Mark 10 - Maktub Ta Kumkajir

Jeju ndoo deg kad tuɓan nẽdg al

¹ Jeju ɓai nõbe, aw dɔningt kɨ Jude, kɨ gid bah Jurdẽt ko nu; koosɨdeg tel kawɨn na kɨ roat gog. Jeju mba girr ndood gog tit'n ndɨ ndoond maɗi nõ.

² Parisɨg ndɔt'n kɨ roat, ndɨjena ta anan: I goɗobat kad de tuɓa nẽn e? Ndɨjen ta titbe kad'n yan ne gum Jeju.

³ Jeju turd an: Mberkɨnda'n Moij ndang adsɨ ye, el an ɗi a?

⁴ Turɨna anan: Moij nya ta ɗob ad de'n ndig tuɓa nẽn a ne, kɨ ndang maktub tuɓa ada.

⁵ Jeju turd an: Moij ndang mberkɨnda 'nten adsɨ kɨta ngarkamsɨ kɨ kongkong.

⁶ Na: lo yaɓoodat nu, lon Luwah ndah dɔning ye, Luwah ɗa dekɨdɨngã kɨ dekɨdẽ.

⁷ Kɨtɔ 'nten dekɨdɨngã a nya bɔwɨn kɨ kon, kad'n tĩnyan na kɨ nẽn;

⁸ ĩn tujoo a telɨn dãro kɨkɨɗa. Titbe labekɨnõt ĩn joo al ta, na ĩn dãro kɨkɨɗa.

⁹ Nya'n Luwah dɔnat ye, maj kad de tut al.

¹⁰ Lon tel ɗen kam kujt gog, ngéndoog loa ndɨjena tag ngãi ɓaitɔ.

¹¹ Jeju eld an: Ĩla de mad tuɓa nẽn, na taa dekɨdẽ mad kɨɗang a ne, ndɨ ɗaa ngaw ta ɗa koon.

¹² Na ĩla dekɨdẽ nya ngawɨn, na aw taa dekɨdɨngã mad kɨɗang a ne, dekɨdẽ'n non ndɨ sah ngaw ta sah.

Jeju njang dɔ ngan kɨɗoig

¹³ Deg ɗen kɨ ngan kɨɗoig ro Jejut kad ɔd'd kɨ jin. Na ngéndoog loa kɔlɨn kɨ deg'n non ngãi.

¹⁴ Lon Jeju oo nya'n ngéndoog lon ɗan ye, ɓawong ngãi ad eld an: I nyan ngan kɨɗoig ad'd ɗen kɨ romt, ot kɔgɨnd dɔ, kɨta kõɓe lo Luwah i lo deg kɨ titbe.

¹⁵ Rota m'ndɨ m'elsɨ kɨ tɨga wakɨsɨ: dekɨɗen taa kõɓe lo Luwah tit lo ngan kɨɗoig al a ne, a and kamt al bat.

¹⁶ Kamla Jeju kui ngan kɨɗoig kɨ ront, na ndah jin dɔdt njangɨn dɔd tɔ.

Ta lo Jeju kɨ de kɨ ngenya

¹⁷ Kaglo'n Jeju ndig kɨ n'aw ye, de mad ɗe kɨ ngɔd, ɔsɨ gojɨn ber nõat, na ndɨjea an: Ngendoo deg kɨmaj. Ɗi sumba kad m'ɗa kɨ m'ngan kumkajir kɨ mbãkɨnõt a?

¹⁸ Jeju ndɨjea an: Kɨtɔɗi i kunmɨn de kɨmaj a? De kɨmaj goto, na Luwah kɨɗabe tã.

¹⁹ I ger mberkɨndag: a i tɔl de al. A i sah ngaw ke dekɨdẽ al. A i ɓog al bat. A i manaj kɨ ngom dɔ madɓeit al. Ɔsɨgon bɔwi kɨ kõi.

