Deteronom 7 - Maktub Ta Kumkajir

Israel kɨ girrdeg kɨ dang dang

¹ Lon Bɨraɓe Luwah loi aw sei kam dɔningt'n i ndɨ andt, kad i taa nyakagɓet, a tuɓa girrdeg ngãibe kɔ, ad i Hetiag, Girgasiag, Amoriag, Kananiag, Perejiag, Hebiag kɨ Jebusiag, girrdeg kɨ tanãimɨta'n kɔrd kɨ tɔgd in ngãi tɔii.

² Lon Bɨraɓe Luwah loi lad jiit, na lon i tetd ɗɔɔ a ne, a i tɔld tube ad goton. Ot kun kɔi sed, ot kookumtondo lod.

³ Ot la kɔi nat sed dɔ taanat. A ad ngani kɨdẽ a taan ngand kɨdɨngã al, ngand kɨdẽ a taan ngani kɨdɨngã al tɔ.

⁴ Kɨtɔ a telɨn dɔ ngani kɨdɨngã kad nyan ta ndulo gom, kad ɗan ɓer lo yog kɨ dang dang ad wong kɨtɨngabil lo Luwah so dɔsɨt, nujsɨ tentenbe.

⁵ Na a i ɗan sed titbe. A i tɔɔn dɨngɨr kadkarig lod kɨber, a i tɨndan yo mbalg lod i tetɨn, a i gan kag yo Akerag lod kɔ, na a i lan horr ɓakumtanyag lod kɨpel.

⁶ Kɨtɔ 'nten, a ĩn girrdeg kɨjaɓat kɨta Bɨraɓe Luwah loi. Bɨraɓe Luwah loi kɔti kɨtakad in girrdeg loa kɨkɔsɨdɔa ku girrdegt tube kɨ ndɨn dɔningt kɨtaagbe.

Bɨraɓe i ngengom go kunkɔ lon kɨndɔgndɔg

⁷ Kɨtɔ kɔrrsɨ kɨngãi tɔi girrdeg tube hã Bɨraɓe kɔtsɨn al, na kɨta kɔrrsɨ kɨdu tɔi kɨlo girrdeg tube.

⁸ Kɨtɔ Bɨraɓe ndɨ tarsɨ, na ndɨ ngomgo kunkɔ'n un ad bɔwsɨg kɨ yokɨnda. Kɨtɔ 'nten la Bɨraɓe teen sesɨ kɨ ji kɨtɔg, na ban dɔsɨ kam ɓe ɓert ji Paraõt ngar kɨ Ejipt't.

⁹ Maj kad i ger, Bɨraɓe Luwah loi la i Luwah kɨrota ye, i Luwah kɨ ngeɗanya kɨro, kɨ ngengom go kunkɔ lon kɨ nyaɗakɨro lon mbã kɨdɔ ngaka kɨdubgt'n tarɨna na ngomɨn go mberkɨndag loa.

¹⁰ Na deg kɨ ngékɔsa ta, a bajid takumdt, a nujd. A ndɨdɔt kɨ ngekɔsa ta al, a baji de'n non takumat.

¹¹ I ngomgo ndikung kɨ mberkɨndag kɨ tagkɨgang'n m'ndai mbera ɓone, a i hɔ ɗagoot.

¹² Ĩla oon dɔ tagkɨgang'n non, i ngomɨn god, na i hɔn ɗagoot tɔ a ne, Bɨraɓe Luwah loi a ngomgo kunkɔ kɨ nyaɗakɨro'n unɨn kɔn kɨ yokɨnda ad bɔwig.

¹³ A tari, a njang dɔi na a adi bɨla kɨdɔtdɔt, a ad maj urr ngan kami kɨ kand dɔning loi kɨ nyako loi kɨ man nduu loi kɨ yib loi kɨ kooj nyakulg loi kɨbog kɨ kɨdug kɨ kam kɨsokɨber kam dɔning'n ndan yo ad bɔwig kɨ n'adi.

¹⁴ A i ngah majkurr tɔi girrdeg tube. Kùj dekɨdɨngã ke kɨdẽ a goto kusɨt, kùj dã a goto ku ɓut nyakulgt loi.

¹⁵ Bɨraɓe a ɔrr mõi kɨ dang dang kɨɗen roit kɔ, a la mõig kɨmajal kɨ Ejipt'tn i gerd roit al, na a lad dɔ degt tube'n ɔsɨsɨn ta.

¹⁶ A i tuj deg tube'n Bɨraɓe Luwah loi a lad jiit, a i oo kumtondo lod al bat, a i ɗa kɨlaɓer ad yog lod kɨta a i gum kɨtɔi.

Bɨraɓe i ngengom girrdeg lon

¹⁷ Maj a ne, a i el kamit an: Girrdeg'n non ĩn koosɨg tɔimɨn ye, titbãi, m'a m'asɨ tuɓad a?

¹⁸ Ot ɓoold, i ga kami dɔ nyat'n Bɨraɓe Luwah ɗa kɨ Paraõ kɨ dɔning Ejipt't kɨkɨɗen taagbe,

¹⁹ nyanág kɨbobe'n i ood kɨ kumi kɨ nyakɔjg kɨ nyag kɨyaya kɨ ji kɨtɔg kɨ ji kɨla kɨ dõ lon Bɨraɓe Luwah loi teen sei.

²⁰ Titbe la Bɨraɓe Luwah loi a la kɨ birbĩg dɔdt mbã kad nujɨn ndegd kɨnãi, kɨ ĩgɨn yan rod nõit.

²¹ Ot kad ɓool ɗai kɨtɔ Bɨraɓe Luwah losɨ i kusɨt, i Luwah kɨbo kɨkootɓool,

²² Bɨraɓe Luwah loi a tuɓa girrdeg'n non jenjenbe nõit. A i asɨ tɔld kanangbe al, na ɓeta dãg kɨmut bɨlan dɔit.

²³ Na Bɨraɓe Luwah loi a lad jiit, a tɨnda tĩd kɨ log mbã nujd kɔ.

²⁴ A la ngarg lod jiit, a tɔl tɔd kɔ girr dɔrãt, de mad kɨ a asɨ ɗa nõit goto mbã kad i nujd kɔ.

²⁵ A i lan horr ɓakumta yog lod kɨpel, A i ɗa kumndà nar arjã ke nar ɔr kɨdɔdt al ke un kɨta roi, na ɓeta nyag'n non telɨn gum kɨ hoi kɨta i nya kɨyerr ro Bɨraɓe Luwaht loi.

²⁶ A i ɗe kɨ nya kɨyerr mad kam kujt loi al, na ɓeta a i tel nya kɨndɔl kɨ tita tɔ ho. A i mbet nya'n non parkɨnõt kɨta i nya kɨndɔl.