Deteronom 8 - Maktub Ta Kumkajir

Moij ga dɔ kaglot kɨkete kɨ kaglo kɨgog

¹ Oon go rosɨ maj kad i hɔn ɗago mberkɨndagt tube'n m'ndasɨ mbera ɓone, kɨtakad i ndɨn ne kɨ dɔsɨ dõ kɨ andɨn kam dɔning'n Bɨraɓe un kɔn kɨ yokɨnda kɨ n'ad bɔwsɨg.

² A i ga kami dɔ ɗobgt tube'n Bɨraɓe Luwah loi ɔrɨn kam dɨlalot kam ɓalgt kɨdɔsɔɔ 'nten, kɨtɔ sɔl dɔi, kɨ nán nái kad n'gerɨn ta kɨ kamit, kad n'oo ke a i ngomgo mberkɨndag loa, ke a ngomgo al a?

³ Luwah sɔl dɔi ad ɓoo ɗai kamla ad i sa maan in i gera al, bɔwig gerɨn al tɔ, kad i ger de a ndɨ kɨ dɔn dõ kɨta nyasa hã kɨɗabe al, na kɨtakul ta kɨɗen kɨ tee ta Bɨraɓet tã.

⁴ Kam ɓalgt kɨdɔsɔɔ nõ, kub loi ngisɨ al ho, njai ti al ho.

⁵ Titbe i ger kamit maj Bɨraɓe Luwah loi nda ɔji tit'n de nda ngon ɔjan be.

⁶ Kɨtɔ 'nten a i ngomgo mberkɨndag lo Bɨraɓe Luwah loi, a i ɓoola.

Nyag kɨ a nán ngan Israelg kam dɔning kunkɔt

⁷ Kɨtɔ Bɨraɓe Luwah loi a aw sei kam dɔningt kɨmaj, dɔning'n man bahg kɨ mang kɨ ɓa kɨ kɨwo kɨbing ndɨ teen hollogt kɨ dɔ mbalbogt,

⁸ dɔning'n gem, kɨ nyako ɔrj, kɨ dĩndu kɨ mbaiɓood, kɨ kag grenadie in tit dɔning'n kag olib kɨ tej ĩn tit,

⁹ dɔning'n a i sanya kamt kɨnõbe, a i nal nya mad al. Dɔning'n a ngahn hand tit, na a i urɨn ningakasɨ kam mbalbogt loa.

¹⁰ A i sanya i ndanɨn, na i ɔsɨgon Bɨraɓe Luwah loi kɨta dɔning kɨmaj'n adi.

¹¹ Oo go roi maj, na ɓeta kami oi dɔ Bɨraɓe Luwaht loi na i nyàgo mberkɨndag loa kɨ tagkɨgang loa kɨ mberkɨnda loa'n ndai mbera ɓone,

¹² na ɓeta lon a i sanya i ndan na i ɗa kujg kɨmajmaj, i ndɨt,

¹³ lon nyakulg loi kɨbog kɨ kɨ dug bɨlan ngãi na nar arjã loi kɨ nar ɔr loi ton mbuj, ad nyag loi tube in ngãi.

¹⁴ Ad dɔi sir na kami oi dɔ Bɨraɓe Luwaht loi in tee sei kam dɔning Ejipt't kɨtɨga ko kam ɓe ɓert.

¹⁵ Luwah'n gang sei dɔ kɔr kɨbo kɨkootɓool, lon lig kɨ ndulon ngẽingẽi kɨ gɨnag ɗoosɨn, log kɨtut kurum kanj man, na ad man ɓa ko kam mbalt kɨngang adi.

¹⁶ Ĩn ad i sa maan kam dɨlalot, nyasa'n bɔwig gerɨn al, kɨtakad n'sɔlɨn dɔi kɨ n'nain n'oo, kad maj urri kaglo kɨnõit.

¹⁷ Oo go roi maj, na ɓeta el ngarkamit an: Ngangɨm kɨ tɔg jim la m'ngan nyamag 'nten.

¹⁸ I ga kami dɔ Bɨraɓe Luwaht loi kɨta ĩla adi tɔg ngah nyamajg kad tɔlɨn ta tag lon titbe ndɨ ɗan ɓone tit'n ɗan kɨ bɔwig maɗi kɨgo kunkɔt'n un ad'd kɨ yokɨnda.

¹⁹ Rota, ĩla kami oi dɔ Bɨraɓe Luwaht loi, ĩla i ndulo go luwahg kɨɗang, i ɗa ɓer lod na ɔsɨ dɔi ber nõdt a ne, ɓone m'ndɨ m'eli m'to wakɨsɨ, a i nujɨn kɔ.

²⁰ A i nujɨn kɔ tit'n Bɨraɓe ndɨ nujɨn girrdeg kɨ dang dang nõsɨt kɨta i telɨn rosɨ go tat lo Bɨraɓe Luwah losɨ al.