Deteronom 29 - Maktub Ta Kumkajir

Moij tɔsɨ ndool Israelag

¹ 'Nten la ĩn tag lo kunkɔ'n Bɨraɓe nda mbera Moij kad un kɨ Israelag kam dɔning Moabt, go kunkɔt kɨ un sed mbal Horebt.

² Moij kun Israelag tube na eld an: Oon nyag tube'n Bɨraɓe ɗa kɨ Paraõ kɨ ɓerg loa kɨ dɔning loa tube takumsɨ kam dɔning Ejipt't.

³ Nyanág kɨbobo kɨ nyakɔjg kɨ nyag kɨ yaya kɨbobo'n non, ĩgɨn oon kɨ kumsɨ,

⁴ na mbã Bɨraɓe adsɨ ngarkam kad i gerɨn ne girr nya, awɨn kɨ mbi kad oon ne dɔ ta al.

⁵ M'ɔrrsɨ ta ɗob kam dɨlalot asɨ ɓal dɔsɔɔ, na kubg losɨ ngisɨ al, sa kɨ njasɨt riyo al ho.

⁶ I san bɨna al ho, i ãin kasɨnduu, ke kasɨ kɨ ong al kɨtakad i gerɨn ne kad mĩ Bɨraɓe Luwah losɨ.

⁷ Kamla i ɗen kam lot'n ɗan, na Siõ ngar kɨ Hesbon kɨ Og ngar kɨ Basan teen ɗɔɔn sej, na i tetɨn ɗɔɔ,

⁸ kɨ taa dɔning lod jad Rubeniag kɨ Gadiag kɨ nusɨ girr Manase nyandubat.

Majkurr a ɗe go telrogotat

⁹ Kɨtɔ 'nten i ngomɨn go tag lo kunkɔ 'nten, i hɔn ɗagoot kɨtakad maj urrsɨ dɔ kɨlaɗasɨt tube.

¹⁰ Kamla Moij el an: Ɓone, ĩn tube i ɗan nõ Bɨraɓe Luwaht losɨ, in kɨ bɨradɔ girrkoojg losɨ kɨ kɨbog losɨ kɨ mbaiɓeg losɨ kɨ dekɨdɨngãg lo Israel tube.

¹¹ Ngansɨg kɨ nẽsɨg kɨ mbah kɨ ndɨ kam londɨt loi, ngega kir loi kɨ ngeto man loi,

¹² kad and kam kunkɔt lo Bɨraɓe Luwah loi'n, in un adi kɨ yokɨnda ɓone,

¹³ kad n'ndai ɓone kad ĩ girrdeg lon, na nĩ kɨ dɔn, nĩ Luwah loi tit'n ndan yo ad bɔwig Abraham, Isaak kɨ Jakob.

¹⁴ I kɨtɔsɨ kɨɗabe hã m'unɨn kɔm mad kɨ yokɨnda al.

¹⁵ Na i nat kɨ de'n ɗa nat sej ɓone al, kɨ de'n ɗa sej nõ Bɨraɓe Luwaht ɓone tɔ.

Ndakɔj a ɗe go ɗagootat al

¹⁶ I gerɨn tit'n kɨ ndɨn Ejipt't tit'n kɨ tɔin ku girrdeg'n i ndan dɔningg lod i gangɨn.

¹⁷ Oon nyag kɨyerr lod'n ɗan kɨ kag kɨ mbal kɨ nar arjã kɨ nar ɔr kam ɓegt lod.

¹⁸ Oon go rosɨ maj, na ɓeta dekɨdɨngã ke dekɨdẽ, ke girrnooj, ke girrkooj mad kusɨt ngarkama nyàgo Bɨraɓe luwah loj kɔ, na aw ɗa ɓer lo yog lo girrdeg'n non. Ot kadɨn ngɨra kag kɨ tee kɨ wong kɨ kand kɨ katbang ɓa kusɨt

¹⁹ ad de mad oo dɔ tag lo kunkɔ kɨ yokɨnda 'nten ĩ kɨ dɔn hit ron kamɨnt an: Ke neni m'ndia kɨgo kammt kɨ kongkong kaa m'a m'ngaa lapia.

²⁰ Bɨraɓe a nyàgo majal lo de'n non al, na sa wong kɨ jang lo Bɨraɓe a su luilui dɔ det'n non, ndɔlg tube'n ndangɨn taa kam maktub 'nten a son dɔat, Bɨraɓe a tɔl tɔa kɔ girr dɔrãt.

²¹ Bɨraɓe a ɔrr de'n non ta dang ku girr Israelagt, kad nya kɨto ɗaa kɨgo ndɔlgt tube lo kunkɔ kɨ ndang kam maktub mberkɨnda 'nten.

²² Ngaka kɨ a ɗen, ngansɨg kɨ a ɓai gosɨt kɨ mbah kɨ a ɗe ko dɔningt kɨ sãi, lon oon yokoosɨ kɨ dɔningt kɨ mõig'n Bɨraɓe ndan deg kɨ dɔningt'n ɗan, lon oon dɔning kɨtaagbe kɨ supɨr kɨkat,

²³ got horrt duwɨn nya ko tit al, ndɔɔn nya mad kam al, mũ mad a ɓa tit al, nuj tit Sodom kɨ Gomor. Adma kɨ Seboim'n Bɨraɓe nujd kɨ wong lon kɨ tɔl sɔkɨr.

²⁴ Ã girrdeg tube a elɨn anan: Kɨtɔɗi Bɨraɓe a ɗan nya kɨtitbe kɨ dɔning'n ɗan a? Girr wong kɨ tɨngabil kɨbobe 'nten i ɗi a?

²⁵ Deg a turɨn anan: Kɨtɔ nyan go kunkɔ lo Bɨraɓe Luwah lo bɔwdg'n un sed lon teen sed dɔning Ejipt't kɨtɨga.

²⁶ Kɨtɔ awɨn ɗan ɓer lo yog, ɔsɨn dɔd ber nõdt tɔ, yog'n gerɨnd al, Bɨraɓe adɨnd al tɔ,

²⁷ na Bɨraɓe net deg'n ɗan dɔningt lod kɔ kɨ wong kɨtɔlsɔkɨr kɨ kɨtɨngabil, lad kɔ dɔningt kɨɗang tit'n ndɨ oon ne ɓone.

²⁸ Nya kɨmund i lo Bɨraɓe Luwah loj, na nyag kɨ tee dɔ i lo nganjg mbãkɨnõt kad kɨ hɔ ɗagoot tagt tube lo mberkɨnda 'nten.