Deteronom 31 - Maktub Ta Kumkajir

¹ Moij aw eltag 'nten kɨ Israelag tube an:

² Ɓone m'ɗa ɓal ɓu kɨ dɔjoo, nẽbe kɨ nõt m'asɨ tee ho kand ho al, na Bɨraɓe elɨm an: A i gang bah Jurdẽ'n ɗan al.

³ Bɨraɓe Luwah loi kɨ dɔn a gang bah nõit, a nuj girrdeg'n non nõit kad i taa lo lod, na Jojue a ndia nõit tit'n Bɨraɓe elɨn.

⁴ Bɨraɓe a ɗa kɨ girrdeg'n non tit'n ɗa kɨ ngar kɨ Sihõ kɨ Og ngar lo Amoriag'n nujd kɨ dɔning lod.

⁵ Bɨraɓe a lad jisɨt kad i ɗan sed kɨgo tat'n m'ndasɨ mbera.

⁶ Iren kamsɨ, i hɔn tɔgsɨ bá, ot ɓoolɨn, ot kad kɨngasa gasɨ kɨtatɔd, kɨta Bɨraɓe Luwah loi kɨ dɔn a ndia nat sei, a nyài kɨnõbe al, a lai kɔ al tɔ.

⁷ Moij kun Jojue ela ta nõ Israelagt tube an: Ire kami, i hɔtɔgiba, ĩla a ad'd taan dɔning'n non nyakagɓet ye.

⁸ Bɨraɓe kɨdɔn a ndia nõit, ĩ kɨɓe kɨdɔn a i nat sei, a nyài kɨnõbe al, lai kɔ al tɔ. Ot ɓool, ot kad kami gang man.

Kɔj kɨta da mberkɨnda

⁹ Moij ndang mberkɨnda 'nten kam maktubt, na la ji Lebiagt ngéjamosɨ'n ton sund kunkɔ lo Bɨraɓe, kɨ kɨbog tube lo Israel.

¹⁰ Moij ndad mber an: Dɔboi ɓal kɨtanãimɨta kɨɗen, kaglo ɓal taanyadõt, kaglo ɗa nah kujkamt,

¹¹ lon Israelag tube a ɗen kɨ nõ Bɨraɓe Luwaht loi kam lot'n kɔt a ne, a i da mberkɨnda 'nten nõ Israelgt tube kad oon maj.

¹² A i kaw deg tube kɨ nat, kɨdɨngãg kɨ kɨdẽg, ngang kɨ mbah ngéndɨ kam ɓet loi, kad i oon dɔ, na i ndoon ɓool Bɨraɓe Luwah losɨ, kɨ ngomɨn go, na hɔn ɗa got tagt tube lo mberkɨnda 'nten.

¹³ Ngandg'n gerɨn al a oon dɔ, a ndoon ɓool Bɨraɓe Luwah losɨ kaglo tube kɨ a i ndɨn ne kɨ dɔsɨ dõ kam dɔningt kɨ a i taan nyakagɓe got'n i gangɨn ne bah Jurdẽ woi.

Israel a nya Bɨraɓe kɔ

¹⁴ Bɨraɓe el Moij an: Oo ndɔ koi i nderbe. I kun Jojue, na awɨn kam kujkub ndɔdnat kɨtakad m'ndaa mber tag lom. Moij kɨ Jojue awɨn kam kujkub ndɔdnat,

¹⁵ na Bɨraɓe tee kam kujkubt kam pilie kilndiit, na pilie kilndii duba tabit kujkubt.

¹⁶ Bɨraɓe el Moij an: Oo, a i to nat kɨ bɔwig na deg'n ɗan a ɓain kad ɗan kaya kɨ luwahg kɨ mbahg kam dɔningt'n i ndɨ andɨnt. A nyàmɨn kɔ, na a gangɨn na kɨ kunkɔ'n m'un sed.

¹⁷ Ndɔt'n non wong lom kɨ tɨngabil a ɓai so dɔdt, m'a m'ya takum kɔ rodt. A sand na nya kɨ majal kɨ dang dang kɨ kamkɔlg a ɗen dɔdt mbã a elɨn ndɔt'n non anan: Nya kɨ majal 'nten a ɗen dɔjt kɨta Luwah loj goto denjt, titbe ale?

¹⁸ Ndɔt'n non m'a m'ɓɔ takum'm rodt kɔ rota, kɨtɔ majal tube'n kɨ ɗan kɨta awɨn go Luwahgt kɨɗang.

¹⁹ Tajigla i ndangɨn pa 'nten kad ndoon Israelag, i nda pa 'nten tadt kɨtakad tel nya manaj lom kɨdɔ Israelagt.

²⁰ Kɨtɔ lon m'and sed woi kam dɔningt'n m'unɨn kɔm kɨ yokɨnda mad bɔwdg kɨ m'ad'd dɔning'n mba kɨ tej nũnt, a san a ndenɨn, rod a bo mbulmbul, kamla a tel awɨn go luwaht kɨɗang, ɗan ɓer lod. A kidmɨn na a gangɨn na kɨ kunkɔ lom.

²¹ Kamla lon nyag kɨ majal kɨ kamkɔlg son dɔdt ngãibe son dɔdt pa 'nten a i nyamnaj kɨ dɔdt (pa 'nten a to ta ngakaadt kad kamd oi dɔ al) kɨta m'ger kɔjtaɗa lod'n ndɨ ɔjɨn ɓone, kete lon m'and sed kam dɔningt al ɓaitɔ, dɔning'n m'unɨn kɔm kɨ yo kɨnda kɨ m'ad'd.

²² Titbe Moij ndang pa 'nten ndɔt'n non na ndoo Israelag.

²³ Bɨraɓe ndamber Jojue ngon Nun an: Ire kami, i hɔtɔgiba, kɨta ĩ la a and kɨ Israelag kam dɔning'n m'unɨn kɔ kɨ yokɨnda kɨ m'ad'd na m'a mĩ nat sei.

²⁴ Lon Moij tɨga tag lo mberkɨnda 'nten kam maktub kɨtaagbe ye,

²⁵ Moij ndah Lebiag ngéto sund kunkɔ lo Bɨraɓe an:

²⁶ Unɨn maktub mberkɨnda 'nten, i lan kad sund kunkɔt lo Bɨraɓe Luwah losɨ kad i nya manaj dɔsɨt nu,

²⁷ kɨta m'ger taaɗɔ loi kɨ dɔngang loi. Ĩla i taaɗɔ Bɨraɓe lon mĩ'n kɨ dɔm dõ kusɨt ɓaitɔ a ne, dɔ koimt a to titbãi a?

²⁸ I kawɨn bɨrabɔwg lo girrdeg losɨ tube kɨ romt kɨ mbaiɓe losɨ kad m'eltag 'nten kɨ mbidt, na m'a m'un kumm kɨ dɔrãt kɨdɔning kad ĩn ngémanaj dɔdt,

²⁹ kɨtɔ m'ger go koimt a ne, a i tujɨn rosɨ, a i tɔn ɗob'n m'ndasɨ mbera, na majal a ngahsɨ kam ndɔgt kɨ a ɗen kɨtɔ i ɗan majal takum Bɨraɓet kad i sɔkɨna kɨtakul kɨlaɗa jisɨ.

³⁰ Kamla Moij eltag kɨ kam pat 'nten kɨ mbi ngékawnat lo Israel.