Deteronom 34 - Maktub Ta Kumkajir

Moij oi dɔ mbalbot

¹ Moij ɓai dɨlambot kɨ Moab, al dɔ mbal Nebot mbã tasom mbalbo Pisga kɨ sumba nõ Jeriko. Bɨraɓe ɔja dɔning tube ko Galaad mbã kɨ Dan,

² dɔning lo Neptali tube kɨ dɔnin lo Epraim kɨ Manase, kɨ bahbokat't ko lokudkàdt,

³ ad i dɨlalo Negeb kɨ hollot kɨ Jeriko, ɓebo kag tumburg, mbã kɨ Soar.

⁴ Bɨraɓe ela an: 'Nten i dɔning'n m'ndan yo mad Abraham, Isaak kɨ Jakob m'an: M'a mad ngankai. M'adi oo kɨ kumi, na a andt al.

⁵ Nõbe, la Moij ɓer lo Bɨraɓe oit kam dɔning Moabt kɨgo tat lo Bɨraɓe

⁶ na Bɨraɓe dɨba kam hollot mad kam dɔning Moabt'n sumba nõ Bet Peor. Mbã ɓone de kɨ ger lo duba goto.

⁷ Moij ɗa ɓal ɓu kɨ dɔjoo kamla oi. Kuma diw dĩ al, tɔga to lo tont.

⁸ Israelag n'non Moij ndɔ dɔmɨta kam dɨlambogt kɨ Moab kamla ndɔ hɔndo Moij tɨga.

Jojue ɗa kɨla got Moijt

⁹ Jojue ngon Nun ɗoosɨ kɨ ndil nyager kɨta Moij nda jin dɔat. Israelag telɨn rod go tat loa na ɗa kɨgo tat'n Bɨraɓe nda mbera Moij.

¹⁰ Ngekelta kɨta Luwaht kɨɗang kɨ ɓai kam Israelt kɨ tit Moij'n Bɨraɓe gera kum kɨ kum goto.

¹¹ De kɨ tit sia goto kad ɗa nyakɔjg tube, kɨ nyag kɨ yaya'n Bɨraɓe laan kad ɗad kam dɔning Ejipt't nõ Paraõ kɨ ɓerg loa kɨ dɔning loa tube,

¹² kɨ tɔga kɨbo kɨ kɨlag loa kɨbobo kɨ kɨkootɓool'n Moij ɗad takum Israelagt tube.