Ester 9 - Maktub Ta Kumkajir

Juipg tɔlɨn madngétadg

¹ Nah kɨ kõkɨlah gidaijoo, ad i nah Adar, kɨ ndɔ kɨ kõkɨlah gidaimɨta, ndɔ'n non nãi nderbe kad tɔlɨn kon mberkɨnda lo ngar. Ndɔt'n non madngéta Juipg ndan kamdt kad n'a n'tetɨn ɗɔɔ, na tel ngan kodang ad Juipg tetɨn ɗɔɔ ngéndordg.

² Juipg kawɨn na kam ɓebogt lod kɨ nusɨ dɔninggt tube lo ngar Asuerus kad ndan jid dɔ degt kɨ ngesah nujdt. De kɨ asɨ taa ɗɔɔ Juipg goto kɨta ɓoolɨn Juipg ngãi.

³ Mbaiɓeg kɨ nusɨ dɔninggt, kɨ Prepeg, kɨ ngékõɓeg, kɨ ngeɗakɨlag lo ngar dĩn Juipg kɨta ɓoolɨn Mardoke ngãi,

⁴ kɨta Mardoke tel de kɨbo kam kujt lo ngar ad tɔa ko ɔrr go nusɨ dɔningg tube na tɔg Mardoke aw kɨkete kete.

⁵ Juipg tɔlɨn madngétadg tube kɨ kiyaɗɔɔ, ɗand ad oin tube ɗan nya kɨ kamd ndig kɨ ngékɔsɨdta.

⁶ Kam ɓebot kɨ Sus Juipg tɔlɨn deg asɨ ɓumi,

⁷ Parsandata, kɨ Dalpon kɨ Aspata,

⁸ kɨ Porata kɨ Adalia, kɨ Aridata,

⁹ kɨ Parmasta, kɨ Arisai, kɨ Aridai kɨ Bajejata,

¹⁰ ngan Haman kɨdɨngã kɨkɨlah, ngon Hamedata madngéta Juipg na tɔlɨnd, tirɨn nyag lod pur al.

¹¹ Ndɔt'n non ɗen ro ngart kɨ kɔr deg'n tɔlɨnd kam ɓebot kɨ Sus.

¹² Ngar el Ester ngar kɨdẽ an: Kam ɓebot kɨ Sus Juipg tɔlɨn deg asɨ ɓumi nat kɨ ngan Haman kɨdɨngã kɨkɨlah. Titbe tɔ tɔlɨn deg kam ndeg nusɨ dɔninggt lo ngar? Tajigla nyakɔ loi i ɗi a? Nya'n i kɔ a ne, a adin. Nya ndɨje loi kɨɗang i ɗi a? A i ngah.

¹³ Ester tur an: Ĩla ngar oo maj a ne, nya ad Juipg'n ndɨn Sus ɗan kɨgo mberkɨndat ɓone na ad gan nin ngan Haman kɨdɨngã kɨkɨlah dõ dɔ kagt loti.

¹⁴ Ngar ndamber kɨ ɗan titbe na lan mber taa kam Sust, gan nin ngan Haman kɨkɨlah dõ.

¹⁵ Juipg ngendɨ Suset kawɨn'na gog kɨ ndɔ kɨ kɨlah gidaisɔɔ lo nah Adar, tɔlɨn deg ɓumɨta kam Sust na tirɨn nyag lod pur al.

¹⁶ Ndeg Juipg'n ndɨn kam nusɨ dɔninggt lo ngar kawɨn'na kɨta ɗɔɔ dɔ rodt, ngahn taakò ji madngétadgt, na tɔlɨn deg asɨ dub dɔtanãimɨta gidaimi ku ngéndoordgt na tirɨn nyag lod pur al.

¹⁷ Nyag 'nten ɗan nya kɨ ndɔ kɨkɨlah gidaimɨta lo nah Adar. Juipg taan kò kɨ ndɔ kɨkɨlah gidaisɔɔ ad ndɔ'n non tel ndɔ mburnam kɨ ronel.

