Deteronom 25 - Maktub Ta Kumkajir

Mberkɨnda dɔ nda det kɨ ndeh

¹ Lon Deg joo gakɨn na, na ɗen lo gangtat, ngegangta a ɔrrɨn ta dɔ det'n ta loa goto, na a gangɨn ta dɔ det'n ta hɔa.

² Ĩla de kɨ ngeɗamajal'n non asɨ nda kɨ ndeh a ne, ngegangta a laa ningt nont, ndaa asɨ go majal loa'n ɗa nõ.

³ Ngegangta a ndaa kɨ ndeh nja dɔsɔɔ, na kɨ tɔi dɔsɔɔ al, na ɓeta ndaa ngãi kɨtɔidɔ, ad ngonkõi nõ tel nya kɨkid takum koosɨgt.

⁴ A i la kɨɗund ta mangt kɨ ngeɓa nyako al.

Ta lo de'n oi kanj kooj ngon

⁵ Moij el an: Lon ngankõnag joo ndɨn nat, na kɨkɨɗa kudt oi kɨkanj ngon ye, nẽa a taa de kɨɗang al, na ngonkõ ngawa la a taa gan goot ngonkõn ye.

⁶ Ngon kɨdɨngã kɨdasa'n a ooja ye, a nda tɔ ngonkõn'n oi dɔat kɨtakad tɔa goto kam Israelt al.

⁷ Ĩla ngonkõa ge taa dekɨdẽ'n non al a ne, dekɨdẽ a aw ro kɨbogt ta tabit, a el an: Ngonkõ ngawɨm ndig ndah tɔ ngonkõn kam Israelt al, ndig ɗa sem nya kɨgoɗobat lo ngonkõ ngawɨm al.

⁸ Kamla kɨbog kɨ ɓebot loa a kunɨna, a elɨna ta. Ĩla hɔ bá kɨdɔt na an: M'a m'taa nẽmt al

⁹ kamla nẽ ngonkõa a aw roat nõ kɨbogt, a ɔrr sanjant, na a tiw horr takumat. Dekɨdẽ a ela an: Titbe la a ɗa ne kɨ de'n ndig nda koh ngonkõn al.

¹⁰ Labekɨnõt kam dɔning Israelt a kunɨn tɔ de'n non anan: Kuj lo de'n ɔrrɨn sanjaat.

Nyaɗa kɨgoɗobat al

¹¹ Moij el an: Lon dekɨdɨngãg joo ɗa ɗɔɔn na a ne, na ĩla nẽ kɨkɨɗa ɗe kad ɗa kɨ ngawɨn ɔrra ji det kɨ ngendaa na la jin hɔn nombaa a ne,

¹² a i gang ji dekɨdẽ'n non kɔ. Kɨ kanj kookumtondo loa.

Ɗa gat kɨ goot

¹³ Ot kaw kɨ mbal mbɔj nya joo, kɨbo kɨ kɨdu, kam ɓɔlt loi.

¹⁴ Ot kaw kɨ ngo tɔrr nya joo, kɨbo kɨ kɨdu, kam kujt loi.

¹⁵ A ĩn kɨ nyakɔj nya kɨjeje kɨ kɨgoɗobat, a ĩn kɨ kɨlo tɔrr nya kɨjeje kɨ kɨgoɗobat, kɨtakad ndɔig ĩn ne ngãi kam dɔningt'n Bɨraɓe Luwah loi ndɨ adi.

¹⁶ Kɨtɔ dekɨɗen'n ɗa nyag 'nten, ad i dekɨɗen'n ɗa nya kɨlo ndokumt, i nya kɨyerr kɨro Bɨraɓe Luwaht loi.

Takɨgang dɔ Amalek

¹⁷ Moij el an: I ga kami dɔ nyat'n Amalekagt ɗan sei dɔ ɗobt, lon i teen kɔ dɔning Ejipt't.

¹⁸ Lon ndɔdɨn dɔ ɗobt, son dɔ degt'n tɔgd goto, ĩgɨn ndian goit lon kɔr ɗain ad tɔgi goto, na ɓoolɨn Luwah al.

¹⁹ Goot'n Bɨraɓe Luwah loi ug ɔrri ji madngétait'n gugɨn dɔi tube ad i taakò kam dɔningt'n Bɨraɓe Luwah loi ndɨ adi nyanduba kɨ nyakagɓet, ot kad kami oi dɔ nyat 'nten a i tɔlɨn Amalekag tube kɨtɔkad de ga kamɨn dɔdt al.