Deteronom 5 - Maktub Ta Kumkajir

Mberkɨndag kɨkɨlah

¹ Moij kun Israelag tube na eld an: Israel, oo dɔ mberkɨndag kɨ tagkɨgang'n m'ndɨ m'eltaa m'adi oo ɓone. I ndoon na, oon maj kad i hɔn ɗagoot.

² Bɨraɓe Luwah loj un kɔn sej mbalbo Horebt.

³ Kunkɔ 'nten Bɨraɓe un kɨ bɔwjg al na un sej jĩ tube, jĩgɨn kɨ ndɨ kɨ dɔj dõ ɓone.

⁴ Bɨraɓe elta sesɨ kum kɨ kum dɔ mbalbot ko ngawden horrt.

⁵ Ndɔt'n non m'ɗa mbɨnasɨt kɨ Bɨraɓe kad m'elsɨ ta lo Bɨraɓe kɨta i ɓoolɨn horr, na alɨn dɔ mbalbot al. Bɨraɓe el an:

⁶ Mĩ Bɨraɓe Luwah loi nge tee sei kam dɔning Ejipt't kɨtɨga ko kam ɓe ɓert.

⁷ A i aw kɨ luwah madg kɨɗang nomt al.

⁸ A i ɗa ɓakumta nya mad kɨta roi al, ke nya kɨ taa na kɨ nya mad kɨ kam dɔrãt dõ, ke kɨ kam dɔningt ber, ke kɨ kam mant girr dɔningt.

⁹ A i ɔsɨ dɔi ningt nõdt al, a i ɗa ɓer lod al tɔ kɨta mĩ Bɨraɓe Luwah loi, mĩ Luwah kɨ ngejang, m'a mad kɔjkum kɨta nyaɗa kɨgoot al lo bɔwg so dɔ ngangt mbã kɨdɔ ngakat kɨkõmɨta kɨ kɨkõsɔɔ lo ngékɔsɨm ta,

¹⁰ na m'a m'ɔj kamkẽ mbã ngaka kɨdub lo deg'n ndɨ tarmɨn na ndɨ ngomɨn go mberkɨndag lom.

¹¹ A i kun tɔ Bɨraɓe Luwah loi kari pãbe al, kɨta de'n kun tɔa kari pãbe a ne, Bɨraɓe a ɔrr ta dɔat al.

¹² I ngomgo ndɔ taakò kad i kɨjaɓat tit'n Bɨraɓe Luwah loi ndain mbera.

¹³ A i ɗa kɨla ndɔ kɨbojidet, a i ɗa kɨla loi tube kamt,

¹⁴ na ndɔ kɨ kõtanãimɨta i ndɔ taakò lo Bɨraɓe Luwah loi. A i ɗa kɨla mad kɨɗa kamt al bat, ke ĩ ke ngoni kɨdɨngã ke kɨdẽ, ke ɓer loi kɨdɨngã ke kɨdẽ ke mang loi, ke korro loi, ke nyakul loi mad, ke mbah kɨ kam kujt loi, kɨtakad ɓer loi kɨdɨngã, ke kɨdẽ ngahn lo taakò tit ĩ be.

¹⁵ A i ga kami dɔt, kɨta maɗi ĩ ɓer kam dɔning Ejipt't, na Bɨraɓe Luwah loi tee sei kɔ kamt kɨ tɔg jin kɨ ji kɨ la kɨ dõ. Kɨtɔ 'nten la Bɨraɓe Luwah loi ndain mber kad i ngomgo ndɔ taakò ye.

¹⁶ Ɔsɨgon bɔwi kɨ kõi tit'n Bɨraɓe Luwah loi ndai mbera kɨtakad ndɔig bɨlan, na i ngah majkurr kam dɔningt'n Bɨraɓe Luwah loi ndɨ adi.

¹⁷ A i tɔl de al.

¹⁸ A i sah dekɨdẽ kɨɗang al ho, ke a i ɗa ngaw kɨɗang al ho.

¹⁹ A i ɓoog al.

²⁰ A i manaj kɨngom dɔ madɓeit al.

²¹ A i ɗa kumndà nya lo madɓei al. A i ɗa kumndà kuj lo madɓei al, ke ndɔɔ loa, ke ɓer loa kɨdɨngã ke kɨdẽ, ke mang loa, ke korro loa, ke nya kɨ ɗi lo madɓei.

²² Ĩgɨn ten la ĩn tag'n Bɨraɓe el kɨ ngékawna losɨ tube ko dɔ mbalbot ngawden horrt kɨ kilndii kɨ lo kɨ diw kirir kɨ ndɨ ta kɨtag na la ta mad dɔt al. Ja tag'n non dɔ bar mbalt kɨjoo adɨm.

Luwah kɨ Moij dɔ Sinait

²³ Lon oon dɔ ndi ta'n tee ko kam lo kɨdiw kirirt lon mbal ndɨ õ horr ye, bɨradɔg lo girrdeg losɨ kɨ kɨbog losɨ tube ndɔt'n kɨromt

²⁴ elɨn anan: Oo, Bɨraɓe Luwah loj ɔj'j kunjɨn kɨɗangeɗeng kɨbo lon ngawden horrt. J'oo ɓone, Luwah elta kɨ de, na de'n non ndɨ kɨ dɔn dõ ɓaitɔ.

²⁵ J'a j'oi tajigla kɨtɔɗi a? Kɨtɔ horr kɨ bobe 'nten a õj. Ĩla kɨ ndɨ kɨ taakò dɔ ndi Bɨraɓe Luwah loj ɓaitɔ a ne, j'a j'oi,

²⁶ kɨta de kɨɗah ku degt'n oo dɔ ndi Luwah Ngekumkajɨr'n ndɨ elta ngawden horrt tit'n j'oon na ndɨ kɨ dɔn dõ a?

²⁷ I ndɔt nderbe, oo dɔ nya kɨ ɗi'n Bɨraɓe Luwah loj a eli kamla i tel elj ta nyag'n Bɨraɓe Luwah loj a eli nõ. J'a kɨ J'oo dɔ, na j'a kɨ ɗagoot.

²⁸ Bɨraɓe oo dɔ ndi ta losɨ lon i ndɨ elmɨn ta na Bɨraɓe elɨm an: M'oo tag'n deg'n ɗan elɨn, nyag tube kɨ elɨn ye, elɨn maj.

²⁹ Ã, kan ngarkamd i titbe kɨndɔgndɔg kad ɓoolmɨn kɨ ngomɨn ne go mberkɨndag lom kɨtakad maj urrd mbãkɨnõt, in kɨ ngandg.

³⁰ Aw, eld an: I telɨn kɨ kam kujkubgt losɨ,

³¹ na ĩ, i ɗa la be romt, m'a m'eli mberkɨnda tube kɨ mberkɨndag kɨ tagkɨgang kad i ndood kɨtakad a hɔn ɗagoot kam dɔning'n m'ndɨ m'ad'd nyakagɓet.

³² I ngomɨn go kad i hɔn ɗa nya kɨ Bɨraɓe Luwah losɨ ndasɨ mbera, ot kawɨn kokõ ke kogel.

³³ A i ndian kɨgo ɗobg tube'n Bɨraɓe Luwah losɨ ndasɨ mbera kɨtakad i ndɨn ne kɨ dɔsɨ dõ, kad maj urrsɨ na kad ndɔsɨ ĩn ngãi kam dɔningt'n a i taan nyakagɓet.