Deteronom 32 - Maktub Ta Kumkajir

Pa lo Moij

¹ Dɔrãg, i nelɨn mbisɨ na m'a m'elta. Dɔning, oo dɔ ta kɨ tamt.

² Ad nyandoo lom ur tit ndii kɨ ked be. Ad ta lom hɔ tit tal Tit ndii kɨ nyum kɨ dɔ mut kɨmbool Tit ndii kɨ tuso dɔ mbi kámgt be.

³ Kɨtɔ m'a m'la mber tɔ Bɨraɓe, Ɔsɨn gon Luwah loj

⁴ Ĩ la i mbal, kɨlaɗaa asɨnatap. Kɨtɔ ɗobg loa in kɨdenesew I Luwah kɨ ro, i kɨkanj majal, I kɨdenesew, na i rota.

⁵ In kɨ dɔd tujɨn rod Ĩn ngana al kɨtɔ majal lod. I girrdeg kɨ ngom kɨ ɗug gɔligɔli

⁶ Kɨ ɗob kɨtitbe la i ban ne Bɨraɓe yo? Ĩn deg kɨ ɓoodg, dɔsɨ goto. Ngeɗasɨ adsɨ ngang ale? Ĩ la ɓahsɨ i bɔwsɨ ale?

⁷ I ga kami dɔ ndɔgt kɨmaɗi, I gah dɔ ɓalgt kɨ ngakat kɨ ngaka, I ndɨje bɔwi na a i ɔji, Kɨbog loi tɔ a elɨn.

⁸ Lon Ngetɔitɔi ad nyanduba girrdeg Lon gang ngan deg nat, Nda ɗobning lo girrdeg kɨ dang dang kɨgo kɔr deg kɨ Israelt

⁹ Kɨtɔ gaj lo Bɨraɓe i deg loa, Jakob i gaj nyanduba loa.

¹⁰ Ngaha kam dɨlalot'n nél lat bĩbĩ Gug dɔa, na oo goa, ngoma tit kɔrkumɨn be.

¹¹ Tit kuro'n oon go kuj lon, ɔrr bɔgɨn gugɨn dɔ nganɨn. Tee bɔgɨn ɔidɨn ad nganɨn ton dɔ bɔgɨnt.

¹² Bɨraɓe kɨ kɨɗanbe la ɔrr ta ɗob, luwah mad kɨmbah goto sia.

¹³ Ada aw dɔ logt kɨ dõ kɨ dɔningt, Israel sa kand nya kɨ ndɔɔt Ada ning tej kɨ kam mbalt Yib tee kam mbalt kɨngang.

¹⁴ Yib mangg kɨmbah batg nat kɨ mbool ngan batg Ɓut nyakulg kɨ Basan nat kɨ bĩãg nat kɨ nyako gem kɨmaj. Ãi man nduu kɨkɨre.

¹⁵ Israel bo lublub na ɓa kɨ njan, Roi bo mbulmbul, mbooli i ngãi. Na nya Luwah Ngendahn kɔ, Kid Mbal kaj lon.

¹⁶ Sɔkɨna ad jang ɗaa kɨta luwah kɨɗang, Adɨna ɓawong kɨta kɨlaɗad kɨyerr.

¹⁷ Jan kadkari adɨn ndil kɨyerr, ĩgɨn ĩn luwah al. Adɨn kadkarig luwahg'n gerɨnd al, Luwah kɨkij'n ɗen tajigla ɓaitɔ ĩn bɔwsɨg ɓoolɨnd al bat.

¹⁸ I nya mbal kɨ ngekooj kɔ, kami oi dɔ Luwaht kɨ ngeɓahi

¹⁹ Bɨraɓe oo kɨla ɗad, na mbetd kɨta sɔkɨn ngana kɨdɨngãg kɨdẽg sɔkɨna.

²⁰ El an: M'a ɓɔ takum'm kɔ rodt kad m'oo ke dɔboid a to titbãi a? Kɨtɔ ĩn ngaka kɨɗug gɔligɔli, In ngang'n rota goto kamdt.

²¹ Sɔkmɨn kɨ nya kɨ i Luwah al ad jang ɗam ndun wong lom kɨta yog lod. Mĩ tɔ m'a m'sɔkɨd ad jang ɗad kɨta deg'n in girrdeg al, M'a m'ndu wong lod kɨtɔ in girrdeg kɨ goosɨ losɨ goto.

²² Horr ndɨ õ kɨta wong lom kɨ tɨngabil Ndɨ õ mbã koo, ndɨ õ dɔning kɨ kand nyag kɨ tit, ndɨ õ girr mbalbog.

²³ M'a m'ũ nyag kɨ majal kɨdɔdt M'a m'ur kɨrãg lom tube kɨ dɔdt

²⁴ A nyàmɨn kɨta ɓoo kɨ õd Yokoosɨ kɨmajal a tɔld M'a m'la kɨ nyag ngekɔrrkɔdber kam buningt.

