Ester 6 - Maktub Ta Kumkajir

Ɓi hɔ kum ngar ndɔt'n non al

¹ Kam ndɔt'n non ɓi hɔ kum ngar al na eld kad ɗen kɨ maktub hoitag ad i maktub ga kamdɔt kad dan nõ ngart.

² Ngahn hoita kɨ ndang dɔ Mardoket'n el dɔ tat lo Bigtan kɨ Teres kùj dekɨdɨngãg kɨjoo lo ngar'n ndɨ ngomɨn ta ndog na sahn ɗob tɔl ngar Asuerus.

³ Ngar ndɨje an: Kɔsɨgon ke tɔko kɨ ɗi ɗa adɨn Mardoke kɨta nya 'nten a? Kamla ngékɨlaɓerg lo ngar turɨn anan: Ɗa nya mad kɨɗa kɨtatɔ al.

⁴ Ngar ndɨje an: Nõ ndɨ natlot a? Haman ɗe ɗa natlot kɨtɨga ta ndogt lo kuj kõɓe lo ngar kɨta kelta kɨ ngar dɔ tat lo Mardoke'n n'ɗa kag kad'n gaa tit kad oi.

⁵ Ɓerg lo ngar turɨna anan: Haman la ɗa natlot ye. Ngar el an: I nyana ad and.

⁶ Titbe Haman and na ngar ndɨje an: Ɗi sumba kad ɗan kɨta de'n ro ngar nela kad ɔsɨgona a? Haman el kamɨnt an: Nõ ro ngar a nela kad ɔsɨgona a, i mĩ ale?

⁷ Kamla Haman tur ngar an: Kɨtɔ de'n kam ngar nela kad ɔsɨgona,

⁸ ad ɗen kɨ kub la ngar kad la ront, kɨ ɗen kɨ sɨnda'n ngar ndɨ al, kɨ lan jɔg ngar dɔat.

⁹ Adɨn kub kɨ sɨnda ji kɨkɨɗa ku mbaiɓegt lo ngar kɨbo tɔi, kad la kub ro det'n ro ngar nela kad ɔsɨgona. Adɨna hɔ kɨla sɨnda ndian nõ det'n non ndan natlo kɨ ɓebot, gang, na lan mber nõat anan: Titbe la ɗan ne kɨ de'n ro ngar nela kad ɔsɨgona ye.

¹⁰ Kamla ngar el Haman an: I ɗa kɨdõt, un kub kɨ sɨnda'n i eltaa nõ, na i ɗa titbe kɨta Mardoke kɨ Juip'n ndɨ ta ndogt lo ngar. Nyag'n i eltaa nõ, ot nya nya mad kɔ.

¹¹ Haman un kub kɨ sɨnda, la kub ro Mardoket, na ada ndɨ dɔ sɨndat, ndan natlo gang na la mber nõat an: Titbe la ɗan ne kɨ de'n ro ngar nela kad ɔsɨgona ye.

¹² Goot gog Mardoke tel kɨ ta ndogt lo ngar gog na Haman tel kanangbe, aw ɓe lon kɨ kam kɨtuj na ut dɔn kɨ kub.

¹³ Haman ɔrr hoia nẽn Jeres kɨ namɨng tube nyag'n teen dɔat. Kamla ngéterrg loa kɨ nẽa Jeres elɨna anan: Ĩla Mardoke kɨ i girr Juip hã i mba girr so nõat a ne, a i tɔi tɔga al bat, rota a i so nõat.

¹⁴ Lon ndɨ elɨn ta ɓaitɔ ye, kùj dekɨdɨngãg lo ngar teen, ɗan kɨdõt kɨ n'awɨn kɨ Haman lo mburnamt'n Ester ɗa.