Deteronom 9 - Maktub Ta Kumkajir

Israel a ga kaglo kɨgog

¹ Oo dɔ, Israel, ɓone a i gang bah Jurdẽ kad i ta lo lo girrdeg kɨbobo kɨ tɔgd tɔii kɨ ɓebog kɨngang kɨ ndogbɔrrag ngalɨn puwuw.

² Deg kɨbobo kɨ kɨngalg, in ngaka Anakiag, ĩgɨn i gerd, ĩgɨn elɨn ta lod anan: Nõ asɨ ɗà nõ Anakiagt a?

³ Maj kad i ger ɓone, Bɨraɓe Luwah loi'n a ndia nõit i horr kɨ ngekõ mugɨj, ĩla a nujd, a la dɔd girr tɔgit, a i tuɓad, a i nujd kanangbe tit'n Bɨraɓe unɨn kɔn adi.

⁴ Lon Bɨraɓe Luwah loi a tuɓad kɔ nõit a ne, ot kel kamit kan: Kɨtɔ nyaɗam kɨdenesew la Bɨraɓe andɨn sem dɔning kõndubat ye. Kɨtɔ i kɨtɔ majal lo girrdeg kɨdangdang'n non la Bɨraɓe tuɓadɨn kɔ nõit.

⁵ I kɨta nyaɗai kɨdenesew ke nyaɗa kɨgoɗobat hã andɨn kam dɔningt lod al, na i kɨtɔ majal kɨ ɗa lo girrdeg'n non la Bɨraɓe Luwah loi tuɓadɨn kɔ nõit, na i kɨta tɔl ta ta kɨ Bɨraɓe ndan yo ad bɔwi Abraham, Isaak kɨ Jakob.

⁶ Maj kad i ger, i kɨta nyaɗai kɨdenesew hã Bɨraɓe Luwah loi adɨ'n dɔning kɨmaj'n non al, kɨta in girrdeg ngédɔngang.

Ngan Israelag ɗan yo ngon mang

⁷ I ga kami dɔt, ot kad kami oi dɔ sɔkt'n i sɔkɨ wong lo Bɨraɓe Luwah loi kam dɨlalot. I mba girra ndɔt'n i teen kɔ dɔning Ejipt't mbã i teen lot'n ɗan, na i taan ɗɔɔ Bɨraɓe.

⁸ Nja mbalbot kɨ Horeb i sɔkɨn Bɨraɓe ad Bɨraɓe ɓawong ad ge nujsɨ kɔ.

⁹ Lon m'aw dɔ mbalbot kɨta taa bar mbalg ad i bar kunkɔ kɨ Bɨraɓe un nat sesɨ, m'ndɨ dɔ mbalbot kad dɔsɔɔ kɨ ndɔ dɔsɔɔ kanj sanya ke kãi man.

¹⁰ Bɨraɓe adɨm bar mbalg joo in Luwah ndang kɨ ngonjin, ad i tag tube'n Bɨraɓe elsɨ ngawden horrt dɔ mbalbot dɔ ndɔ kawnat.

¹¹ Go kàdt kɨ dɔsɔɔ kɨ ndɔ dɔsɔɔ la Bɨraɓe adɨm bar mbalg kɨjoo, ad i bar kunkɔ.

¹² Kamla Bɨraɓe el an: I ɓai nẽbe, i ɗisɨ kanangbe, aw kɨta deg loi'n i tee sed kɔ Ejipt't ye, tujɨn rod, tɔɔn ɗob kɨ m'ɔjd kɨ mberkɨnda kɔ, kanangbe pelɨn nya ɓakumta yo kɨta rod.

¹³ Bɨraɓe elɨm an: M'oo deg'n ɗan na oo ĩn deg kɨ dɔngang.

¹⁴ I nyam ad m'nujd na m'tɔl tɔd kɔ girr dɔrãt. M'a m'ɗa sei kad i tel girrdeg kɨtag kɨ kɨbo tɔid.

¹⁵ M'ɗisɨ dɔ mbalbot, na mbalbo õ horr, bar mbal kunkɔ kɨjoo in kam jimt kɨjoo.

¹⁶ M'nɔl na m'oo i ɗan majal i ndoorɨn ne Bɨraɓe Luwah losɨ, i pelɨn nya ɓakumta ngon mang, tentenbe i tɔn ɗob'n Bɨraɓe ndasɨ mbera.

¹⁷ Kɨtɔ 'nten m'hɔ bar mbal kɨjoo jimt kɨjoo, m'la m'tɔd takumsɨt.

Moij kɔ kɨ rotĩn kɨta ngan Israelg

¹⁸ Kamla m'so ber kɨnõ Bɨraɓet tit kɨkete, m'ɗa kàd dɔsɔɔ kɨ ndɔ dɔsɔɔ kanj sanya, kanj kãi man kɨtɔ majal kɨbobe'n i ɗan lon i ɗan kɨla kɨmajal'n non nõ Bɨraɓet kɨta i sɔkɨn wong loa.

¹⁹ Kɨtɔ m'ɓool wong kɨtɨngabil lo Bɨraɓe'n ɓa sesɨ kad nujsɨ, na Bɨraɓe oo dɔ kɔ lom kaglot'n non tɔ.

²⁰ Bɨraɓe ɓawong ngãibe kɨ Aarõ, ndig kad kɨ n'nuja, na m'kɔ kɨta Aarõ kaglot'n non tɔ.

²¹ M'un ngon mang'n i ɗàn nõ, ad i kɨlaɗasɨ kɨ majal, m'laa horro, m'tɔa kɔsɨkɔsɨ, na m'usa mbã m'ada tel bu, kamla m'ũ bua kam man baht'n ɗisɨ ko dɔ mbalbot.

²² I sɔkɨn Bɨraɓe ad ɓawong kam logt kɨ Tabera kɨ Masa kɨ Kibrot Hataaba.

²³ Ko Kades Barnea lon Bɨraɓe lasɨ, el an: Awɨn, i taan dɔning'n m'ndɨ m'adsɨ nyakagɓet, na i taan ɗɔɔ mberkɨnda lo Bɨraɓe Luwah losɨ, i adɨna kamsɨ al, i telɨn rosɨ go ndɨ tat loa al tɔ.

²⁴ Ndɔ'n m'gersɨn kete nu nõ, in ngétaaɗɔɔ Bɨraɓe.

²⁵ M'so ningt nõ Bɨraɓet kad dɔsɔɔ ndoo dɔsɔɔ kɨta Bɨraɓe el an: N'a nujsɨ kɔ.

²⁶ M'kɔ Bɨraɓe m'an: Bɨraɓe Luwah, ot nuj deg loi, nyakagɓe loi'n i badɔa kɨtakul tɔgi kɨbobe, in i tee sed kɔ Ejipt't kɨ jii kɨtag,

²⁷ I gah dɔ ɓergt loi: Abraham, Isaak kɨ Jakob, Ot koo dɔ ngang lo deg'n ɗan kɨ ɗagootal lod ke majal lod,

²⁸ na ɓeta deg kɨ dɔningt kɨ i tee sed kɔ tit elɨn anan: Bɨraɓe asɨ kaw sed dɔningt unɨn kɔn ad'd al, kɨta 'nten mbetd na tee sed kad tɔld kam dɨlalot.

²⁹ Na in deg loi kɨ nyakagɓe loi'n i tee sed kɔ Ejipt't kɨtakul tɔgi kɨbobe kɨ jii kɨla kɨ dõ.