Deteronom 3 - Maktub Ta Kumkajir

Israel tetɗɔɔ Og

¹ Kamla kɨ tel, j'un ɗob kɨ kaw Basan na Og, ngar kɨ Basan tee ndɔdj kɨ deg lon tube kɨta ɗɔɔ sej ɓebot kɨ Edrei.

² Bɨraɓe elɨm an: Ot ɓoola kɨta m'laa jiit kɨ deg loa tube kɨ dɔning loa. A i ɗa sia tit'n i ɗan kɨ Sihõ ngar lo Amoriag'n ndɨ Hesbont.

³ Titbe Bɨraɓe Luwah la Og, ngar kɨ Basan jijt nat kɨ deg loa tube. Kɨ tɔla na kɨ nya de loa kɨɗa kɨ dɔa dõ al.

⁴ Kaglo'n non kɨ ta ɓebog loa tube, ɓebo kɨɗan kɨ ta jiat al goto, ɓebog tube asɨn dɔtanãimɨta dɔning Argob, kõɓe lo Og kam dɔning Basant.

⁵ Ɓebog'n non tube, ɗan ad in kɨngang kɨ ndogbɔrrg kɨ ngal, kɨ tabit handg. Ɓe madg ĩn oo ngãibe tɔ kɨkanj ndogbɔrr.

⁶ Kɨ nujd tube tit'n kɨ ɗa'n kɨ Sihõ ngar kɨ Hesbon. Kɨ nuj ɓeg'n non tube nat kɨ dekɨdɨngãg kɨ dekɨdẽg kɨ ngang,

⁷ na kɨ ngom dãg tube kɨ kɨ hɔ taɗɔɔt kɨ kam ɓegt kɨtatɔj.

Moij keg dɔning kɨ Galaad

⁸ Kaglot'n non kɨ taa dɔning lo ngarg kɨjoo lo Amoriag'n ndɨn gid bah Jurdẽt ko bah Arnõt mbã, kɨ mbalbo Hermõ,

⁹ (Sidõiag kunɨn tɔ Hermõ Sirion na Amoriag kunɨn tɔa Senir)

¹⁰ ɓebog tube kɨ dɨlambot, kɨ Galaad tube, kɨ Basan tube, mbã Salka kɨ Edrei, ɓebog lo kõɓe lo Og kam Basant.

¹¹ Og, ngar kɨ Basan, kɨ kɨɗanbe la nãi ku Rapayagt. Tɨra loa i tɨra hand, na tɨra'n non ndɨ i Rabat, ɓebo lo Amoniag? Ngala i metɨr sɔɔ, tata i metɨr joo.

Kegɨn dɔning Basan kɨ Galaad adɨn girrdeg lo Ruben, kɨ Gad kɨ gaj girrdeg lo Manase

¹² Kaglot nõ kɨ ta dɔning nyakagɓet, na mad dɔning Rubeniag kɨ Gadiag ko Aroer bah Arnõt kɨ nusɨ dɔning mbal kɨ Galaadt nat kɨ ɓebog loa.

¹³ Ndeg dɔning Galaad kɨ dɔning Basan tube'n i kõɓe lo Og, ad i dɔning Argob tube, mad nusɨ girr Manase. Dɔning Basan kɨtaagbe in deg kunɨna dɔning lo Rapaiag.

¹⁴ Jair ngon Manase taa dɔning Argob tube mbã kɨ ɗobnin dɔning lo Gersuriag kɨ Makatiag, na ndah tɔ dɔ ngan ɓegt kɨ Basan ad kunɨnd: Ɓeg lo Jair mbã ɓone.

¹⁵ Mad Makir dɔning Galaad.

¹⁶ Mad Rubeniag kɨ Gadiag nusɨ dɔning Galaad mbã kɨ bah Arnõ. Ngawden bah i ɗobnin dɔning lod na aw mbã kɨ bah Jabok, ɗob nin lo Amoniag.

¹⁷ M'ad'd dɨlalo'n ɗobnina i bah Jurdẽ ko Kineret mbã dɨlalo kɨ bahbot, ad i Bahbo Kat, mbã kad mbalbo Pisga ko lokudkàdt.

¹⁸ Kaglot'n non m'ndasɨ mber man: Bɨraɓe Luwah losɨ adsɨ dɔning'n ɗan kad i taan nyakagɓet. In ngéɗɔɔg tube i ɗan rosɨ kɨ nyakatg, i ndian nõ ngankõsɨ Israelagt.

¹⁹ Na nẽsɨg kɨ ngansɨg kɨ ɓut nyakulg losɨ, m'ger nyakulg losɨ in ngãibe, a ndɨn kam ɓebogt'n m'adsɨ

²⁰ mbã Bɨraɓe ad ngankõsɨ lo taakò tit'n adsɨn ne be kad in tɔ õn nduba dɔning'n Bɨraɓe Luwah losɨ ad'd gid bah Jurdẽt. Dekɨɗen kusɨt a tel kɨ kam nyandubat lon'n m'adsɨ.

²¹ Kaglot'n non m'nda mber Jojue m'an: Kumi oo nyag tube'n Bɨraɓe Luwah losɨ ɗa kɨ ngarg kɨjoo'n non. Titbe tɔ la Bɨraɓe a ɗan kɨ kõɓeg tube'n a i tɔint.

²² Ot ɓoolɨnd kɨta Bɨraɓe Luwah losɨ kɨdɔn a ɗɔɔ kɨtɔsɨ.

Moij and kam dɔning Kanat al

²³ Kaglot'n non tɔ m'ko Bɨraɓe m'an:

²⁴ Bɨraɓe Luwah i mbagɨr kɔj ɓer loi bo loi kɨ tɔg jii kɨta luwah mad kɨdɔrãt ke kɨdɔningt kɨ asɨ ɗa kɨlag'n i ɗa i ɗah a? I nyam ad m'aw m'oo dɔning kɨmajg'n non ĩn aw mbã tee gid bah Jurdẽt ko nu kɨ dɔning kɨmajg'n non kɨ mbal kɨ dɔning Libãt tɔ.

²⁵ M'kɔi kɨ i nyam adɨm m'tɔi m'oo dɔning kɨmaj kɨ gid bah Jurdẽt kɨ mbal kɨmaj'n non kɨ dɔning Libã tɔ.

²⁶ Na Bɨraɓe ɓa sem wong kɨtatɔsɨ, oo dɔ ko lom al na elɨm an: Asɨ ta, ot kelɨm ta nya 'nten gog,

²⁷ Al dɔ mbalbo Pisgat, un kumi kɨ dõ oon lo kɨlokudkàd kokõ kɨ kogel kɨ kɨjikõ kɨ kɨloɓakàd, oo dɔning'n non kɨ kumi kɨta a i gang bah Jurdẽ al,

²⁸ na i ndamber Jojue, ada tɔg kɨ ngang kɨta Jojue la a ɔrr nõ deg kad ad'd dɔning'n oo nõ nyakagɓet.

²⁹ Kɨtɔ 'nten la kɨ ndɨn kam hollot kɨ sumba nõ Bet Peor ye.