Ester 4 - Maktub Ta Kumkajir

Mardoke kɨ Ester sahn kaj Juipg

¹ Lon Mardoke oo nyag tube'n ɗan ye, hɔ kub lon til, na la kub hɔndo, ɔi buhoor kɨ dɔnt, ndia kam ɓet, ko kɨ ndɨn kɨbo, na nõ, nõ kɨtɨngabil.

² Aw mbã tee ta ndogt lo ngar kɨta ɔgɨn kad de and kam ndogt lo ngar kɨ kub hɔndo ront.

³ Kam dɔningt kɨɗen ke lo kɨɗen'n ndikun lo ngar kɨ ta loa teet ye, Juipg ngãibe hɔn ndo. Ɔgɨn rod nyasa kamla nõn, gan gud na ngãibe kudt ton kɨ kub hɔndo rodt dɔ buhoor tɔ.

⁴ Ɓerg kɨdẽ kɨ kùj dekɨdɨngãg lo Ester ɗe ɔrrɨna hoia, na ro ngar kɨdẽ oi siw. La kɨ kub ad Mardoke kad ɔrrɨn kub hɔndo kɔ ront, na Mardoke mbet.

⁵ Kamla Ester kun Hatak kɨkɨɗa ku kùj dekɨdɨngãgt lo ngar'n ndad kad ɗan kɨ Ester na laa kɨ aw ro Mardoket kad oo ke i ɗi ɗa nya kamtã Mardoke ɗan nya kɨtitbe a?

⁶ Hatak tee tɨga ro Mardoket natlo kɨbo kɨ ɓebot ta ndogt lo ngar.

⁷ Mardoke ɔrra hoi nyag tube kɨ ɗan sen na ɔja kɔr nar'n Haman un kɔn kad'n nũ kam kuj ngom nyamajgt lo ngar kad n'tɔlɨn Juipg.

⁸ Mardoke ad Hatak maktub ndikun lo ngar'n lan mber kam Sust kɨta kad'n tɔlɨn Juipg. Hatak ɔj Ester na ɔrra girra. Kamla ndamber Ester kad aw ro ngart, hɔ njaa, kɔa kɨta girrdeg lon.

⁹ Hatak tel kɨ ro Estert ela ta lo Mardoke.

¹⁰ Ester elta kɨ Hatak kad el Mardoke an:

¹¹ Ngékɨlaɓerg tube lo ngar kɨ deg kɨ nusɨ dɔninggt lo ngar gerɨn kad, dekɨdɨngã ke dekɨdẽ kɨ aw ro ngart natɓet kɨkeme kanj kad ngar kuna a ne, mberkɨnda i kɨɗabe, a tɔlɨna koon. De'n ngar a la kag kõɓe kɨ ɗa kɨ nar ɔr kɨdɔat koon la de'n non a aj ye. Na oo, asɨ ndɔ dɔmɨta la ngar kunɨm kɨront al.

¹² Elɨn Mardoke ta lo Ester.

¹³ Mardoke turta kad elɨn Ester anan: Ot koo kan ĩ kɨ kɨɗaibe a aj ku Juipgt tube, kɨta ĩ kam kujt lo ngar,

¹⁴ kɨta ĩla i ndɨ goi mbo tajigla ad Ngeɗased kɨ Ngekugkɔrd teen kɨ ta ɗob kɨɗang kɨta Juipg a ne, ĩ kɨ ngékɨɓe lo bɔwi a i nujɨn. Nõ ger kad i tel nẽ ngar kɨta kaglo kɨ titbe a?

¹⁵ Kamla Ester la el Mardoke an:

¹⁶ Aw i kaw Juipg tube kɨ ndɨn Sus kɨnat na ɔgɨn rosɨ nyasa kɨtatɔm. Ot san nya ke ãin nya ndɔ ho kàda ho mbã ndɔ mɨta. Mĩ kɨ ɓerg lom kɨdẽ j'a j'ɔg roj nyasa titɨn i ɗan be ho, ta ne m'a m'aw ro ngart ke i kɨgo mberkɨndat al, ĩla sumba koi a ne, m'a nga koi.

¹⁷ Mardoke aw na ɗa nyag tube'n Ester ndaa mbera.