Hoita kɨmaj lo Jeju Krist'n Luk ndang 2 - Maktub Ta Kumkajir

Kooj Jeju

¹ Kam ndɔgt'n non mber tee kokɨro Sejar Ogust't, kɨ ndahn tɔ deg ngéndɨ dɔningt tube kam maktub dakɔr degt.

² Ndah tɔ deg kam maktub dakɔr degt kɨ dasabang 'nten i kam kaglot'n Kirinius i ngekõɓe dɔ dɔning Sirit.

³ Deg tube awɨn kad kɨ ndahn tɔd maktub dakɔr degt, dekɨɗen aw ɓe koojɨnt.

⁴ Jojep kaa, ɓai ɓe Najaret't kɨ dɔning Galilet, aw ɓe lo Dabid ho, ɓe nõ tɔa i Betlehem, kam dɔning Judet, kɨta Jojep i de kɨ girrkooj Dabidt.

⁵ Aw kɨtakad'n ndah tɔn kam maktub dakɔr degt nat kɨ Mari'n hɔ dɔa, ndan ngon kama tɔg.

⁶ Lon ĩn nu ye, ndɔ Mari asɨ kad ooj ngon,

⁷ la ooj ngonderɨn, ɓira kɨ kub, laa kam sund sanya mangt, kɨta lo ndɨd goto kam kuj ɓi mbahgt.

Ta lo ngékulbatg kɨ malaikag

⁸ Ngéngombatg ndɨn dɔningt kɨ nderbe kɨ kad lot'n non, ton tɨga kam gawgt, to ngomɨn ɓut batg lod ndɔ.

⁹ Oon Malaika lo Bɨraɓe tee hɔi kɨ rodt. Kunj Bɨraɓe kɨ ɗangereng ɔsɨ gug dɔd, ɓool tɔld sɔkɨr.

¹⁰ Na Malaika eld an: Ot ɓoolɨn, oon. M'ɗe kɨ hoita kɨmaj, kɨ ronel m'adsɨ, kɨ a ad deg ngãibe ronel ho.

¹¹ Ɓone, kam ɓet lo Dabid, dekɨdẽ ooj ngekaj adsɨ, ĩ la i Krist kɨ Bɨraɓe ye.

¹² Nyakɔj mad kad i gerɨn ne la ten: A i ngahn ngon kɨ kasɨ mad kɨ ɓir kɨ kub, kɨ to kam sund sanya mangt mad.

¹³ Tentenbe koosɨ Malaikag kɨ dɔrãt dõ teen hɔi nat kɨ Malaika'n non, ɗa ndubɨn Luwah anan:

¹⁴ Kɔsɨgon kɨ dɔ Luwaht kam logt kɨ dõ. Kam kɨsokɨber kɨ dɔ dɔningt ku degt ngeɗa nyag'n nelɨna.

Ngéngombatg awɨn Betlehemt

¹⁵ Lon Malaikag nyand, na tel awɨn dõ dɔrãt gog ye, ngéngombatg elɨn na anan: Ad kɨ j'awɨn Betlehemt kad j'oo nyan ɗa nya nõ, ĩn Bɨraɓe ad kɨ ger.

¹⁶ Taa ne, awɨn kanangbe, ngahn Mari kɨ Jojep kɨ ngon kɨ kasɨ'n non to kam sund sanya mangt,

¹⁷ lon oona woi ye, ɔrrɨn hoita'n elɨnd dan ne dɔ ngon kɨ kasɨ'n non.

¹⁸ Deg tube'n oon dɔ ye, ta yad dɔ nyagt'n ngéngombatg elɨnd.

¹⁹ Na Mari ngom nyag 'nten kamɨnt, ga kamɨn dɔt.

²⁰ Ngéngombatg tel awɨn gog, a ɔsɨngon Luwah, a ndubɨna kɨta nyag tube'n oon dɔ kɨ ĩgɨn oon kɨ kumd tit'n elɨnd ne nõ.

Ndahn tɔ Jeju

²¹ Lon ndɔ jijoo asɨ woi kad jana gaj ye, ndahn tɔa Jeju ad i tɔ kɨ Malaika ooj kete lon kõa ndana al ɓaitɔ.

Jojep kɨ Mari awɨn kɨ Jeju kam kuj ndub Luwaht

²² Lon ndɔ asɨ kad telɨn ngon kɨ kart kɨgo mberkɨndat lo Moij ye, Jojep kɨ Mari awɨn sia ɓebot kɨ Jerusalem kɨ'n dana Bɨraɓe.

²³ Ndangɨn titbe kam tat lo Bɨraɓe ke ngonderr kɨdɨngã kɨɗen kɨ tee kam kõnt dasa a ne, a kunɨna nya kɨ ndah kɔtko kɨɗa kɨta Bɨraɓe.

²⁴ Awɨn kɨtakad lan kadkari kɨjakɔ, ad i derrngɔt joo, ke derrkul joo, kɨgo tat'n elɨn kam tat lo Bɨraɓe.

²⁵ De mad ndɨ ɓebo Jerusalemt, tɔa i Simeõ. De'n non i de kɨdenesew, nyaɗaa i kɨgo lo Luwaht, ndɨ ngoo ngeɗa kɨ girrdeg kɨ Israel keɗengẽ; Ndil Kɨkunjɗang i dɔat ho.

