awɨn lo ndɨdt gog.

⁴⁶ Lon Jeju el deg ad tel awɨn ɓe ye, aw dɔ mbalt kad nelta kɨ Luwah.

⁴⁷ Lon lo ndɨ dub ye, too ndɨ dan bahbot, na Jeju ɗa tɨga dɔningt kɨ kɨɗanbe.

⁴⁸ Jeju oo ngéndoog lon nelɨn too set, ad ɔrrɨn rɔkɨ, kɨta nel ndɨ la kɨ dɔdt kɨ tɔgɨn. Jeju aw rodt, i kàd kɨmita kɨ ta lotit, a ndia dɔ bahbot, ɗa kɨ'n tɔid.

⁴⁹ Na lon ngéndoog loa oona a ndia dɔ baht ye, anan: I mã de mad, ad koon na mbiting.

⁵⁰ Kɨtɔ ĩn tube, lon oona ye, ɓoolɨn ad kamd gang ngalang. Na Jeju eld tajigt an: Iren kamsɨ, i mĩ. Ot ɓoolɨn.

⁵¹ Kamla al kam toot godt, nel kaa ne duba ad ta ya ngéndoog loa kɨ dumbit.

⁵² Kɨtɔ ngéndoog gerɨn girr kuɓɨr bɨna'n Jeju keg deg ad'd san al kɨta kamd kongkong.

Jeju yoot ngemõig kɨ dɔning Jenejaret't

⁵³ Jeju kɨ ngéndoog lon gangɨn bahbo teen kam dɔning Jenejaret't.

⁵⁴ Lon ɗisɨn kam toot ye, deg gerɨn Jeju tajigt.

⁵⁵ Lan go log kɨ dɔning Jenejaret't tube, ad deg oon hoi Jeju kad ndit nõ.

⁵⁶ Kɨ log tube'n Jeju awt ye, ke kam nganɓet, kɨ kam ɓebogt, kɨ kam gawg, deg ɗen kɨ ngérotog kam sukɨgt, na kɔna kad nya ta ɗob ad ngérotog ɔdɨn ta ji kub loa. Deg tube'n ɔdɨna ye, yootɨn dɔ mõigt lod.