Deteronom 23 - Maktub Ta Kumkajir

Deg'n a andɨn dan ngékawnat lo Israel al

¹ De a taa nẽ bɔwɨn al, a ɔrr kub ro nẽ bɔwɨnt al tɔ.

² De'n ɔrrɨn ndõma ngah dó ad nuj kɔ ke gangɨn mɔta a ne, a and kam ngékawnat lo Bɨraɓe al.

³ Ngon kɨ bɔw goto a and kam ngékawnat lo Bɨraɓe al, ke ngakaa kɨkõkɨlah a andɨn kam ngékawnat lo Bɨraɓe al.

⁴ Amonia ke Moabia kɨɗa kaa a and kam ngékawnat lo Bɨraɓe al bat mbã ngakaa kɨkõkɨlah, a and kam ngékawnat lo Bɨraɓe al mbãkɨnõt,

⁵ kɨta ɗen kɨ nyasa kɨ man kãi lan ne tai dɔ ɗobt lon i teen kɔ Ejipt't al, na ban ji Balam ngon Beor kɨ ɓe loa i Petor kam dɔning Mesopotamit kad nda ndɔl dɔit.

⁶ Na Bɨraɓe Luwah loi ndig koo dɔ ta lo Balam al. Bɨraɓe Luwah loi mbel ndɔl ad tel majkurr kɨdɔit kɨta Bɨraɓe Luwah loi tari.

⁷ A i sah kam kɨsokɨber lod ke majkurr lod al bat kaglo ndii kɨdɔdõ mbãkɨnõt.

⁸ Ot ko de kɨ Edomt nya kɨyerrt kɨta i ngonkõi. Ot ko de kɨ Ejipt't nya kɨyerrt kɨta maɗi in mbah kam dɔningt loa.

⁹ Ngankaad kɨkõmɨta'n oojɨnd a andɨn kam ngékawnat lo Bɨraɓe.

Kar ro kam lo hɔndɨt

¹⁰ Lon i tee aw kɨta ɗɔɔ kɨ madngétaig a ne, i ngom roi maj dɔ nyat kɨɗen kɨmajal.

¹¹ Ĩla de mad kusɨt i kɨkar al kɨtakul ngon roa kɨ tet ndɔ a ne, a tee kam gongt kɔ, a tel andt gog al

¹² mbã dɔj losɔlt lon a ndog man na lon kad ud a ne, a tel and kam gongt gog,

¹³ A i ɗa lo mad tɨga gid gongt, lot'n non la a aw nja ɓe tit ye.

¹⁴ A i ngom kɔsɨ kam nyagt loi, na lon a aw nja ɓe a ur ɓe, na i tel i tiw ning dɔ nyat'n tee kamit

¹⁵ kɨta Bɨraɓe Luwah loi a ndia kam gongt loi kɨta ngomi kɨ n'la madngétai jiit. Kari na gong loi a i kɨ kar nyang, na ɓeta Bɨraɓe oo nya kɨyerr roit ad tur gidɨn adi.

¹⁶ Ɓer'n ãi ko ro ngeent aw roit a ne, ot tel sia kɨro ngeat gog.

Ngom dɔ ɓer'n ãi ngeen

¹⁷ A ndɨ nat sei, a ndɨ kusɨt kam lot'n a kɔt kam kɨkɨɗa ku ɓebogt loi in oo i kɨmaj. A i ɗa ngétɔg dɔat al.

¹⁸ Sumba kad ngahn kaya dekɨdẽ ku ngan kɨdẽgt lo Israel al, titbe tɔ kad ngahn dekɨdɨngã kɨ tel ron kɨdẽt ɓi kɨ dekɨdɨngãg ku dekɨdɨngãgt lo Israel al.

Luwah ɔg dɔ la kadkari nar'n i nar kaya dekɨdẽ

¹⁹ Ot ɗe kɨ nar baji lo kaya dekɨdẽ, ke nar ndugo bisɨ kam kujt lo Bɨraɓe Luwah loi kɨta tɔl ta kunkɔ kɨɗen kɨta tujoo in nyag kɨyerr ro Bɨraɓe Luwaht loit.

²⁰ Ot kad ngonkõi nyatĩna kɨ mana dɔt, ke nar, ke nyasa, ke nya mad kɨtĩna kɨ mana dɔt.

Tɨna nya kɨ mana dɔt i goot al

²¹ A i ad mbah nyatĩna kɨ mana dɔt na a i ad ngonkõi nyakɨɗen tĩna kɨ mana dɔt al kɨtakad Bɨraɓe Luwah loi ad maj urri kam nyat kɨɗen kɨ jiit kam dɔning'n i ndɨ andt kad i taa nyakagɓet.

²² Ĩla i un kɔi kɨ yokɨnda ad Bɨraɓe Luwah loi a ne, ot ndɨ kɔkɨ dɔ tɔl konat kɨta rota, Bɨraɓe Luwah loi a ndɨje taa roit, a ĩn kɨ ta dɔit.

Kunkɔg

²³ Ĩla i un kɔi kɨ yokɨnda al a ne, i majal al.

²⁴ Nya'n tee tait i hɔ go sem na i tɔlkon ta kɨ tee tait, ad i kunkɔ kɨ un ad Bɨraɓe Luwah loi kɨ kamndig.

²⁵ Ĩla i aw kam ndɔɔ nduut lo madɓei a ne, i sa kanda tit'n kami ge ad tɔl ɓooi, na ot kũ kam keht loi.

²⁶ Ĩla i aw kam ndɔɔ nyakot lo madɓei a ne, i teet dɔ nyako kɨ jii na ot jako lo madɓei kɨ kiya. Ĩla and kam ndɔɔ gemt lo madɓei a i tet singa gem kɨ jii, na a i ja gem lo madɓei kɨ ngorong al.