²⁶ Ndil Luwah ɔja ada ger kad a oi al, mbã kad a oo Krist'n i Bɨraɓe loa kamtã la a oi ye.

²⁷ Ndil Kɨkunjɗang ɔsa ad and kam kunj ndub Luwaht. Lon ngékooj Jeju ɗen sia kam kuj ndub Luwaht kɨ n'ɗan nyabelɓe kɨgo mberkɨndat ye,

²⁸ Simeõ taa ngon kɨ jint, ndub Luwah an:

²⁹ Tajigla, ad ɓer loi aw kɨ kam kɨsokɨber kɨgo tat loi,

³⁰ kɨta kum oo kaj loi,

³¹ kɨ i ɗago woi, nõ girrdegt tube,

³² ad i kunj kɨ unj dɔ girrdegt kɨ dang dang, i nyakɔsɨgon lo deg loi Israel tɔ.

Simeõ elta kɨ ta Luwaht dan dɔ Jeju

³³ Ta'n Simeõ el dɔ Jejut ya bɔwa kɨ kõa biw.

³⁴ Simeõ njang dɔd; el kõa Mari an: Luwah kɔt ngon'n ɗan kad i ngekad deg ngãibe son, kɨ i ngekad deg ngãibe ɓain dõ dan Israelgt. A i nyakɔj lo Luwah, na deg a ndoorɨna.

³⁵ Luwah kɔta kɨtakad i ngekɨja tagah kɨ ngarkam degt ngãibe kɨ tɨga ho. Na ĩ, Mari, kamkil a ɔsɨ roi mbut tit ninga be.

Ngekelta kɨ ta Luwaht An

³⁶ Dekɨdẽ mad ngekelta kɨ ta Luwaht ndɨ nõ ho, tɔa i An ngon Panuel, kɨ girrkooj Ajert, tel bɨga bugum. Ndɨ nat kɨ ngawɨn ɓal tanãimɨta go ɓa mandat.

³⁷ Kamla i buwa, asɨ ɓal dɔjijoo gidaisɔɔ. An'n non nya kuj ndub Luwah al bat, ndɨ ɗa kɨla ndub Luwah ndɔ ho kada ho, ndɨ ɔg ron nyasa, na ndɨ elta kɨ Luwah,

³⁸ ĩ kaa ɗe dɔkàdt kɨ kɨɗa'n non, a ndub Luwah, a elta lo ngon'n non mbi degt tube, ĩgɨn ndɨ ngoon kad Luwah aj ɓebo Jerusalem.

Tel awɨn gog ɓe lod Najaret

³⁹ Lon tɔlɨn kon nyag tube kɨgo Mberkɨndat lo Bɨraɓe ye, Jojep kɨ Mari telɨn kɨ dɔning Galilet gog awɨn ɓe lod Najaret.

⁴⁰ Ngon asɨ kɨ dõ, ɗoosɨ kɨ terr, majkurr lo Luwah i dɔat.

Jeju i kam kuj ndub Luwaht lon ɓala i kɨlah gidaijoo

⁴¹ Ɓal kɨɗen kaa bɔwa kɨ kõa a awɨn ɓebo Jerusalemt kɨ ndɔ ɗa nah Pakɨ.

⁴² Lon ɓal Jeju i kɨlah gidaijoo ye, awɨn Jerusalemt kɨgo nyabelɓet lo Juipg kɨta ɗa nah Pakɨ.

⁴³ Lon ndɔg tɨgan woi, ad ngékooj Jeju ndɨ telɨn gog kɨ ɓe ye, ngond Jeju nãi gog kam ɓebot kɨ Jerusalem. Na bɔwa kɨ kõa gerɨn al.

⁴⁴ Oon anan i kɨna ɓut degt lod, ad sahna ndɔ kɨɗa ro noojdgt.

⁴⁵ Lon ngahna al ye, tel awɨn ɓebo Jerusalemt gog, a sahna.

⁴⁶ Lon ɗan ndɔ mɨta woi ye, ngahna kam kuj ndub Luwaht ndɨ ber dan ngéndoo degt, ndɨ oo dɔ ta lod, ndɨ ndɨjed tag ho.

⁴⁷ Deg tube'n oon dɔ ta loa ye, ta yad dɔ goosɨt loa, kɨ tag'n ndɨ turd.

⁴⁸ Lon bɔwa kɨ kõa oona ye, ta yad biw ad kõa ela an: Ngonɨm, kɨtɔɗi i ɗan sej titbe a? Oo, bɔwi kɨ mĩ kɨ sahi kɨ kamkil.

⁴⁹ Eld an: Kɨtɔɗi a i sahmɨn ne a? I gerɨn maj kad m'oo go nyag lo Bɔwm ale?

⁵⁰ Na ngékoojag gerɨn girr ta'n eld nõ al.

⁵¹ Kamla ɓai so godt, aw Najaret, a tel ron go tat lod. Kõa tɔ ngom nyag 'nten tube ngarkamɨnt.

⁵² Na Jeju tɔg, terr loa to kɨ tɨga ad nel Luwah ho, nel deg ho.