²⁰ De kɨ ngenya ela an: Ngendoo deg, m'tel rom go nyagt'n non tube lon mĩn kɨ basam ɓaitɔ.

²¹ Jeju urr kumɨn kɨ dɔat, ta õ kama kɨtatɔa, na ela an: Nya kɨɗa la dui ye, aw i ɗaw nyag loi tube, na ad nara ngéndog a ne, ɓet a i ngah nyamajg kɨ kam dɔrãt; kamla, i ɗe i ndulo gom.

²² Na lon de kɨ ngenya oo ta 'nten ye, ɗa kamkil, ad takuma hɔndo, kɨta nyangah loa i ngãi.

²³ Jeju nɔl ngéndoog lon'n gugɨn dɔn, na eld an: Ngang ngãi kɨta ngényamajg kad andɨn kam kõɓet lo Luwah.

²⁴ Ta ya ngéndoog loa ngãi dɔ tat 'nten ad Jeju tel eld an: Nganɨm, lo gang lam kɨta deg'n ndɨ ɓan kul nyamajg lod kad andɨn kõɓet lo Luwah.

²⁵ Õ al kad lukum and ta bulo libirt tɔi kad ngemaj and kam kõɓet lo Luwah.

²⁶ Ta ya ngéndoog loa kɨ tɔi takɔl, ad ndɨjena anan: Ĩla i titbe ye, nõ asɨ ngah kaj a?

²⁷ Jeju nɔld mbet't kamla eld an: ko ro degt, nyan 'nten i root al, na ro Luwaht taa ne, nyag tube i root.

²⁸ Nõbe Pierr mbagɨr kela kan: Oo, kɨ mbet nyag tube, kad kɨ ndulo goi.

²⁹ Jeju tur an: Rota la m'ndɨ m'elsɨ ye: Dekɨɗen nya kuj lon, ngankõn kɨdɨngã kɨ kɨdẽ, kɨ kon, kɨ bɔw, kɨ nganɨn, kɨ ndɔɔg lon kɨtatɔm kɨta Hoita kɨmaj,

³⁰ de'n non a ngah nya dɔt nja ɓu tajigla kam koht'n ɗan ad a ngah kujg, ngankõn kɨdɨngãg kɨ kɨdẽg kɨ bɔwg, kɨ kõg, kɨ ngang, kɨ ndɔɔg nat kɨ darondo tɔ. Na kam koht'n a ɗe a ngah kumkajir kɨ mbãkɨnõt.

³¹ Na deg kɨdasa ngãibe a telɨn deg kɨ dɔboit. Na deg kɨ dɔboit ngãibe a telɨn kɨdasa.

Jeju elta dɔ koint kɨ ɓain lo koit

³² Jeju i dɔɗobt kɨ deg'n a ndulon goa, ndɨ awɨn kɨ Jerusalem. Jeju ndia nõdt kete, kam ngéndoog loa dad ta paa, ĩgɨn ĩn nat sia ye, ɓoolɨn ho. Jeju tel kun ngombangkɨlag lon kɨkɨlah gidaijoo kɨ ront gog kad'n neld ta. Mbagɨr keld ta dɔ nyat'n ɓet a tee dɔnt.

³³ Oon, ndɨ kɨ j'aw Jerusalemt: ɓet a lan Ngon de ji kɨbogt lo ngéjanyamosɨkadkari, kɨ ngéndang maktub, a gangɨn ta koi dɔat, a lana ji girrdegt kɨ gerɨn Luwah al.

³⁴ Deg'n non a gona, a tuwɨn horr tad dɔat, a ndana kɨ ndeh, kamla a tɔlɨna. Na go ndɔt kɨkõmɨta a ne, a ɓai ku ngékoit.

Ĩla de mad ndig kɨ nĩ kɨbo a ne, maj kad tel ngekɨlaɓer

³⁵ Kamla Jak kɨ Jã, ngan Jebede ndɔt'n kɨ ro Jejut elɨn anan: Ngendooj, kɨ ndig kad kɨ ndɨjei nya mad na kɨ kɔi kad i ndig dɔt sej.

