Mark 4 - Maktub Ta Kumkajir

Terrta lo ngedubnya

¹ Jeju mba girr ndoo deg gog tɔ, i ta bahbot. Bakad koosɨdeg ngãibe kawɨn na kɨ dɔat. Kɨtɔ 'nten Jeju al kam toot'n ndɨ dɔ baht, ndɨ ber kam toot. Koosɨdeg tube ndɨn ber ta baht.

² Jeju ndoo deg nyag ngãibe kɨ terrtag kɨ nyakɔjg kɨ dang dang. Kam nyandoot loa'n ndood ye, eld an: I nelɨn mbisɨ.

³ Oon, de mad aw kam ndɔɔt kɨ'n duw nya.

⁴ Na lon ɗa duw nya ye, kum nyag tuson ber kɨgo ɗob, ad yelg ɗe õn.

⁵ Kum nya madg tuson dɔningt kɨ ngang kongkong, lot'n nanga i ngãi al, ad kum nyag ɓan tentenbe kɨta nang kɨwo kɨɓing goto,

⁶ na lon kàd ɓai kɨ dõ, na ɔsɨ ngãi ye, gad ad ndulon mbaw, kamla tutɨn kɨta ngɨrad aw ber ngãi al.

⁷ Ndeg kum nya madg tɔ tuson kam kongt; kong'n non tɔgɨn, ɔgɨn dɔ kum nyag'n tuson kad ɓain kɨ dõ, kad teen kɨ kand'd.

⁸ Kum nya madg tuson dɔningt kɨmaj, ɓan maj ho, tɔgɨn ho kamla teen kɨ kand'd. Kɨmadg andɨn dɔmɨta, kɨmadg andɨn dɔ kɨbojidet, kɨmadg ɓu.

⁹ Kamla Jeju elta an: De'n ndɨ kɨ mbin kɨta koo dɔ a ne, sumba kad oo dɔ.

Kɨtɔɗi Jeju ndoo nya deg kɨ terrtag

¹⁰ Lon Jeju i kɨ kɨɗanbe ye, ngombangkɨlag kɨkɨlah gidaijoo kɨ deg'n ĩn nat sia, ndɨjena kad ɔrr girr terrtag kad n'oon.

¹¹ Jeju turd an: Ĩn la Luwah adsɨ kad i gerɨn ta kɨmund lo kõɓe lon ye, na ĩgɨn ĩn kɨ tɨga ye, a oon dɔ nyag tube kɨ terrtag.

¹² I titbe la, awɨn kɨ kum kɨta koo lo, na a oon lo jeje al. Awɨn kɨ mbi kɨta koo dɔ ta, na gerɨn girr ta al. Na ɓeta gerɨn girra a ne, telɨn kɨ ro Luwaht ad nyàgo majalg lod kɔ.

Jeju ɔrr girr terrta lo ngeduw kum nya

¹³ Kamla Jeju eld an: Ĩla i gerɨn girr terrta lo ngeduw nya al, a i ɗan titbãi kad i gerɨn girr terrtag kɨ ɔj dɔ kõɓe lo Luwah a?

¹⁴ De kɨ ngedubnya ye, ɗa dub ta lo Luwah.

¹⁵ Kum nya madg tuson go ɗobt, ɗob'n non ɔj go deg'n oon dɔ ta lo Luwah. Na tentenbe Sɨtan ɗe taa ta'n duwɨn ngarkamdt nõ kɔ.

¹⁶ Titbe tɔ la kum nya madg'n tuson dɔningt kɨ kongkong, ɔj go deg'n hã oon dɔ ta lo Luwah, na taan kɨ ronel,

¹⁷ na ta lo Luwah hɔ ngɨran kamdt al, ad ɗan bijir al, na lon kamkɔl tee dɔdt, ke lon ndɨ dan kumd ndo kɨta ta lo Luwah a ne; tajigt a mbetɨn kadkamd Luwah.

¹⁸ Kum nya madg'n tuson mbɨna kongt ye, ɔj go deg'n ndɨ oon dɔ ta lo Luwah.

¹⁹ Na ndɨ soolɨn kɨta nyag kɨ duniat, ndɨ sahn nyag kɨ duniat, ndi sahn nyamajg kɨ tit, nyurkõg kɨ dang dang ndɨ andɨn kamdt ad ɔg dɔ ta lo Luwah kad tee kɨ kandɨn.

²⁰ Kum nya madg taa ne, tuson dɔningt kɨmaj. Dɔning kɨmaj ye, ɔj go deg'n oon dɔ ta lo Luwah, na taan; teen kɨ kand'd: kɨmad tee kɨ kandɨn dɔmɨta, kɨmad tee kɨ kandɨn dɔkɨbojidet, kɨmad ɓu.

