Mark 5 - Maktub Ta Kumkajir

Jeju yoot de kɨ ngendil kɨyerr

¹ Jeju kɨ ngéndoog lon ten gid baht ko nu kam dɔningt lo deg kɨ Geraja.

² Lon Jeju ɗisɨ kam toot kɨ ber ye,

³ tentenbe de mad tee ko kɨ dɔɓadgt, de kɨ asɨ dɔa kɨ jinjir goto.

⁴ Kɨtɔ kɨ nja natnatbe dɔn jia kɨ njaa kɨ jinjir ho, lan kag njaat ho, na tuɓa jinjir gang, na tɨnda kag'n lan njaat tet ɗel ɗel; de kɨ asɨ hɔa girr tɔgɨnt ad ndɨ lokɨɗah goto.

⁵ Kɨ kaglo tube, ndɔ ho kàda ho ndaɓe dɔɓagt, kɨ mbɨna mbalgt. Ndɨ ga kɔl, ndɨ rui ron kɨ doo kɨ gaj mbal.

⁶ Lon oo Jeju ko sãi ye, ãi ngɔd kɨ dɔat, ɗe ɔsɨ gojɨn ber nõat, na ko kɨ ndin kɨbo an:

⁷ Jeju Ngon Luwah kɨ Ngetɔitɔi, ɗi gom nat sei a? Un kɔi kɨ yokɨnda kam tɔ Luwaht kad a i ɗa sem nyakɨto al.

⁸ Elta titbe kɨta Jeju ndánga kɨ tɔgɨn an: Ndil kɨyerr, i tee kɔ kam det'n ɗan.

⁹ Jeju ndɨjea an: Tɔi i ɗi a? Tura an: Tɔm i Lejion, ad i koosɨg kɨta jĩ ngãibe.

¹⁰ De kɨ ngendil kɨyerr kɔ kɨ rotĩn kad tuɓad dɔningt'n ɗan al.

¹¹ Lot'n non baaba, ɓut boorg kɨ bɨlan ngãibe ɗan tit nõ, ɗa san nya nderbe kad door lot.

¹² Ndil kɨyerrg kɔn Jeju kɨ rotĩd anan: I laj kɨ ku boorgt'n ɗan ɗan, na adj ta ɗob ad j'and kamdt.

¹³ Jeju nya ta ɗob ad'd. Ndil kɨyerrg teen kam det'n non a kɨ andɨn kam boorgt kɨ asɨn dub joo. Boorg hurɨn ngɔd door lot kɨ hollot, ad tuson kam baht, na oin kam mant.

¹⁴ Ngéngom boorg ãi awɨn ɓebogt kɨ nganɓeg ɔrrɨn hoi nya'n ɗa nya, ad deg tee ɗen kɨ n'oon nya'n ɗa nya nõ.

¹⁵ Ɗe teen ro Jejut, oon de'n maɗi aw kɨ ndil kɨyerrg ye, ndɨ ber, la kub ront, kuma tɨja roi, ad ɓoolɨn ho, ndadɨn ho.

¹⁶ Ĩgɨn oon nyag tube'n ɗa nya ye, ɔrrɨn hoi nya'n ɗa de kɨ ngendil kɨyerrg, kɨ boorg nõ.

¹⁷ Taa ne, deg mbã girr kɔ Jeju kɨ rotĩd kad nya dɔning lod kɔ.

¹⁸ Jeju al kam toot. De kɨ maɗi ndɨ kɨ ndil kɨyerrg ye, ndɨjea an: Ĩla i ndig loi a ne, ad m'aw sei.

¹⁹ Jeju ndig dɔt sia al, na ela an: I tel aw ɓe loi, kɨ ro noojigt, ɔrrd hoi nyag kɨbobo'n Luwah ɗa kɨtatɔi ke titbãi oon kumi kɨ lotondot.

²⁰ De'n non tɔi aw, mba girr la mber hoita nyag tube'n Jeju ɗa kɨtatɔa kam dɔningt kɨ ɓebog loa ĩn kɨlah, ad ta ya deg tube.

Jeju yoot dekɨdẽ ho ad kumkajir ngon Jairus kɨdẽ ho.

²¹ Lon Jeju tel gang bah gog gid ko mad ye, koosɨdeg kawɨn na kɨ dɔat. Jeju ɗa ta baht.