³⁶ Jeju eld an: Ɗi i ndigɨn kad m'ɗa m'adsɨ a?

³⁷ Turɨna anan: Lon a i ndɨ dɔ pong kõɓet loi ye, kɨ kɔi kad adj ta ɗob kad kɨ de mad ndɨ ko jikõit, na mad ndɨ ko jigelit ho.

³⁸ Jeju eld an: I gerɨn nyan i ndɨ kɔ'n nõ al. Asɨn kãi kop kõ kɨ ngaht'n ɓet m'a m'ãi nõ õ? Ke asɨn ɗa baptem kamkõt kɨ ngah tit'n ɓet a ɗamɨn ne ye ho oo?

³⁹ Turɨna anan: J'asɨ ɗa nya nõ. Jeju eld an: Rota, a ãin kam kopt'n ɓet m'a m'ãit nõ; na a ɗasɨn baptem kamkõt tit mĩ tɔ ho.

⁴⁰ Na ndɨ dɔ ji kõmt ke dɔ ji gelɨmt, i ta lom al, kad mad de; na i Luwah la ɗago log'n non kete woi, kɨta deg'n ɓet a ad'd.

⁴¹ Lon ndeg ngéndoog kɨkɨlah oon dɔ ta 'nten ye, ɓan wong kɨ tɨngabil kɨ Jak kɨ Jã.

⁴² Na Jeju kund kɨ ront, kamla eld an: I gerɨn maj, ta kad deg'n ndand kad õnɓe dɔ girrdegt kɨ dang dang ye, ndɨ ɗan ngar dɔdt kɨ lo ngetɔgt, na kɨbog lod ndɨ lan dɔ deg girr tɔgdt tɔ.

⁴³ Na ĩn taa ne, i titbe kusɨt al, ĩla de mad kusɨt ndig kad nĩ kɨbo a ne, sumba kad tel ngon ngekɨla losɨ.

⁴⁴ De'n ndig kɨ nĩ kɨbo tɔi kusɨt a ne, maj kad ɗa kɨlaɓer losɨ tube.

⁴⁵ Kɨtɔ Ngon de ɗe kam dɔningt kɨtakad deg ɗan kɨlaɓer adnɨn al, na ɗe kad kɨ'n ɗa kɨlaɓer n'ad deg ho, kɨ n'ad ron nyabadɔt kad'n bandɔ deg ngãibe hɔ.

Jeju yoot mundo'n tɔa i Bartime ad oo lo.

⁴⁶ Jeju kɨ ngéndoog lon aw teen Jerikot, kamla tel teen kam ɓe Jerikot, sed ngéndoog lon kɨ koosɨdeg ye, mundo mad kɨ tɔa i Bartime ngon Time, ndɨ bɔg ɗobt ndɨ kɔ nya.

⁴⁷ Lon oo dɔ kad i Jeju kɨ Najaret't la ndɨ tɔi ye, ga tan kot kɨ ndin kɨbo an: Jeju, Ngon Dabid oo kumtondo lom.

⁴⁸ Deg ngãibe ndángɨna kad ndɨ tan mbo. Na mundo ɗa ko par par kɨ tɔgɨn an: Ngon Dabid, oo kumtondo lom.

⁴⁹ Jeju duba na el an: I kunɨna so. Deg kunɨn mundo na elɨna anan: I hɔtɔgiba. I ɓai dõ, ɗa kuni.

⁵⁰ Mundo tĩnya kub lon kɔ, na ɓai ɗat aw Kanag ro Jejut.

⁵¹ Jeju ndɨjea an: Ɗi i ndig kad m'ɗa m'adi a? Mundo tura an: Ngendoodeg, m'ndig kad m'oo lo.

⁵² Jeju ela an: Aw lo loi; kadkam loi aji. Na mundo ngah koo lo, na ndulo go Jeju.