Terrta kɨ dɔ lambat

²¹ Jeju ndɨjed tɔ an: Lon de a ɗe kɨ horr lamba ye, a ndaa girr ngo tɔrr nyat a? Ke girr kag tɨrat? I be al, na a ndaa dɔ kag nda lambat tã.

²² Ad nya mad kɨ lo yarot goto, na nyag tube a ton kɨ tɨga doo takum degt; nya mad kɨ lo mundt kaa ne goto, na a i kɨ tee kɨ dɔ.

²³ De'n ndɨ kɨ mbin kɨta koo dɔ a ne, kɨ oo dɔ.

²⁴ Jeju eld tɔ an: Oon go rosɨ maj dɔ nyat'n oon dɔ kad ɔrrɨn m'ainya, kɨ ngo tɔrr nya'n i ndɨ i tɔrrɨn ne adɨn deg la, a tɔrrɨn ne adsɨn ho ye; a adsɨn kɨ dɔtdɔt tɔ.

²⁵ Kɨtɔ de'n ndɨ kɨ nya a ne, a adɨna kɨ dɔt. Na de'n ndɨ kɨ nya al a ne, nya tube'n ndɨn nõ kaa ne, ɓet a taana.

Terrta dɔ kum nyat kɨ ɓa

²⁶ Jeju el terrta mad tɔ an: Kõɓe lo Luwah i tit kɨ de'n un kum nya, aw dub kam ndɔɔt lon.

²⁷ Kamla tel aw ɓi ndɔ, na ɓai kàda kɨndɔgndɔg, kaglot'n non kum nya'n dub ɓa ho tɔg ho kanj kad de kɨ ngeduw nya ger go ke titbãi kum nya ɓan ho tɔgɨn ho.

²⁸ Dɔning ĩ kɨɓe la ad kum nya ɓa; kɨdasa i ngora, kamla tɔg, ya ɓɔl, goot a ne, ooj na dɔa mbuj.

²⁹ Na lon nyako mbuj woi ye, de kɨ ngeduw nya ɗe kɨ ngorong jan nyako, kɨta dɔnaha asɨ woi.

Terrta dɔ kum mutardt

³⁰ Jeju el terrta mad tɔ an: Kɨ ɗi j'asɨ kad kɨ dan kõɓe lo Luwah a? Ke terrta kɨ titbãi j'a kɨ j'el kɨ dan kõɓe lo Luwah tɔ a?

³¹ Kõɓe lo Luwah i tit kɨ kum mutard, i kum nya kɨ du tɔi kum nyag tube kɨ kam dɔningt, na lon duwɨn ningt ye,

³² a ɓa, kamla tɔg, tɔi mbikamg tube, na tɔɔ bajin kɨbobo ad yelg kɨ dõ, ɗe ɗan kujg lod tit ho, hɔn lo ndɨ ndilat ho.

³³ Jeju ndoo deg ta lo Luwah, ndood kɨgo ɗob terrtag kɨ dang dang kad deg asɨn ger girr ta lo Luwah.

³⁴ Ndoo deg kɨ ndɔgbe kɨ terrta. Na lon i kɨ kɨɗanbe kɨ ngéndoog lon, kamtã la a ɔrrd girra ad gerɨn maj ye.

Jeju ad nélbarwãi to lom

³⁵ Kam ndɔat nõ, lokɨsɔle, Jeju el ngéndoog lon an: Ad kɨ gangɨn bahbo gid ko nu.

³⁶ Nyan koosɨdeg nõbe, ngéndoog loa alɨn kam toot goat, kamla tɔi awɨn gid baht ko mad, too madg ĩn nat sed nõ ho.

³⁷ Nélbarwãi kɨbobe ɓai dɔ baht, ad hul man ɓai ɔsɨ pɨkapɨka, ad man mba girr ɗoosɨ too.

³⁸ Jeju to ɓong toot to ɓi, laa dɔn kɨ nya laa dɔ. Ngéndoog loa ndoolɨna, na elɨna anan: Ngéj tamj ndɨ tĩ ye, a i tur go al a?

³⁹ Jeju ndool, ndáng nélbarwãi, na el bahbo an: I to lom, i to goi mbo. Kɨtajigt nél duba, kamla lo to nding kɨ dumbit.

⁴⁰ Jeju el ngéndoog lon an: Kɨtɔɗi adɨn kamsɨ gangɨn man titbe a? Mbã tajigla kaa ne, kadkam kɨ jeje losɨ goto ɓaitɔ ɔ?

⁴¹ Ɓool tɔl ngéndoog loa sɔkɨr, ad elɨn na anan: De'n ndɨn ye, i nõ a? Mbã nélbarwãi kɨ bahbo ndɨ telɨn rod go tat loa.