Deteronom 28 - Maktub Ta Kumkajir

Majkurrg kɨdɔ telrogotat

¹ Ĩla i tel roi go ndɨ tat lo Bɨraɓe Luwah loi ad i ngomgo mberkɨndag loa tube'n m'ndai mbera ɓone a ne, Bɨraɓe Luwah loi a tɔii kɨ dõ dɔ girrdegt kɨ dɔningt tube.

² Majkurrg 'nten tube a ɗen dɔit na a ĩn gaj loi ĩla i tel roi go ndɨ tat lo Bɨraɓe Luwah loi.

³ Maj a urri kam ɓet, maj a urri kam ndɔɔt.

⁴ Maj a urr ngan kami kɨ kand dɔning loi kɨ ɓut nyakulg loi, ngan mangg loi kɨ ngan batg loi.

⁵ Majkurr a i dɔ jangt loi kɨ bii kusɨ nduj loi.

⁶ Maj a urri dɔ telit kɨ ɓe, na maj a urri dɔ teeit kɨtɨga.

⁷ Bɨraɓe a adi tetɗɔɔ madngétai ĩgɨn a ɓain kɨ ɗɔɔ kɨdɔit. Ĩla ɗen kɨ ɗob kɨɗa, ɓet a ãin na nõit kɨ ɗob tanãimɨta.

⁸ Bɨraɓe a ndamber majkurr dɔit dɔ damgt loi kɨ dɔ kɨla ɗa jiit tube, na a ad maj urri kam dɔning'n Bɨraɓe Luwah loi ndɨ adi.

⁹ Bɨraɓe a adi ngàng ngang kad i girrdeg kɨjaɓat kɨta ɗɔɔn tit'n ndan yo adi, ĩla i ngomgo mberkɨndag lo Bɨraɓe Luwah loi na i ndia go ɗobgt loa.

¹⁰ Girrdeg tube kɨ dɔningt a gerɨn ta kad Bɨraɓe ndahsɨ kɔt ko kɨɗa kɨta ɗa kɨlaɓer kadɨn, na a ɓoolɨn.

¹¹ Bɨraɓe a ad majkurr to mbuj kɨdɔit kɨ dɔ ngan kamit, kɨ ɓut nyakulg loi kɨ kand dɔning loi kam dɔning'n Bɨraɓe ndan yo ad bɔwig kɨ n'adi.

¹² Bɨraɓe a tee longom nyamajg lon kɨ dɔrãt adi kɨ n'ad man ndii ed dɔningt loi dɔkagat kad njangɨn dɔi kam kɨlaɗa jiit tube. Girrdeg kɨ dang dang a taan nyatɨna jiit na in, a I tɨnad nya al.

¹³ Bɨraɓe a ndai kad ĩ dɔ na ɓong al. Kɨndɔgbe a aw kɨ dõ, na a i tel kɨber al, ĩla i tel roi go mberkɨndagt lo Bɨraɓe Luwah loi'n m'ndai mbera ɓone na i ngom god maj kad i hɔ ɗagoot.

¹⁴ Ĩla i tɔ kokõ, ke kogel al dɔ tagt'n m'ndai mbera ɓone, kad i aw go luwahgt kɨɗang, kad i ɗa ɓer lod.

Kand majal lo telrogotat al

¹⁵ Na ĩla i tel roi go ndɨ tat lo Bɨraɓe Luwah loi al, i ngomgo mberkɨndag loa kɨ tagkɨgang loa'n m'ndai mbera ɓone al a ne, oo maj, ndɔlg'n non tube a son dɔit, a dan kumi ndo.

¹⁶ A ĩ, kɨndɔl kam ɓet, a ĩ kɨ ndɔl kam ndɔɔt.

¹⁷ Ndɔl a i dɔ jangt loi kɨ dɔ bĩt loi.

¹⁸ Ndɔl a i dɔ ngan kamit kɨ kand dɔning loi kɨ ngan mangg loi kɨ ngan batg loi.