²² Kamla de mad, kɨbo kam kuj kawnat lo Juipg tɔa i Jairus ɗe ro Jejut, lon oo Jeju ye, so kɨ ber nõat,

²³ kɔa kɨ rotĩn an: Ngonɨm kɨdẽ kɨdu to takoit: M'kɔi kad aw i nda jii dɔat, kad yoot ho, kɨ ndɨ kɨ dɔn dõ ho.

²⁴ Jeju aw sia nat, koosɨdeg ngãibe ndulon goa, deg rumbon na mbã rumbon ne Jeju.

²⁵ Ku koosɨdegt nõ, dekɨdẽ mad ɗat nõ, mosɨ ũa ɓal kɨlah gidaijoo.

²⁶ Dekɨdẽ'n non, ngahkõ ngãi ji ngékĩgt ngãibe, tɨnda nar lon tube tĩ, be kaa ne, roa to soot al bat, na mõi loa ndɔt kɨ ketekete.

²⁷ Lon dekɨdẽ'n non oo hoi Jeju ye, ɗe and ku degt ɗa ko gid Jejut, kamla la jin ɔdɨn kub loa.

²⁸ Kɨtɔ gaa kamɨnt an: Ke ĩla m'ɔd kub loa ta kɔd kaa ne, m'a m'yoot.

²⁹ Tajigt, lon la jin ɔdɨn Jeju ye, mosɨ duba ta kũa. Ad ger kam dãront kad n'yoot dɔ mõit'n ɗan nõ.

³⁰ Na Jeju ger kad tɔg tee kam ront, ad tur ron kɨ ro koosɨdegt ndɨjed ta an: Nõ ɔd kub lom a?

³¹ Ngéndoog loa turɨna anan: I ger maj, kad koosɨdeg'n gugɨn dɔi la ɗa rumboin ye, ɗa titbãi hã an: Nõ ɔdi a?

³² Na Jeju nɔl lo mbet't kɨ n'oo de'n ɗa nya nõ.

³³ Ad ɓool tɔl dekɨdẽ nõ sɔkɨr, roa ndad yatɨt, kɨta ger nya'n ɗa nya nõ ɓet, tɔi so ber kɨ nja Jejut, ela nya'n ɗa nõ je.

³⁴ Jeju ela an: Ngonɨm kɨdẽ, kadkam Luwah loi aji, aw kɨ kam kɨsokɨber, ĩ kɨ yoot dɔ mõit'n ɗai nõ.

³⁵ Na kaglot'n Jeju ɗa eltat, deg madg ɓain ɓe lo Jairus ɗe elɨna anan: Ngoni kɨdẽ oi woi, kɨtɔɗi i ɗa i ndan ngendoo deg dɨlalot a?

³⁶ Na Jeju nda kumɨn go tagt lod al, na el kɨbo lo kuj kawna lo Juipg an: Ot ɓool nya mad, na i ndahkami dɔ Luwaht kɨɗabe koon.

³⁷ Na Jeju nya de mad ad aw sen al, na Pierr kɨ Jak, kɨ Jã kɨ ngonkõ Jak tã.

³⁸ Aw teen ɓe lo Jairus, deg kɨsen mbiting. Jeju oo deg ndɨ non ngãi, ndɨ udɨn wi ngãibe tɔ.

³⁹ Jeju and kam kujt na eld an: Kɨtɔɗi i ndi kɨsen ne titbe a? Kɨtɔɗi i ndɨ nõ ne titbe tɔ a? Ngon oi al, na to ɓi ta ɓi.

⁴⁰ Deg gon Jeju raka. Jeju ad deg tube teen kɨ tɨga, un bɔw ngon kɨ kõ ngon nat kɨ ngéndoog lon mɨta; kamla and kam kujt'n ngon kɨdẽ tot.

⁴¹ Jeju hɔ ji ngon kɨdẽ unan kɨ dõ, na el an: Talita kumi. Girra i titbe Ngon kɨdẽ m'ndɨ m'eli m'an i ɓai dõ.

⁴² Ngon kɨdẽ ɓai dõ tajigt mba girr ɓaning kɨta ɓala asɨ kɨlah gidaijoo. Deg tube'n ɗan loat nõ, ta yad biw.

⁴³ Na Jeju ndad mber kɨ tɔgɨn kɨ de mad elta dɔ nyat'n ɗa nya nõ al. Kamla eld an adɨna nya ad sa.