Ester 7 - Maktub Ta Kumkajir

Gan Haman dɔ kagt loa

¹ Ngar kɨ Haman awɨn lo mburnamt kuju lo Ester ngar kɨdẽ.

² Ndɔ kɨkõjoo lon ndɨ ãin kasɨnduu ye, ngar tel ndɨje Ester gog an: Ester ngar kɨdẽ, nya kɨ kami ndig i ɗi a? I ndɨje na a adin nya'n non. I ge ɗi a? Ke nusɨ kõɓe kaa a i ngah.

³ Ester ngar kɨdẽ tur an: Oo ngar, ĩla m'ngaa maj takumit na ĩla nel ngar a ne, kɨ nyam kumkajir kɨgo kɔt lom na girrdeg lom tɔ kɨgo ndɨjet lom.

⁴ Kɨtɔ ndugojɨn kɔ, mĩ kɨ girrdeg lom kad nuj'jɨn kɨ tɔljɨn kad kɨ goto. Ni ndugojɨn kɔ kad jin ɓer kɨdɨngãg kɨ kɨdẽg kaa ne, neni m'a m'ndɨ tam mbo, na nya'n a tĩ kɔ a i kɨbo tɔi nya'n madngéta a ad ngar.

⁵ Ngar Asuerus elta kɨ Ester ngar kɨdẽ an: Dea i nõ a? De'n ɔj kamɨnt kɨ n'ɗa nya kɨ titbe i ɗah a?

⁶ Ester tur an: Ngendoorj kɨ madngétaj i de kɨmajal Haman'n ndɨn. Kamla ɓool tɔl Haman sɔkɨr nõ ngart, kɨ ngar kɨdẽ.

⁷ Ngar ɓai ta mburnamt kɨ wong, aw kam ndɔɔt lon kɨ gug dɔ kuj kõɓe, na Haman ɓai, ɗe kɔ Ester ngar kɨdẽ kad nyan kɨ dɔ dõ kɨta Haman ger ɓet ngar nda kamɨnt kɨta ɗa sia majal.

⁸ Lon ngar tel kam ndɔɔt lon kɨ gug dɔ kuj kõɓe, ɗe lo mburnamt ye, oo Haman so dɔ tɨrat'n Ester ndɨt na ngar el an: Ɗi kɨbe, a i ɗa ngetɔg dɔ ngart kɨdẽt takum'mt kam kujt lom a? Lon ta 'nten ndɨ tee ta ngart ɓaitɔ ye, utɨn takum Haman.

⁹ Harbona, kɨkɨɗa ku kùj dekɨdɨngãgt elta nõ ngart an: Oo nya mad ɓaitɔ, kag'n Haman ɗago woi kɨta Mardoke'n ta loa aj ngar, ɗa ɓe lo Haman nõ, ngala kɨ dõ i metɨr dɔjoo gidaimi. Ngar el an: I gana dɔt.

¹⁰ Titbe la gan Haman dɔ kagt'n ɗa kɨta Mardoke. Kamla ngar nya ta wong lon.