¹⁹ Ndɔl a i dɔ telit kɨ ɓe, ndɔl a i dɔ teeit kɨtɨga.

²⁰ Bɨraɓe a la kɨ ndɔl kɨ rondad kɨ ndang kɨdɔit kɨ dɔ kɨlaɗa jiit tube kad i tuj kɨ nuj kɔ tentenbe kɨta kɨlaɗai kɨmajal, na kɨta i nya Bɨraɓe kɔ.

²¹ Bɨraɓe a ad yokoosɨ nyàgoi al mbã kad i goto kam dɔningt'n i ndɨ awt kad i taa nyakagɓet.

²² Bɨraɓe a ndai kɨ mõi kesɨ, mosɨ kɨ dɔga, kɨ ro kɨtɨngabil, kɨ laa kɨ mõi kɨ tɔl nyako kɨ turo kɨ hɔ kum nyako kad ndulon goi mbã i nuj.

²³ Dɔrã kɨ dõ dɔit a tel tit ningakasɨ be na dɔning'n to girr njait a i tit hand be.

²⁴ Bɨraɓe a ad ndii kɨ ed dɔningt loi, i tit buning be, a so dɔit kɔ dõ dɔrãt mbã nuj kɔ.

²⁵ Bɨraɓe a ad madngétai tetɨnɗɔɔ, a i tee ndɔd'd kɨ ɗob kɨɗa, na a i tee ãin nõdt kɨ ɗob tanãimɨta. A ĩ nyakɔsɨta kɨro kõɓegt tube kɨ dɔningt.

²⁶ Nini a tel nyasa lo yelg kɨ dõ kɨ dãg kɨmut, na de mad kɨta tuɓad kɔ goto.

²⁷ Bɨraɓe a ndai kɨ ngawg kɨ Ejipt't kɨ dobaig kɨ ngɔk kɨ ngorwoi kɨ i a asɨ yoot al.

²⁸ Bɨraɓe a ndai kɨ mõi nyahan kɨ mundo kɨ dɔ kɨtel wãri.

²⁹ A i mom lo dan kada tit de kɨmundo a momɨn lo kam lo kɨdiwt. Maj a uri dɔ kɨlaɗait al, a dan kumi ndo, a tirɨn nyag loi pur kɨndɔgndɔg, na de mad kɨ ngeɗasei goto.

³⁰ A i hɔ dɔ dekɨdẽ, na de kɨɗang a taa. A i ɗa kuj, na a i andt al. A i hɔ ndɔɔ nduu, na a i ja kanda al.

³¹ A jan kɔ mang loi takumit, na a i sa dãã al, deg a hɔn korro loi kɨlo ngetɔgt takumit, na a telɨn sia adin al, a adɨn batg loi madngétaig, na de mad kɨ ngeɗasei goto.

³² A lan ngani kɨdɨngã kɨ kɨdẽ ji girrdegt kɨɗang, ndɔ kɨɗen a i ur kumi kɨgodt, kumi a mẽ na jii a asɨ ɗa nya mad al.

³³ Girrdeg kɨ i gerd kete al, a sa kand dɔning loi kɨ kand kɨla loi, a dan kumi ndo, a rigɨjɨn dɔi kɨ ndɔgndɔg.

³⁴ Mbã nya a hãni kɨta nyag kɨ kumi oo.

³⁵ Bɨraɓe a ndai kɨ ngawg kɨmajal kɨ a asɨ yoot al, dɔgojt kɨ dɔ bɨngit, mba girra danjait mbã kɨ dandɔit.

³⁶ Bɨraɓe a aw sei, ĩ kɨ ngar loi kɨ i ndaa dɔit, kɨro girrdegt'n i gerd kete al, ĩ ke bɔwig. Nu la a i ɗa kɨlaɓer ad yo kagg kɨ mbalg ye.

³⁷ A ĩ nya kɨya kɨ nyakid kɨ nya godɔt kɨro girrdegt tube'n Bɨraɓe a aw sei rodt.

