Ester 8 - Maktub Ta Kumkajir

Kunkɔ kɨmaj kɨta Juipg

¹ Ndɔt'n non ngar Asuerus ad Ester ngar kɨdẽ nyangah lo Haman madngéta Juipg. Mardoke ɗe nõ ngart kɨta Ester el ngar kad Mardoke i noojɨn.

² Ngar ɔrr ngon ningaji lon'n taa ji Hamant ad Mardoke, na Ester nda Mardoke dɔ nyangahgt lo Haman.

³ Kamla Ester tel elta kɨ ngar gog ɓaitɔ na so kɨ njaat, kɔa kɨ nõ kumɨnt kad tuj tag kɨmajal lo Haman kɨ Agagia nõ kɔ kɨ kɔjtaɗag loa kɨdɔ Juipgt.

⁴ Ngar la kagkõɓe kɨ nar lɔr kɨdɔ Estert na Ester ɓai dõ ɗà nõ ngart

⁵ ela an: Ĩla nel ngar na m'ngaa maj takumat na ĩla nya 'nten i goɗobat ro ngart, na mĩ nya kɨ nel takum ngart tɔ a ne, ad ndangɨn maktub kad ɔrrɨn ne ta lo Haman ngon Hamedata kɨ Agagia'n ɔj kad nujɨn Juipg'n ndɨn nusɨ dɔninggt tube lo ngar kɔ.

⁶ Kɨtɔ titbãi m'a m'asɨ koo nya kɨmajal'n ndɨ ɗe dɔ girrdegt lom ke titbãi m'a m'asɨ koo noojɨmg'n ndɨ nujɨn kɔ a?

⁷ Ngar Asuerus el Ester ngar kɨdẽ kɨ Mardoke kɨ Juip an: Oon, mad Ester nyangah lo Haman'n gana kagt kɨta la jin ndoorɨn Juipg.

⁸ Kɨtɔ 'nten i ɗan maktub kɨta Juipg tit'n kamsɨ ndigɨn, i ɗan maktub'n non kɨ tɔ ngar dɔt, ɔsɨn kase kɔsɨdɔnya lo ngar dɔt kɨta maktub kɨ ndangɨn kɨ tɔ ngar dɔt, na ɔsɨn kɨ kaset lo ngar, de a ɔrr kɔ al.

⁹ Ndɔt'n non kunɨn ngendang maktub lo ngar, kõ ndɔ kɨdɔjoo gidaimɨta lo naht kɨkõmɨta, ad i nah siban la ndangɨn maktub kɨgo tagt tube'n Mardoke nda mbera. Lan ne adɨn Juipg kɨ Prepeg kɨ mbaiɓeg kɨ ngékõɓeg dɔ nusɨ dɔninggt, mba girra dɔning. Inde mbã tee dɔning Etiopi, nusɨ dɔningg asɨ ɓu kɨ dɔjoo gidaitanaimɨta. Ndangɨn kɨgo ɗob ndang maktub lo nusɨ dɔning kɨɗen kɨ taɓe lo girrdeg kɨɗen tɔ, na kɨ ro Juipgt kɨgo ɗob ndang maktub lod kɨ taɓe lod.

¹⁰ Ɗan maktub kɨ tɔ ngar Asuerus na ɔsɨn kɨ kase kɔsɨdɔnya lo ngar. Lan maktub ji ngékawkɨlagt kɨ awɨn kɨ sɨnda ndaig, kɨ korro rapaig, ngekãi ngɔd ngãi kɨkooj kam lokulnyagt lo ngar.

¹¹ Kɨtakul maktubg'n non la ngar nya'n ta ɗob ad Juipg kɨ ndɨn kam ɓebot kɨɗen kad kawɨn na kɨta ngom rod. Nya ta ɗob ad'd tɔ kad nujɨn deg'n tɔlɨn deg, nat kɨ ngandg kɨ nẽdg ad goton, kɨ tujɨn tɔg lo deg kɨ nusɨ dɔningt kɨɗen ĩgɨn ɔin nyakatg kɨta ɗɔɔn sed na kɨ tirɨn nyag lod pur.

¹² Kam ndɔt kɨ kɨɗabe'n non la kɨ ɗan nyag 'nten kam nusɨ dɔninggt tube lo ngar Asuerus, ad i ndɔ kɨkɨlah gidaimɨta lo nah kɨkɨlah gidaijoo, ad i nah Adar.

¹³ Lan kɨ maktub'n non kɨtakad lan ne mber kam nusɨ dɔningt kɨɗen, kɨ elɨn girrdeg tube kad Juipg ɗan rod woi kɨta ndɔ'n non kɨtakad ndan ngɨra dɔ madngétadgt.

¹⁴ Ngékawkɨlag alɨn dɔ sɨnda ndaigt, dɔ korro rapaigt lo ngar, awɨn kɨdõt kɨgo tat lo ngar, na lan mber ta'n non kam ɓebot kɨ Sus tɔ.

Mardoke ngah kɔsɨgon

¹⁵ Kamla Mardoke tee nõ ngart kɨ kubngar kɨkil musɨmusɨ kɨ kɨnda ront kɨ jɔg ngar kɨbobe kɨɗa kɨ lɔr kɨ kub lẽ kɨ sɔl lom lom kɨ kɨkɨre wor wor. Deg kɨ ɓebot kɨ Sus kon mbiting kɨ ronel.

¹⁶ Juipg ngahn ronel kɨbo, ndɨn kam majt kɨ tetɗɔɔ.

¹⁷ Kam nusɨ dɔningt kɨɗen kɨ ɓebo kɨɗen'n mberkɨnda lo ngar kɨ ta loa teet a ne, Juipg ngahn ronel kɨbo kɨ tetɗɔɔ, kɨ mburnam ndɔ ɗa naht. Ngãibe ku degt kɨdɔningt'n non telɨn rod Juipgt kɨta ɓoolɨn Juipg ngãi.