Deteronom 27 - Maktub Ta Kumkajir

Dɨngɨr dɔ mbalbot kɨ Ebal

¹ Moij kɨ kɨbog lo Israel elɨn deg anan: I ngomɨn go mberkɨndag tube'n m'ndasɨ ɓone.

² Lon i gangɨn bah Jurdẽ oi kad andɨn kam dɔningt'n Bɨraɓe Luwah loi ndɨ adi ye, ɔi mbalg kɨbobo i ndad dɔnat kɨ dõ na i ɗa horr rodt.

³ A i ndang tag tube lo mberkɨnda 'nten dɔ mbalgt lon i gangɨn bah Jurdẽ kɨ andɨn kam dɔningt'n Bɨraɓe Luwah loi ndɨ adi. I dɔning'n mbà kɨ tej nũnt tit'n Bɨraɓe Luwah loi unɨn kɔn ad bɔwig.

⁴ Lon i gangɨn bah Jurdẽ woi, a i ndahn mbalg 'nten dɔ mbalbot kɨ Ebal kɨgo tat'n m'ndɨ m'ndai mbera ɓone, i ɗa horr rodt.

⁵ Nu la a i ɗa dɨngɨrt ad Bɨraɓe Luwah loi, dɨngɨr mbal kɨ hand ɔda al.

⁶ A i nda dɨngɨr ad Bɨraɓe Luwah loi kɨ mbalg kɨkanj tɔsɨ na a i la kadkarig kɨlahorrt dɔ dɨngɨrt'n non ad Bɨraɓe Luwah loi.

⁷ A i lad kadkarigt kɨ kad kamsɔllom na nu la a i sanya, a i ɗa ronel nõ Bɨraɓe Luwaht loi.

⁸ Dɔ mbalgt'n ɗan a i ja tag tube lo mberkɨnda 'nten, a i jad dodo.

⁹ Moij kɨ Lebiag ngéjanyamosɨ elɨn ta kɨ Israel tube anan: Oo Israel, i ndɨ tai mbo, i nel mbii oon dɔ. Ɓone i tel girrdeg lo Bɨraɓe Luwah loi.

¹⁰ Kɨtɔ 'nten a i tel roi go ndɨ tat lo Bɨraɓe Luwah loi, a i ngomgo mberkɨndag loa kɨ tagkɨgangg loa'n m'ndai mbera ɓone.

¹¹ Ndɔat'n non la Moij ndamber deg an:

¹² Lon i gangɨn bah Jurdẽ oi a ne, Simeõ, Lebi, Juda, Isakar, Jojep kɨ Benjami a ɗàn dɔ mbalbot kɨ Garijimt kɨta njang dɔ deg

¹³ na Ruben, Gad, Ajer, Jabulon, Dan kɨ Neptali a ɗà dɔ mbalbot kɨ Ebal kɨta ndɔl.

Ndɔlg kɨkɨlah gidaijoo

¹⁴ Lebiag a elɨn ta kɨ Israelag tube kɨ ndid kɨbo anan:

¹⁵ Ndɔl i dɔ det kɨ ngetɔsɨ ɓakumtanya ke ngenyẽ ɓakumtanya, i nya kɨyerr ro Bɨraɓet i kɨlaɗa ji de kɨ ngegoosɨ ɗa kɨla, na ndɔl i dɔ det'n uda kam lot kɨyarɔ. Deg tube a elɨn anan: Ã, i titbe.

¹⁶ Ndɔl i dɔ det'n kid bɔwɨn kɨ kõn. Deg tube a elɨn anan: Ã, i titbe.

¹⁷ Ndɔl i dɔ det'n ndɔt kɨ kag ɗobnin lo madɓen. Deg tube a elɨn anan: Ã, i titbe.

¹⁸ Ndɔl i dɔ det'n ɔrr mundo laa mut. Deg tube a elɨn anan: Ã, i titbe.

¹⁹ Ndɔl i dɔ det'n tuj takɨgang lo mbah kɨ ngonhal kɨ ngengawkoi. Deg tube a elɨn anan: Ã, i titbe.

²⁰ Ndɔl i dɔ det'n to kɨ nẽ bɔwɨn kɨta ɔrr kub ro bɔwɨnt. Deg tube a elɨn anan: Ã i titbe.

²¹ Ndɔl i dɔ det'n to kɨ dan kɨ ɗi. Deg tube a elɨn anan: Ã i titbe.

²² Ndɔl i dɔ det'n to kɨ kõnanɨn ad i ngonkooj bɔwɨn ke ngonkooj kõn. Deg tube a elɨn anan: Ã i titbe.

²³ Ndɔl i dɔ det'n to kɨ mumɨn. Deg tube a elɨn anan: Ã, i titbe.

²⁴ Ndɔl i dɔ det'n tɔl madɓen gid tilt. Deg tube a elɨn anan: Ã i titbe.

²⁵ Ndɔl i dɔ det'n taa kadkari kɨ n'tɔlɨn de kɨdenesew. Deg tube a elɨn anan: Ã i titbe.

²⁶ Ndɔl i dɔ det'n ngomgo mberkɨndag 'nten al, hɔ ɗagoot al tɔ. Deg tube a elɨn anan: Ã i titbe.