Ester 2 - Maktub Ta Kumkajir

Sahn ngar kɨdẽ kɨɗang

¹ Go nyagt 'nten lon wong lo ngar Asuerus tel sɔl woi ye, ga kamɨn dɔ Bastit kɨ nyaɗaa kɨ mberkɨnda'n tee kɨtatɔa tɔ.

² Kamla ngékɨlaɓerg lo ngar elɨn anan: Ad sahn ngan kɨ mandg kɨ gerɨn ngaw al kɨta ngar.

³ Kɨ ngar nda pajag kam nusɨ dɔninggt lon tube kad kawɨn ngan kɨmandg kɨ gerɨn ngaw al tube kɨ ɓebot kɨ Sus, kam kujt lo dekɨdẽg kɨ nyand ji Hegai kùj dekɨdɨngã lo ngar, ngengom dekɨdẽg, kɨ adɨnd yibg kad ɗan ne go rod.

⁴ Na ngon kɨdẽ'n nel ngar a ne, kɨ ndaa ngar kɨdẽ ɔrrɨn goot Basti. Kɔjta 'nten nel ngar ad ɗa titbe.

⁵ Kam ɓebot kɨ Sus Juip mad ndɨt nõ, tɔa i Mardoke, i ngon Jair, ngon Simei, ngon Kis ko girr Benjamit

⁶ in hɔna Jerusalem, awɨn sia ɓeɓert maɗi nat kɨ deg madg kɨ Jekonia ngar kɨ Juda. Nebukadnesar ngar kɨ Babilon la aw sed ye.

⁷ Mardoke ngom Hadasa, ad i Ester, kõnan. Bɔwa kɨ kõa tu oin. Ngon kɨdẽ n'non maj takumit kɨ kadron tu. Lon bɔwa kɨ kõa oin ye, Mardoke una, ngoma tit ngonɨn be.

⁸ Lon lan mber ta kɨ tee ta ngart na kawɨn ngan kɨdẽg kɨ mandg ngãibe ɓebot kɨ Sus, nyand ji Hegait, Ester tɔ andɨn sia kam kujt lo ngar, nyana ji Hegai ngengom dekɨdẽg.

⁹ Ngon kɨdẽ'n non nel Hegai ngãi na ngah maj takumat tɔ. Tentenbe ada yibg kɨ gaj nyasa loa tɔ. Ada dekɨdẽg tanãimɨta kɨ kɔt kam kujt lo ngar na ndɔt kɨkete nat kɨ dekɨdẽg loa kam lot kɨmajtɔi kam kujt lo dekɨdẽg.

¹⁰ Ester ɔjd girrdeg lon ke noojɨng al, kɨta Mardoke ndaa mber kad de ger dɔa kɨndɔgndɔg al.

¹¹ Kɨ ndɔ tube Mardoke a ndia nõ natlot kɨnõ kujt lo dekɨdẽg kad n'oo ke Ester to bãi ke nya mad ɗaa a.

¹² Ngon kɨdẽ kɨɗen a aw ro ngar Asuerust lon ndɔ loa asɨ, a ɗa kɨgo nyaɗa dekɨdẽgt asɨ nah kɨlah gidaijoo kɨta i kaglo'n ɔjɨnd kad ɗan ne go rod. Ɗan rod kɨ yib myrr nah kɨ kɨbojidet, kɨ yib kɨkootmbĩ nah kɨ kɨbojidet tɔ, kɨ yib madg lo dekɨdẽg.

¹³ Lon ngon kɨdẽ kɨɗen a aw ro ngart ye, a adɨna nyag tube kɨ kama ndig, tee awɨn kuju lo ngar.

¹⁴ A aw kam kujt lokɨsɔle na loti kɨsĩ, tee aw kuju lo dekɨdẽg kɨkõjoo ji Saasgaj kùj dekɨdɨngã lo ngar kɨ ngengom nẽag kɨɓer. Dekɨdẽ'n non a tel aw ro ngart gog al na ĩla ro ngar nela sia na ad kuna kɨ tɔa kamtã.

Ndan Ester ngar kɨdẽ

¹⁵ Lon ndɔ lo Ester, ngon Abihail, ngonkõ bɔw Mardoke, in Mardoke tɔa tit ngonɨn be asɨ kad aw ro ngart ye, ndɨje nya mad al na nya'n Hegai kùj dekɨdɨngã lo ngar ɔja tã. Ester ngah maj takum degt tube'n oona.

¹⁶ Titbe la andɨn kɨ Ester ro ngar Asuerust kam kujkõɓet loa nah kɨkɨlah ad i nah Tebet kam ɓal kõɓet loa kɨkõtanãimɨta.

¹⁷ Ngar tar Ester tɔi ndeg dekɨdẽg tube, na ngah maj takum ngart tɔi ndeg ngan kɨmandg tube. Nda jɔg ngar dɔat ada ndɨ ngar kɨdẽ goot Bastit.

¹⁸ Kamla ngar ɗa mburnam kɨbobe kɨta mbaiɓeg lon tube kɨ ngékɨlaɓerg lon. I mburnam lo Ester. Ɔrr ta nar lambot kam nusɨ dɔninggt na ad kadkarig kɨta kiã ngar.

Lan ta ber kɨta tɔl ngar Asuerus

¹⁹ Lon kawɨn ngan kɨmandg nja kɨkõjoo ye, Mardoke ndɨ ta ndogt lo ngar.

²⁰ Ester tee dɔ noojɨng ke girrdeg lon al tit'n Mardoke ndan mbera kɨta Ester tel ron go tat lo Mardoke ɓaitɔ, tit kaglo'n ngoman kete be.

²¹ Kaglot'n non Mardoke ndɨ ta ndogt lo ngar lon Bigtan kɨ Teres kùj dekɨdɨngãg kɨjoo lo ngar, ngengom ta ndog, ɓan wong na sahn ɗob kad'n tɔlɨn ngar Asuerus.

²² Takɨkɔj 'nten so mbi Mardoket ad eltaa Ester ngar kɨdẽ na Ester eltaa ngar kɨ tɔ Mardoke dɔt.

²³ Nderɨn girr ta'n non na i rota ad gan deg kɨjoo nõ dɔ kagt. Ndangɨn ta'n non kam maktub ga kamdɔt nõ ngart.