Deteronom 24 - Maktub Ta Kumkajir

Ta dɔ maktub tuɓa dekɨdẽ

¹ Moij el an: Ĩla de mad taa dekɨdẽ nẽnt, na ĩla dekɨdẽ'n non nela al kɨta ngah nya mad kɨgoot al roat, a ndang maktub tuɓa ada jiat, na a tuɓaa kɔ kuj lon.

² Dekɨdẽ'n non a tee aw, na a asɨ tel nẽ dekɨdɨngã mad kɨɗang,

³ na ĩla ngawɨn taa gog nõ, oo nya mad kɨ gootal roat, na ndang maktub tuɓa ada jiat, tuɓan kuj lon, ke ngawa kɨ gog'n non oi,

⁴ kamla ngawa kɨdasa a asɨ tel sia kɨront gog al, kɨta dekɨdẽ'n non tel kɨyerr kɨtatɔa woi, kɨta i nya kɨyerr takum Bɨraɓet. Ot ɗen kɨ majal dɔ dɔning'n Bɨraɓe Luwah loi ndɨ adi nyandubat.

Kookumtondo lo deg madg

⁵ Ĩla de mad taa dekɨdẽ kij a ne, a aw ta ɗɔɔt al, a adɨna kɨla mad kad ɗa al. A ndɨ ɓe lon asɨ ɓal kɨɗa nat kɨ nẽn.

⁶ Moij el an: A i taa mbal kusɨnya nyako kɨbo ke kɨdu girr nya tɨna nyat al, kɨta i kumkajir lo de'n i taa nyatɨna nyat.

⁷ Moij el tɔ an: Ĩla i ngahn de mad in ɓoog kɨkɨɗa ku ngankõn Israelagt, na ɗaa ɓert ke ndugoa kɔ, a tɔlɨn ngeɓoog'n non. Titbe a i ɔrr nyaɗa kɨmajal kɔ dãsɨt.

⁸ Oo go roi maj dɔ mõi banjt kɨtakad i ngomɨn go nyag tube Lebiag ngéjanyamosɨ a ndoosɨn. Oon maj kad i ɗan go mberkɨndag'n m'ad'd.

⁹ I ga kami dɔ nyat'n Bɨraɓe Luwah loi ɗa kɨ Mari dɔ ɗobt lon i teen ko Ejipt't kɨtɨga.

Ɗa kɨ deg kɨ tõg

¹⁰ Moij el an: Nya kɨɗen'n i ad madɓei kɨlo tɨnat a ne, ot kand kuj loa kun nya loa mad girr nyatɨnat'n ada nõ.

¹¹ A i ɗa tɨga ad de'n taa nya jiit un nya'n i tɨna nõ ɗen tɨga adi.

¹² Ĩla de'n non i ngéndo a ne, nya loa'n tɨnai nõ, ot nya kad loti dɔt.

¹³ A i tel ada kete nõ kudkàdt kɨtakad to kam kubt lon, na a njang dɔi, a i nyaɗa kɨdenesew loi nõ Bɨraɓe Luwaht loi.

¹⁴ Ot da kum ngeɗa kɨla nar'n i ngendo kɨdangt, ke i kɨkɨɗa ku ngankõigt, ke i mbah'n hɔlondɨt ɓe loi kam dɔningt loi.

¹⁵ A i ada nyabaji loa kete nõ kudkàdt kɨta i ngendo, na nda kamɨn dɔt. Be al a ne, a ko kɨdɔ Bɨraɓet ad tel majal kɨdɔit.

Ta lo mbah, ngonhal kɨ ngengawkoi

¹⁶ A tɔlɨn bɔwg kɨtɔ majal lo ngang al, a tɔlɨn ngang kɨtɔ majal lo bɔwg al tɔ. Dekɨɗen, a tɔlɨna kɨtɔ majal loa kɨkɔsɨdɔa.

¹⁷ A i tuj takɨgang lo mbah ke ngonhal al, a i ta kub lo ngengawkoi'n tɨnai nya al.

¹⁸ I gah dɔt kɨta maɗi ĩ ɓer kam dɔning Ejipt't, na Bɨraɓe Luwah loi badɔi. Kɨtɔ 'nten la m'ndai mber kad i tel roi go mberkɨndat 'nten.

¹⁹ Lon i ɗa nyako kam ndɔɔt loi, na kami oi dɔ singa nyako kam ndɔɔt a ne, a i tel kɨta kun al. Singa'n non a i lo mbah ke ngonhal, ke ngengawkoi kɨtakad Bɨraɓe Luwah loi ad maj urri kam kɨlaɗa jiit tube.

²⁰ Lon i nda kand kag olib loi a ne, ot tel kaw sah ndega kɨnãi dɔjiagt. I kɨta mbah kɨ ngonhal kɨ ngengawkoi.

²¹ Lon i ja kand nduu loi a ne, ot ɓur goota kɨnãi. I kɨta mbah kɨ ngonhal kɨ ngengawkoi.

²² I gah dɔt kɨta maɗi ĩ ɓer kam dɔning Ejipt't. Kɨtɔ 'nten la m'ndai mber kad i ho ɗa titbe ho.