³⁸ A i dub kumnya ngãi kam ndɔɔt loi, na a teet tẽbe kɨta kɨbetg a nujɨna kɔ.

³⁹ A i hɔ nduu, a i ndɔɔ kama, na a ãi mana al, a i ja kanda al tɔ, kɨta kurg a san.

⁴⁰ Kag olibg a ĩn ngãibe kam dɔningt loi, na a wur roi kɨ yiba al, kɨta kand kag olibg loi a urɨn kɔ.

⁴¹ A i ooj ngan kɨdɨngã kɨ kɨdẽg, na a ĩn kɨ loi al, kɨta a awɨn sed ɓert.

⁴² Kɨbetg a san kand kagg kɨ kand nyag tube 'nten dɔningt loi.

⁴³ Mbah'n ndɨ ɓe loi a aw kɨ tɔg kɨndɔgndɔg na ĩ tɔgi, a i tel kɨ ber kɨndɔgndɔg.

⁴⁴ A i tɨna nya jiat, na a tɨna nya jiit al, a i dɔ, na a in ɓonga.

⁴⁵ Ndɔlg'n non tube a ɗen dɔit, a tuɓan goi mbã dan kumi ndo kad i tuj kɔ, kɨta i tel roi go ndɨ tat lo Bɨraɓe Luwah loi al, na i ngomgo mberkɨndag kɨ tagkɨgang ĩn ndai mbera al.

⁴⁶ Ndɔlg'n non a ton dɔit kɨ ngakai tit nyakɔj kɨ nya kɨyaya mbãkɨnõt.

⁴⁷ I ɗa kɨlaɓer ad Bɨraɓe Luwah loi kɨ ronel kɨ kamnda al kɨta nyag loi kɨ ton mbuj

⁴⁸ Kɨtɔ 'nten a i ɗa ɓer lo madngétaig'n Bɨraɓe a lad kɨ dɔit kɨ ɓoo kɨ kɨnda man kɨ ro kɨ kari kɨ nal nya kɨɗen. A la jug hand kɔit mbã kad i nuj kɔ.

Girrde mad a ɗe tuj Israel

⁴⁹ Bɨraɓe a ad girrdeg mad ɓain ko sãi dɔngoi dɔningt so dɔit kanangbe tit kuro be, girrdeg'n i ger ta ɓe lod al,

⁵⁰ girrdeg'n takumd ngang in a ɔsɨgon de kɨ tag al, a oo kumtondo lo ngon al tɔ.

⁵¹ A san ngan nyakulg loi kɨ kand dɔning loi mbã tujɨn, ad ɓoo a tɔlsɨ, a nyan nyako, ke man nduu, ke yib, ke ngan mangg loi kɨ ngan batg loi al mbã kad nujɨn kɔ.

⁵² A lan na gugɨn dɔ ɓeg loi mbã kad ndogbɔrr ngomdɔɓe loi kɨ ngal kɨ kɨngang so, ĩgɨn i ɓakuld. Ã a lan na gugɨn dɔ ɓeg loi tube kam dɔningt loi tube kɨ Bɨraɓe Luwah loi adi.

⁵³ Dɔ ndɔt'n madngétaig a gugɨn dɔi, a ɗan sei nyakɨto ye, a i sa ngang kɨ teen kamit, dan ngani kɨdɨngãgt kɨ kɨdẽ'n Bɨraɓe Luwah loi adi.

⁵⁴ Dekɨdɨngã mad kusɨt kɨ i de kɨsɔl kɨ hal kɨsayelel kaa, a oo kumtondo lo ngonkõn al, ke nẽn kɨ ngetar lon, ke ngonɨn kɨdɔboit kɨ nãi roat.

⁵⁵ A ndig al kad n'ad kɨkɨɗa kudt dan nganɨn'n ndɨ sa kɨta nyasaa kɨɗang goto kam daiyot kɨ kamkɔl lon madngétasɨ gugɨn dɔsɨ gej kam ɓegt losɨ tube.

