Deteronom 33 - Maktub Ta Kumkajir

Moij njang dɔ girr Israelag

¹ 'Nten la i njang dɔn Moij de lo Luwah njangɨn dɔ Israelag kete nõ koint ye. El an: Bɨraɓe ɗe ko mbalbot kɨ Sinait

² Ɓai dɔdt ko Seir ɗe rodt. Kunja unj dɔ mbalbot kɨ Parã, Ɗe kokɨro degt kɨjaɓat kɨ dubkɨlah Na ndõ horr i jikõat kɨtatɔd.

³ Bɨraɓe tar deg lon kɨjaɓat tube'n in kam jiat. Ndian dɔ bang njait, taan ta loi.

⁴ Moij adj mberkɨnda, Nyanduba lo ngékawna lo Jakob.

⁵ Bɨraɓe i ngar kam Israelt Lon bɨradɔ lo deg kawɨn na kɨnat Girr deg lo Israel tube.

⁶ Kɨ Ruben ndɨ dɔn dõ kad oi al, kad deg loa ĩn tẽbe al.

⁷ Moij elta dɔ Judat an: A Bɨraɓe oo dɔ ndi Juda, I tel sia kɨ ro degt loa Ɗɔɔ kɨ jin kɨta Israel I ɗa sia kad tuɓa madngétan.

⁸ Elta dɔ Lebit an: Adɨn Tumim kɨ Urim ji degt kɨjaɓat In i nána oon lot kɨ Masa Ĩn i maj sia ta kadmant kɨ Meriba.

⁹ Lebi elta lo kõn kɨ bɔwɨn an: M'ood al, majta ger ngankõn kɨ dɨngã Un kumɨn kɔ dɔ nganɨnt kɨta hɔ ɗago tat loi, na ngomgo kunkɔ loi.

¹⁰ Ndoon Jakob tagkɨgang loi. Ndoon Israel mberkɨnda loi lan horr nõkag kɨ kootmbĩ lan horr kadkari kɨlahorr dɔ dɨngɨrt loi.

¹¹ A Bɨraɓe, ad maj urr kɨla loa I taa kɨlaɗa jia kɨ ronel I tɨnda dun madngétaag i teet kad ngéndoora ɓain dõ gog al ta.

¹² Elta dɔ Benjamit an: I ngetar lo Bɨraɓe, a ndɨ roat kɨ lapia Bɨraɓe a ut dɔa kɨndɔgndɔg londia i mbɨna bɔgat.

¹³ Elta dɔ Jojep an: Kɨ dɔning loa ngah majkurr kokɨro Bɨraɓet nat kɨkadkari kɨmajtɔi kokɨ dõ dɔrãt kɨ ko kam dɔrãt, man kɨ girr dɔningt.

¹⁴ Kand nyag kɨmajtɔi ĩgɨn ten kɨta kàd kɨ ɔsɨ dɔdt, kand nyag kɨmajtɔi ĩgɨn andɨn kɨ nah kɨɗen

¹⁵ Kand nyag kɨmajtɔi lo mbalbo kɨmaɗi, Kand nyag kɨmajtɔi lo doorlog kɨ ɗan kɨ nõt

¹⁶ Nyag kɨmajtɔi ĩgɨn ton mbuj kam dɔningt kɨ majkurr lo ĩn i hã ndɨ kam ngart. Ad nyag 'nten ɗen dɔ Jojept Dandɔ det'n i ngar ku ngankõnt

¹⁷ Ngonderr bɔw mang loa i kɨmaj kɨtɔitɔi Gaja i gaj dɔg. Kɨ gaja la ɔsɨn girrdeg tube mbã dɔngoi dɔning Ĩgɨn ten la ĩ kɨdub kɨlahg lo Epraim Kɨ dubg lo Manase.

¹⁸ Elta dɔ Jabulont an: Jabulon i ɗa ronel dɔ teeit kɨ tɨga Isakar i ɗa ronel dɔ kuj kubt loi.

¹⁹ A kunɨn girrdeg kɨ dang dang kɨ mbalbo lod, Nu la a lan kadkarig kɨgoɗobat tit Kɨtɔ a ngahn nyamajg kɨ ton mbuj lo bahbo.

²⁰ Elta dɔ Gagt an: Majkurr kɨ dɔ det'n ad Gad lo Kɨtat, Gad to ber tit kõ tubo be, Ĩ kɨ ro kɨ ɗa woi kɨta tɔrr dã huthut ɓai dɔ njaat mbã dɔat.

²¹ Kɔt dɔning kɨmajtɔi kɨta ɗɔɔn kɨta i gaj lo bɨradɔ ngéɗɔɔg. Ɗe nat kɨ bɨradɔg lo deg, tɔlkon nyaɗa kɨdenesew lo Bɨraɓe kɨ takɨgang dɔ Israelt.

²² Elta dɔ Dant an: Dan i ngon tubo, Ko dɔning Basant la ɓait ye.

²³ Elta dɔ Neptalit an: Neptali ɓakot kɨ kamkẽ, ɗoosɨ kɨ majkurr lo Bɨraɓe, ta lokudkàd kɨ lo kɨ dɔɔ nyakagɓet.

²⁴ Elta dɔ Ajert an: Kɨ Ajer ngah majkurr ku ngan kɨdɨngãt Kɨ ngankõa kɨdɨngã tube ɔsɨn gon kɨ la njan kam yibt.

²⁵ Kɨ nyakut tabit loi i hand kɨ ningakasɨ. Kɨ tɔgi nãi roit mbã kɨ ndɔig tube.

²⁶ Kamla Moij el an: luwah kɨ tit kɨ Luwah lo Israel goto, Ndia dɔ dɔrãgt kɨ dõ kad ɗe ɗa sei, Ndia dɔ kilndiigt kam majt kɨ tɔitɔi.

²⁷ Luwah Ngéndɨ mbãkɨnõt i loyaro loi Jia kɨ to mbãkɨnõt i girrit ber, Tuɓa madngétaig kɔ nõit na el an: I tɔld kɔ.

²⁸ Israel a ndɨ lom lo ndɨnt Man kɨ ɓa lo Jakob i ta dang Kam dɔningt'n nyako man nduu tont mbuj na dɔrã loa nde tal ɗengɗeng.

²⁹ A Israel, ĩ ngeronel Nõ taan na sei, ĩ girrdeg'n Bɨraɓe aji Bɨraɓe i derrdɔg loi kɨ Ngeɗasei, i nyakat tetɗɔɔ loi Madngétaig a la dɔd ber. A i ɓa dɨngɨr lod kɨ dõ kɨ njai.