²⁵ Nyakat a tɔld kɔ tɨga kam kujt ɓool a tɔld sɔkɨr A nujɨn takɨɗabe, basa kɨ ngomand, Ngon kɨ tambaht kɨ bɨga kɨ dɔ ndà

²⁶ M'el m'an: M'a m'tɨnda m'tĩd kɔ sãi, M'a m'ɔrr ga kam kɔ ku degt

²⁷ Na m'oo m'an: Madngéta a kidɨm ngendɔɔ a ger girr nya 'nten al ad oo anan: Kɨ tetɗɔɔ kɨta tɔg jij na ĩ Bɨraɓe hã i ɗa nya 'nten al.

²⁸ I girrdeg kɨ takɔj lod goto ger girr nya goto kamdt tɔ.

²⁹ Neni gerɨn girr nya a ne, ni a gerɨn girr nya 'nten, na a gan ta dɔ nyat kɨ a tee dɔdt

³⁰ Titbãi de kɨɗabe asɨ tuɓa deg dub ke deg joo be asɨn tuɓan deg dub kɨlah a? Kɨtɔ mbal lod ndugod kɔ Bɨraɓe tĩ nyad kɨnõbe

³¹ Kɨtɔ mbal lo girrdeg i tit mbal loj Madngétaj kɨdɔd oo titbe,

³² Kɨtɔ dĩ nduu lod i dĩ nduu kɨ Sodomt, I kam ndɔɔgt lo Gomor Bɨra kand nduu lod ĩ kɨ katbang, bɨra kand nduu lod ĩ kĩ tɔl de.

³³ Kasɨ nduu lod i wong li I wong ngandam kɨmajal

³⁴ M'ngom nya 'nten romt ale? M'ɓɔa kam longom nyamajgt lom ale?

³⁵ Ndangɨra i lom, m'a m'ga gira, kaglot'n njad ɗa ndadɨn ngãi, ndɔt kɨ nujkɔ lod a ɗe nderbe, nyakɨto kɨ a ɗad a to kɔkɨ al.

³⁶ Bɨraɓe a gangta lo deg lon lon oo tɔgd goto, de kɨɗa nãi al, ɓer ke detanyan.

³⁷ Kamla a el an: Yog lod'n ɗah mbal'n yan rod tit i ɗah a?

³⁸ Yog lod'n non san mbool dã kadkari kɨjakɔ na ãin kasɨ nduu kadkari nyakãi lod a? Ad'd ɓai dõ kad ɗan sesɨ, ad'd telɨn loyaro.

³⁹ Oon tajigla, i mĩ la mĩ Bɨraɓe Luwah mad kɨɗang goto M'tɔl na mad kumkajir Mad dɔ na m'yoot De kɨ asɨ kug nya kɔrr jimt goto.

⁴⁰ Kɨtɔ m'la jim kɨ dõ dɔrãt m'ndan yo m'an: M'ndɨ kɨ dɔm dõ mbãkɨnõt.

⁴¹ Ĩla m'a m'ɔl ta kiyaɗɔɔ lom ad ndulo at pepep na takɨgang i jimt a ne, M'a m'nda ngɨra dɔ madngétamgt, M'a m'ga kɨrã ngékɔsɨmta.

⁴² M'a mad mosɨ ɗa kɨrãg lom tit kasɨ be, na kiyaɗɔɔ lom a sa dãd, mosɨ deg kɨ tɔlɨnd, kɨ hɔnd loɗɔɔt, deg'n bisɨ dɔd ngal ngãi al.

⁴³ Ĩn girrdeg, i ndubɨn deg lo Bɨraɓe Kɨtɔ Luwah nda ngɨra dɔ mosɨ ɓergt lon Ndangɨra dɔ madngétangt Na oo kumtondo lo dɔning lon kɨ deg lon.

Moij aw dɔ mbalbo kɨta koi

⁴⁴ Moij nat kɨ Jojue ngon Nun, eltag tube kɨ kam pat'n ten kɨ mbi degt

⁴⁵ na lon Moij tɨga keltag 'nten tube nõ Israel kɨtaagbe ye,

⁴⁶ eld an: I ndan kamsɨ dɔ tagt 'nten tube'n m'manaja kusɨt ɓone kad i ndan mbera ngansɨg kɨtakad ngomɨn go kɨ hɔ ɗan go tag tube lo mberkɨnda 'nten.

⁴⁷ Kɨtɔ i nya kɨkari rosɨt al, i kumkajir losɨ. Kɨtakula a i ndɨn ne kɨ dɔsɨ ndɔ ngãi kam dɔningt'n a i gangɨn bah Jurdẽ kɨta taa nyakagbɓet.

⁴⁸ Ndɔt'n non la Bɨraɓe elta Moij an:

⁴⁹ Aw dɔ mbalbo Abarim, mbalbo Nebo, kam dɔning Moab sumba nõ Jeriko, na i nɔl dɔning Kana in m'ndɨ mad Israelag nyakagɓet

⁵⁰ A i oi dɔ mbalbot'n i ndɨ al dɔt, a awɨn sei, ro degt loi tit'n ngonkõi Aarõ oin dɔ mbalbot kɨ Horr, na awɨn sia ro degt loa,

⁵¹ kɨta i ɗan majal ndoormɨm ne dan Israelagt kad man kɨ Meriba, ad i Kades, kam dɨlalot kɨ Sin, kɨta i ɔsɨn gonɨm dan Israelagt al.

⁵² A oo dɔning'n ɗan nõit na a and kam dɔningt'n m'ndɨ mad Israelag al.