⁵⁶ Dekɨdẽ kɨ mand ngãi, kɨ hal kɨsayelel kɨtɔi'n a asɨ nda danjan ningt al kɨtɔ roa kɨsɔl kɨ hala kɨsayelel, a oo kumtondo lo ngawɨn ngetar lon al, ke ngonɨn kɨdɨngã ke kɨdẽ.

⁵⁷ Ke kow kɨ tee kamat kɨ ngana kɨ oojd kaa ne, a sad gid tilt kɨta nyag kɨ nal kam daiyot kɨ kamkɔl lon madngétasɨ gugɨn dɔsɨ gej kam ɓegt losɨ tube.

⁵⁸ Ĩla oo go roi maj, i hɔ ɗago tagt tube lo mberkɨnda 'nten in ndangɨn kam maktubt 'nten kɨtɔkad i ɓool tɔ kɨko kɨ kɨkootɓool 'nten, ad i tɔ Bɨraɓe Luwah loi, al a ne,

⁵⁹ Bɨraɓe a ndai, ĩ kɨ ngani, kɨ yokoosɨ kɨyaya, yokoosɨ kɨngang kɨ to kaglo ngãi kɨ mõig kɨ to ngãi kaglo ngãi tɔ.

⁶⁰ A ad yokoosɨ tube kɨ Ejipt't ɗen kɨ dɔit, ĩgɨn i ɓoold, a hɔin sem.

⁶¹ Kɨtɔi 'nten mõig kɨ dang dang kɨ yokoosɨg'n ndangɨn kam maktub mberkɨnda 'nten, Bɨraɓe a la kɨdɔit mbã kad i goto.

⁶² Ke neni ĩ ngãibe tit kɨmẽg kɨdɔrãt kaa ne, a i nãi tẽbe kɨta i tel roi go ndɨ tat lo Bɨraɓe Luwah loi al.

Bɨraɓe a tɨnda Israel tĩ ku girrdegt kɨ dang dang

⁶³ Tit'n Bɨraɓe ɗan ronel sesɨ kɨ n'ɔjsɨ kamkẽ kad i bɨlan ngãi ye, titbe tɔ la Bɨraɓe a ɗan ronel kɨ n'nujsɨ kad i goton. A netsɨ rup kɔ dɔningt'n i ndɨ awɨnt kɨta taa nyakagɓet.

⁶⁴ Bɨraɓe a tɨnda tĩi ku girrdegt tube kɔ dɔngoi dɔningt kɨmad mbã kɨ kɨmadt, nu la a i ɗa ɓer lo luwahg'n ĩn kɨ bɔwig gerɨnd al, ad i yo kagg kɨ mbalg.

⁶⁵ A i ngah kam kɨsokɨber ku girrdegt'n non al, danjai a ngah lo taakò al tɔ. Nu la Bɨraɓe a ad kami dai ta paa, a ad kumi mẽ; a ad roi oi siw.

⁶⁶ Kami a ɗa bisɨsɨ lo ndiit kɨdɔ dõ, ɓool a ɗai ndɔ ho kàda ho, kami a dai tapa dɔ jindiit.

⁶⁷ Kɨsĩ a i el an: Kad lo sɔl dɔmt, na lokɨsɔle a el an: Kad loti dɔmt kɨta ɓool'n ɗoosɨ kami kɨ kɨta nyag kɨ ood kɨ kumi.

⁶⁸ Bɨraɓe a tel sei kɨ Ejipt't gog kɨ tɔ, ɗob'n m'eli taa kete m'an: A ooa gog al. Nu la a i sahn ɗob ndugo rosɨ kɨ nyambɔj tit ɓerg kɨdɨngã kɨ kɨdẽ, na de kɨ a ndugosɨ goto.

⁶⁹ Tag 'nten la ĩn tag kɨ kam kunkɔt'n Bɨraɓe un sed ngan Israelg kam dɔningt kɨ Moab, na nda mbera Moij, ndad mber dɔ kunkɔt'n un sed dɔ mbalt kɨ Horeb.