Deteronom 6 - Maktub Ta Kumkajir

Mberkɨnda i kɨta majkurr

¹ Igɨn ten la in ndikung, kɨ mberkɨndag kɨ tagkɨgang'n Bɨraɓe Luwah losɨ ndam mbera kad m'ndoosɨ kad i ɗan goot kam dɔningt'n i ndɨ awɨnt kad i taan nyakagɓet,

² kad i ɓool Bɨraɓe Luwah loi kɨ i ngomgo mberkɨndag loa kɨ ndikung loa tube'n m'ndai mbera ndɔ ndit kɨ dɔ dõ tube kɨtakad ndɔig ĩn ngãi, ĩ kɨ ngoni kɨ ngon ngoni.

³ Oo dɔ, Israel, oo go roi maj kad i hɔ ɗa kɨtakad maj urrsɨ kad i bɨlan kɨdɔtdɔt tit'n Bɨraɓe Luwah lo bɔwig unɨn kɔn ad kam dɔningt'n mba kɨ tej ndɨ nũnt.

Ngékooj ngang a ndoond mberkɨnda lo Bɨraɓe

⁴ Oo dɔ, Israel, Bɨraɓe Luwah loj i Bɨraɓe kɨ kɨɗabe.

⁵ A i tar Bɨraɓe Luwah loi kɨ ngarkami tube kɨ roi tube kɨ tɔgi tube.

⁶ Tag 'nten, m'eli ɓone a in ngarkamit,

⁷ A i ndoo nganig tag 'nten kɨ rotĩi, a eltag 'nten lon i ndɨ kam kujt loi, lon i ndia dɔ ɗobt, lon i to ber, ke lon i ɓai dõ.

⁸ A i nyakɔj jiit kɨ nya kɨ dɔ nat nõit mbɨna kumit.

⁹ A i ndangd dɔ kag ta kujt loi kɨ kag ta ndogt loi.

Maj kad kam Israel oi dɔ Luwaht al

¹⁰ Lon Bɨraɓe Luwah loi a adi and kam dɔningt, kɨ unɨn kɔn kɨ yokɨnda ad Abraham kɨ Isaak kɨ Jakob, kɨ n'adi, a i taa ɓeg kɨbobo kɨ kɨmajmaj'n i ndah al bat,

¹¹ kɨ kujg kɨ ɗoosɨn kɨ nyamaj kɨɗen'n i ndahdt al, kɨ bulomang'n kɨ nu kɨ urd al, kɨ dĩndug kɨ kag olibg'n i hɔd al, Lon i sa na i ndan a ne,

¹² oo go roi maj, na ɓeta kami oi dɔ Bɨraɓe loi'n tee sei kam dɔning Ejipt't kɨtɨga ko kam ɓe ɓert.

¹³ A i ɓool Bɨraɓe Luwah loi, a i ɗa kɨlaɓer ada, a i nda yo kɨ tɔa.

¹⁴ Ot kawɨn go luwahgt kɨɗang ku luwahgt lo girrdeg kɨdangdang'n ndɨn gugɨn dɔsɨ,

¹⁵ kɨta Bɨraɓe Luwah loi in i dãsɨt i Luwah kɨ Ngejang, na ɓeta wong lo Bɨraɓe kɨtɨngabil so dɔit kad nuji kɔ dɔningt.

¹⁶ Ot nán Bɨraɓe Luwah losɨ tit'n i nána ne, lot kɨ Masa.

¹⁷ A i ngomɨn go mberkɨnda lo Bɨraɓe Luwah losɨ kɨ najkɨmag loa kɨ mberkɨndag loa ĩn ndasɨ mbera.

¹⁸ A i ɗa nya'n i kɨgoɗobat kɨ kɨmaj takum Bɨraɓet, kɨtakad maj urri na kɨ i taa dɔning kɨmaj'n Bɨraɓe ndan yo ad bɔwig kɨ n'ad'd nyakagɓet,

¹⁹ got'n tuɓa madngétaig tube nõit tit'n elɨn.

²⁰ Ndɔ mad lon ngoni a ndɨjei an: Najkɨmag kɨ mberkɨndag kɨ tagkɨgang 'nten in Bɨraɓe Luwah loj ndasɨ mbera ye girra i ɗi a?

²¹ A el ngoni an: Maɗi jĩ ɓerg lo Paraõ kam dɔning Ejipt't, na Bɨraɓe tee sej kɔ kam Ejipt't kɨtakul tɔg jin.

²² Bɨraɓe ɗa nyakɔjg, kɨ kɨlag kɨ yaya kɨbobe, kɨ nyag kɨkootɓool kɨdɔ Paraõt kɨ ngékɨɓe loa tube.

²³ Tee sej kɔ lot'n non kɨ n'aw sej kam dɔning'n ndan yo kɨ n'ad bɔwjg.

²⁴ Bɨraɓe ndaj mbera kad kɨ ɗa kɨgo tagt 'nten tube, kad kɨ ɓool Luwah loj kɨtakad maj urrj kɨndɔgndɔg kad ngomj kɨ dɔ dõ tit'n ɗan mbã ɓone.

²⁵ A i denesew loj ĩla kɨ hɔ ɗago mberkɨndag tube nõ Bɨraɓe Luwaht loj tit'n ndajɨn mbera.