¹⁸ Na Juipg'n ndɨn ɓebot kɨ Sus kawɨn na dɔ ndɔt kɨkɨlah gidaimɨta kɨ ndɔ kɨkɨlah gidaisɔɔ lo nah'n non, taan kò kɨ ndɔ kɨkɨlah gidaimi ad telɨna ndɔ mburnam kɨ ronel.

¹⁹ Kɨtɔ 'nten Juipg ngendɨ kam ngan ɓegt kɨ ndogbɔrr gotot ɗan ndɔ kɨkɨlah gidaisɔɔ lo nah Adar ad telɨna ndɔ ronel kɨ mburnam, i ndɔ kɨmaj na lan kɨ kadkarig adɨn na.

Lan mber ɗa nah Purim.

²⁰ Mardoke ndang nyag 'nten lan maktub kɨ ro Juipgt tube'n ndɨn kam nusɨ dɔninggt tube lo ngar Asuerus, ngendɨ nderbe kɨ ngendɨ sãi tɔ.

²¹ Ndand mber kad ngomɨn ndɔ kɨkɨlah gidaisɔɔ kɨ ndɔ kɨkɨlah gidaimi lo nah Adar ɓal kɨ ɓal,

²² kɨta ndɔg'n non la Juipg ajɨn ji madngétadgt ye. Kam naht'n non tɔ la kamkil lod tel ronel, ndo kɨ hɔ lod tel nya kɨmaj. Ndan mber tɔ kad i ndɔ ɗa mburnam kɨ ronel kɨ lan kadkarig adɨn na, na adɨn nyag ngéndog.

²³ Juipg unɨn kɔd kɨ n'ɗan tit'n lan ne girra kɨgo tat'n Mardoke ndàng ad'd.

²⁴ Kɨtɔ Haman ngon Hamedata kɨ Agagia, madngéta Juipg tube, ɔj kad'n n'nujd ad i ya yuk dɔt, kɨtakad n'tɔldɨn.

²⁵ Na lon ta'n non tee ro ngart, ngar ndàng maktub mberkɨndag kad takɔj lo Haman kɨmajal'n ɔj ndoorɨn Juipg tel so dɔat ad gana kagt, ĩ kɨ nganɨn.

²⁶ Kɨtɔ 'nten la kunɨn ne ndɔg'n non Purim kɨgo tɔ Purrt, na kɨta tag tube'n ndangɨn kam maktubt kɨgo nyagt'n oon dɔ tat 'nten na kɨta nyag kɨ teen dɔdt

²⁷ Juipg ɔrrɨn ndɔg'n non ndan tadang kɨtatɔd kɨ ngankaad kɨ deg tube kɨ ndan rod nat sed kad ngomɨn ndɔg kɨjoo'n non ɓal kɨ ɓal kɨ kaglo loa kɨgo tat kɨndang.

²⁸ Ndɔg 'nten sumba kad gan dɔt na ngomɨn go kɨ ngankat kɨ nganka ku girrnoojt kɨɗen kɨ nusɨ dɔningt kɨɗen kɨ ɓebot kɨɗen na ndɔ Purim 'nten kari na de a nyakɔ dan Juipgt al bat kad i nyagakamdɔt kɨ ro ngankadt kɨtakad ndɔg'n non goton al.

²⁹ Kamla Ester ngar kɨdẽ, ngon Abihail, kɨ Mardoke kɨ Juip tujoo ndàngɨn kɨgo tɔgt kɨtakad maktub kɨkõjoo kɨ ɔj dɔ Purim to kɨɗubagt.

³⁰ Lan kɨ maktub kɨ ro Juipgt tube kam nusɨ dɔninggt kɨɓu kɨ dɔjoo gidaitanaimɨta kam kõɓet lo Asuerus, ndangɨn ta kɨ ad deg kam kɨsokɨber kɨ nyaɗakɨro.

³¹ Kɨtɔkad ngomɨn ndɔ Purim kaglot loa tit'n Mardoke kɨ Juip kɨ Ester ngar kɨdẽ ndan Juipg mber na tit'n ĩn kɨdɔd to unɨn ta 'nten kɨta rod na kɨta ngakaad, ta dɔ kɔgro nyasa lod kɨ nõ lod.

³² Titbe la mberkɨnda lo Ester kɨta Purim to lo tont na ndangɨn taa kam maktubt.